港燦山頂遊

今晚真係超級tourist呀我地---去太平山、上凌宵閣、去老親亭，仲要揾老親亭既機佬影大合照添！

Buppa Gump既野好好吃，好鍾意啤酒蝦同天使麵。仲有Forrest Gump阿媽既名句："Life is like a box of chocolate, you'll never know what you gonna take."

阿媽係得既！

香港既空氣不知何解好左咁多，今晚既維港夜景係我有生以來睇到最高解像度既一次，好清呀！仲有十六既月光．．．圓又圓。

最超低能勁搞笑就係一齊去麥當當對出既遊樂場玩，難得無細路仔，比我地依班Kidult玩曬。我真係唔知幾耐無玩過滑梯啦，睇我sir得幾快！好dun呀條梯。

可以同朋友慶祝生日，真係一件好幸福好幸福既事。大家都要好好保重身體，好好珍惜依段橫跨兩個世紀既友誼。

但願人長久，千里同嬋娟。

Persepolis - 我在伊朗長大

《Persepolis -我在伊朗長大》是作者瑪贊的自傳漫畫。

在伊朗出生，瑪贊在伊朗發生伊斯蘭革命時剛十歲。一下子社會動盪、到處爆發示威、宗教逼害、政治討論、革命英雄、瑪贊甚至有親人被處決。世界忽然變了，瑪贊要帶上面紗，跟男同學分開上課，她的宗教熱情一下子冷卻。

然後，一連十年的兩伊戰爭爆發．．．

一個在依朗出生的女孩會是如何長大呢？瑪贊的希望、悲傷、傍偟、成長，以及，如何面對生離死別。

誠意推薦。

又，漫畫己被拍成電影Persepolis呢。

紙皮

我在上環工作過一段時間，果度雖然在office有超級無敵靚海景，但係一落街就係一個老化既舊區，成日見到有ｄ瘦骨如柴既婆仔執汽水罐同紙皮箱。

有次見到有個好老既婆仔拖住一個車仔既紙皮箱上唐樓既樓梯，紙皮箱太重，佢對手已經拉到青筋曝現；咁我自告奮勇幫佢托一托車仔，結果婆仔好嬲地閙我。之後睇報紙都偶然都會見到老人家為左爭紙皮箱而大打出手既報導，原來紙皮箱對拾荒既老人家來講係重要既財產，其他人掂都唔掂得。

所以ZZ小姐既名言：「小心老左要執紙皮」對我來講真係一個好可怕既景像。

唔係話執紙皮有乜唔好呀，如果係為左響應環保、kill time咁就真係好好既運動。但係依個咁富裕既香港社會之中，我地竟然要上一輩既老人家靠拾荒來糊口，咁我地仲駛唔駛坐在冷氣房中慢慢硏究堅尼系數既pattern同計法呢？咁樣都唔算係貧富懸殊咩？

林夕

RoadShow既清談節目訪問林夕，講到錢。

林夕既答案大既係：錢就算唔係萬能，都係千能、百能。比如你失戀時，在一間有充足冷氣既房失戀，總好過在一間唔夠冷氣又或者無冷氣既房失戀。但係，人唔可以搞到被錢支配,都要有一定既立場，唔係為左錢乜野都做。林夕既坐右銘係「無欲則剛」；比如你供緊樓既話，你就唔會同老細撐得咁行，因為你會怕無左份工失業嘛。

一個有唔少人生經歷既才子真係唔同。

錢就係錢亦只係錢，有錢做到既事，亦有錢做唔到既事。錢可以令你失戀時有得涼冷氣，但係唔可以令你唔駛失戀。但係倒轉來講，錢雖然唔能夠幫你避免失戀，但係可幫你失戀時有錢買醉同tissue抺眼淚囉。唔駛為錢死為錢亡，但係又唔駛好清高地對錢不屑一顧。

人要同錢維持一個健康既關係，就一定要控制自己既欲望，令自己唔需要處於仰人鼻息、身不由己既景地；因為錢唔係太重要而得到一定既身心自由，中間既平衡點如何掌握，係個人既選擇。



志雲飯局:

戀愛為左乜呢?揾腳,揾腳來吃飯、睇戲。

要選擇細水長流定刻骨銘心呢?希望由刻骨銘心到細水長流。

燥抑症既父親,無恨,佢只係自私,唔識愛佢地,自我中心。

焦慮症:因為無知,所以做左好多無用既野。肉體既疼苦比精神上疼苦更大。

一個活躍既靈魂,被困在疲累既身軀。

人生如過客,租樓就得嫁啦,唔夠錢買,租都一樣係擁有。

放下自在。

細公司

在一間細公司工作同大公司有乜野唔同呢？我頭兩個禮拜既體會就係：好多瑣碎事。

阿Ben哥哥一下子比人請走左，剩返一ｄ唔太整齊既file，真係好似拼圖咁，一樣樣揾，一樣樣估。BR我就知姐，乜有樣野叫CI嫁咩？你仲要唔知全名係乜添，我點揾出來呢？

講到Filing就真係大工程，有大量唔知點來既文件，仲有一大堆唔知找左未既帳單；我依家枱頭推滿依ｄ紙，真係令人心煩意亂。Email就乾脆無filing可言，唯有full text search，然後去洗杯斟水，返來希望有ｄ結果。

好彩我既簽名聽日終於可以生效，我可以開始寄支票，如果唔係比人追起債上來，真係唔知點比錢。

文具同tissue，又出奇地容易解決喎，文具用Lyreco，妹妹自己出去買tissue。妹妹年紀細細，但係好有管家婆既潛質，一下子就睇到仲欠ｄ乜野文具supplies，以後就真係要靠佢令我地唔會缺衣少食啦。

而其中最麻煩既，仍然係人既問題。

Office除左我，一共只有三個同事，一個完全唔適合做佢份工，一個星期三辭左工。只好全力保住第三個，然後努力請人，祝我好運，最惡劣既情況係，我一個人要做四個人野囉。

我都知道，肥佬一次完之後，係一定要重讀嫁啦，不過估唔到咁快姐。嗱，依次我真係一定唔會放棄退縮嫁啦，我唔要再re－take啦！

我已經破釜沈舟，有工揾我都唔見，一定要搞惦依度先講。

成為湖泊 - 轉載

一位年老的印度大師身邊有一個總是抱怨的弟子。

有一天，他派這個弟子去買鹽。

弟子回來後，大師吩咐這個不快活的年輕人抓一把鹽放在一杯水中，然後喝了它。

大師問：「味道如何？」

弟子呲牙咧嘴地吐了口吐沫：「苦!」。

大師又吩咐年輕人把剩下的鹽都放進附近的湖裡。

弟子於是把鹽倒進湖裡，老者說：「再嚐嚐湖水」。

年輕人捧了一口湖水嚐了嚐...

大師問道：「什麼味道？」。

弟子答道：「很新鮮。」

大師問：「你嚐到鹹味了嗎？。」

年輕人答道：「沒有。」

這時大師對弟子說道：

生命中的痛苦就像是鹽；不多，也不少。我們在生活中遇到的痛苦就這麼多。但是，我們體驗到的痛苦卻取決於我們將它盛放在多大的容器中。」

所以..

當你處於痛苦時，你只要開闊你的胸懷…

不要做一隻杯子，

而要做一個湖泊。

焉知非福

新工作係一間超細Office，加埋我先有四個人；我工作咁多年都未試過在一個無分部門既Office工作，真係有一萬件唔識做既事。

好彩既係，上一任既Ben哥哥（依個係自稱，ｄ妹妹即刻反駁話係"Ben叔叔"．．．）肯留多兩個禮拜幫我handover。

Ben哥哥都算係咁囉，有問必答，仲係熟ｄ之後就好坦白地講佢各種出事既原因，每一個老闆既脾性，同比建議我以後既Approach。

其實簡單ｄ來講，未又係溝通囉。阿Ben哥哥咁大佬性格，唔鍾意比人管，又唔鍾意睇數字同report；碰到一個同樣係咁大佬性格又勁睇數據、非常Systematic既老闆，即刻就火星撞地球囉。個情形都真係搞到好惡劣嫁，佢地之間刀來劍住既email比我見到，真係火花四踐，鬧到七彩，好嚇人。

Ben哥哥既強項係Sales，破冰見客一流；但係你要佢坐在度分析數據交報告，真係攞佢命。佢既忠告係要比老闆做大佬喎，好啦，等我今日隊返枝金紡啦。

今日老闆終於來左香港，上午同我catch up完，下午就要Ben哥哥即刻執野走。

依ｄ場面都真係有ｄ令人難過嫁，又係你地叫人留耐ｄ，依家又咁樣趕人走，真係人要面樹要皮，點解唔好來好去呢？其實計正阿Ben哥哥都只係做到今個星期五姐，又何必搞到好似炒佢咁？

對於阿Ben哥哥都係果句，每個人都有自己適合既工作，佢就真係唔岩打工。都係自己出去搞生意啦，努力加少少運氣，真係分分鍾可以闖出一片天地；技術官僚既野，都係等我依ｄ無乜出息既人做啦。

Ben哥哥，你得嫁喎，祝你好運！

桑蘭

昨日去紅館睇左國家隊既體操表演，嘩！真係超高水準演出，令人嘆為觀止。

其中最緊張剌激既，一定係跳馬。到現場睇先知道原來跳馬係需要咁長既助跑，助跑區差唔多成個紅館場咁長，都係到最尾段先有跳板同鞍馬。睇住運動員在助跑區中越跑越快，然後清脆地一踏跳板，在空中翻騰，然後俐落地落地，一切都只發生在電光火石之中，係動感、力量同技巧既表現。

我又再次覺得跳馬真係一個好剌但又極危險既運動，又不禁再想起桑蘭。

桑蘭本來係一個前程錦繡既跳馬運動員，但係在九八年美國友好運動會練習時因為一次失手，桑蘭頭部著地，頸椎神經嚴重受傷，胸部以下失去知覺，終生下半身癱瘓。

當年桑蘭只有十七歲。

一個未成年既女孩子由事業高峰墮下，前一秒仲係一個可以做出近乎超人動作既運動員，一心為奧運金牌既夢想而奮鬥；下一刻就因為自己既失誤，醒來時已經動彈不得，終生需要坐在輪椅上。

唔知道在午夜夢迴時，桑蘭腦海中會唔會不繼重複當時自己由助跑到落地既每一個動作，會唔會悔恨自己既錯失，又會唔會夢想自己有一天可以再次在空中飛行呢？

但係桑蘭表現出超卓既樂觀同勇氣，佢無自怨自艾，亦無指天罵地鬧個天點解對佢咁唔公平。佢選擇接受現實，面對自己傷殘，努力活下去。

桑蘭勇敢面對痛苦既手術同復康過程，適應坐在輪椅既生活，佢更加考上北京大學新聞系，一面讀書，一面做主播、訪問、奧運特約記者等工作。今年桑蘭剛畢業，正式全面投入工作，佢既自信積極，真係令佢閃閃發亮。

睇桑蘭既Blog，記錄下佢既喜怒衰樂同不平，中間一直流露出一股堅強柔韌既氣質，一個真正既強者，該當如此。

人身難得，健康既身體更加難得，我地依ｄ比桑蘭幸福得多既人，又何苦傷春悲秋？我地又點解唔珍惜生命，好好地活下去，好好地體悟人生？

經驗

今日無意中睇左一份Resume，睇完真係有ｄ唔舒服既感覺。

個申請者係之前間工司請人時，Apply我而家做緊既工。佢係我當年出來做野第一份工時既傳奇人物，我入到公司時佢己經走左，但係佢果條team人才軰出，個個都好快升上management，可以獨當一面，佢係一個絶對既姐級人馬。

之後佢回巢，有機會同佢合作，阿姐份人雖然嚴肅，但係同佢混熟左之後，佢真係會明白我份工既難處，好義氣仔女。有幾次真係比客打到變豬頭兼車到上天花板，分分鍾要賠天文數字既大鑊野，都係靠佢拔刀相助，咁先大步門檻過。

但係之後聽聞因為佢同上司不和，上年年底被辭退，睇佢既Resume，依家都仲未揾到工。佢既級數，又點會同我報同一份工呢？

佢無寫明自己既年齡，但係由佢HKCEE既年份計算，大概只係四十三歲。但係佢偏偏只話自己有"10 years management experience"。唔係掛，我剛畢業時佢已經做左大家姐好耐，又點只十年管理層經驗？佢咁樣寫，唔通係怕人地嫌佢老？

我一直覺得四十幾歲先係管理既黃金年華，一方面積累左好多人事管理既實經驗，無左後生仔果ｄ衝動同情緒化，另一方面又正值壯年，精力充沛。依個唔係正正係大好年華咩？

莫非真係崇尚年青既文化已經深入各個領域，連經驗都唔能夠答救咩？

尖咀商務

今日終於去左新既尖沙咀商務。書店明顯細左，書架高左密左；無左無敵大海景而且只有好少窗，無左自然日光。

最慘係樓下就有一間自助餐廳，碗碟聲，人講野既嗡嗡聲．．．好嘈。

真係好不爽呀！

書店唔係街巿，可唔可以加玻璃隔音？

香港真係容不下一間舒服ｄ既書店？

《清明上河圖》

依幅北宋未年由宮廷畫師張擇端所畫既《清明上河圖》來左香港，機會難逢，作為一個閒人當然要去睇下。

其實古人睇卷軸畫，係唔會一下子攤開晒來睇既。佢地會三五知己相約，將畫軸由右拉出兩三尺，慢慢欣賞品評，然後卷返起依一部份，再拉出後面既兩三尺畫出來睇。一卷畫，分分鍾睇一個下晝。咁樣既品畫方式係卷軸畫獨有，又因為有動畫既效果，所以卷軸晝可以帶領觀者用畫家既雙眼一齊去遊山玩水，一齊越時空，看盡古往今來既人事物。而《清明上河圖》呢，就帶我地由鄉既山水田野，穿過汴河，走入當時大宋首都繁華既汴京街道。

北宋未年既汴京街道人來人往、店舖林立。估下乜野係「上店」？又乜野係「飲子」？依個招牌真搞笑，叫「久住王員外家」。

汴河上面條橋就犀飛利囉，叫虹橋，因為好似彩虹咁，由岸東橫跨到岸西，下面一條橋墩都無。我地講緊一千年前喎，起到條咁樣既橋，都真係工程既一大成就。無橋墩有乜野好處？咁條虹橋咪唔會好似九江大橋咁比船撞斷囉，就算船長無洽眼訓，果時又無雷達又無GPS，遇上潮漲大霧，有橋墩既話真係分分搞到橋毁船沈人亡嫁！

講到北宋未年，就一定唔可以唔講俗稱「陰公二宗」之一既宋徽宗趙佶啦。佢既管理技巧就九流，但係做藝術家就一等一，品味一流。同《清明上河圖》一齊來香港既國之重寶展覽之中，就有一幅宋徽宗既石圖。

金銀寶玉器都話好容易明白佢既珍貴同美麗姐，但係去到玩賞石頭－－－太湖石呢，其實都真係幾難明。雖然太湖石形狀好特別，但係依ｄ沈在太湖底既灰白色石頭，又有乜咁靚，令所有大戶人家都要有一大舊擺在自己個庭園之中，搞到大湖石差唔多比人打撈哂呢？真係唔識欣賞，總之好高層次囉。

宋徽宗仲巴閉到自創瘦金書體，在書法中自成一家添，都真係好厲害。瘦金體就前後重、中間瘦，十足火鸛對腳咁，一節節。我阿媽就唔多鍾意依種字，不過我覺得還好－－－如果係女人寫出來既話。

唉，趙佶真係錯生帝皇家，又或唔比佢做皇帝，一世做小王子咪幾好，可以日日吟詩作對，風花雪月。換過一個勤力ｄ有心機ｄ既人做皇帝，宋室既歷史會唔會改寫？會唔會就無左金兵入關、靖康之難、精忠報國、十二面金牌呢？咁就輪唔到趙構依個小子做皇帝，而秦檜兩公婆亦唔會食死貓，在岳飛廟內跪到依家。丫，但係咁咪連油炸鬼同射英雄傳都無埋囉？．．．我又問埋ｄ假設性問題，不過如果我地係多元時空，歷史都可以做實驗既話，咁就好玩囉！

睇完國之重寶畫展，睇埋《清明上河圖》歷史文化背景介紹，再排左好耐隊先可以睇《清明上河圖》真跡五分鍾，咁值唔值得？

去展覽真係只為果五分鐘咩？由睇到廣告，到約人去睇，再睇其他平時絶對唔識亦唔會留意既中國畫，到排隊時既期待，到終於睇到真跡時既緊張興奮，再收到迷你《清明上河圖》做紀念品，返屋企再睇一次，到今朝寫埋篇文，到依家打埋出來，依個先係全部既《清明上河圖》之旅。

在藝術館狹窄既環迴玻璃窗望出去香港島既景色，咦，咪就係一副卷軸畫？張擇端畫《清明上河圖》時，一定誓估唔到生氣勃勃既汴京係不足五十年內會戰火屠城。唔知一千年後，依個被譽為世界三大夜景既維多利亞港景色，會唔會成為未來藝術館既展品？可能ｄ睇晝（相？）既人會硏究我地係幾咁車水馬龍，ｄ人又從事ｄ乜野職業呢！

定係我地都只不過係同一班人，在大千世界中兜兜轉轉？嘿，我會唔會就係「劉家上色檀揀」既果個掌櫃呢？

板神

在京都幾日，個人真係會慢慢放鬆。行路慢左，吃野慢左。加上我全程大腦熄機－－－我又唔識日文，又係路痴，又唔係我計劃行程，阿公既錢又唔係我keep，真係一ｄ野都唔駛我擔心，跟住行就得啦。

但係一到大板就唔同晒，大板雖然比東京好，但始終係日本第二大城市，好急好繁忙。

由京都到大板只需要３０分鍾，但係就完全係兩個世界。在習慣左京都文雅緩慢既節奏之後，一出大板既地鐵，真係比佢如潮水既人流嚇親。唔知點解我地次次都會走錯邊，同人流方向逆轉，見到ｄ好急既人潮向你沖過來，真係會緊張。在香港慣左唔覺，一定要個人放鬆左先會明白所謂既「都巿壓力」何來。

大板本身其實除左買野同吃野之外就無乜好玩嫁啦，佢果個大皮古城之前已經被燒燬，而家重建既手工好粗劣，真係到此一遊便算。

我今次住心齋橋既紅燈區，近心齋橋呀嘛，無所謂啦。

第一晚我地落酒店旁邊既7-11買野，我先發現點解買野ｄ姐姐仔裝束咁奇特既？唔係話好性感，但係顏色係ｄ好刺眼既桃紅粉紫，又係絲襪質地既One Piece裙，咁我至明成條街都係既依ｄ「無料案內所」鋪頭係咁既意思：


無辦法啦，大腦shut down個人係遲鈍ｄ。依張相我都係日光日白至敢影咋，如果夜晚我一出閃光燈，真係驚會比人圍。

同埋，心齋橋ｄ渠蓋好有趣：





神戶呢，真係一個寧靜既海邊城市，已經完全睇唔到神戶大地震既痕跡。佢既日落，好美麗：










日本既環保，真係一級棒！

好熟口面喎．．．

一條辮子．．．？


金鷄？


大俠唔準笑我翻拍人地ｄ相嫁，我用傻瓜機又點zoom到去金閣寺頂呢？

大師大作

大師執相真有一手：

原相



執完之後
Version 1


Version 2


真係正左好多呀喎，仲搞到我幾想以後有機會在秋天去一次京都添，在清水寺同金閣寺看漫山紅葉，一定好靚。

相

大師叫到，Samsara即刻獻醜post相：





































在商場見到專幫小朋友剪頭髮既鋪頭：


唔佑點解依條金閣寺出口既樓梯感覺好熟悉：

京都

嗱，咪話依個blog無相睇，依家一次過post晒出來．

京都真係一個好舒服既古都，人民仍然係咁温文，節奏慢，古蹟處處，充滿人文氣息．

最喜歡漫步於京都街上，因為係古都又精心保護既關係，京都係一個長方形坐北向南既城市，街道畢直，唔係由南至北，就係由東至西，你可以依個街口見到一個寺院，下一個街口又一個神社．

稻荷神社：
















神社個名真係好聽，不過入面供奉左觀音、佛祖、老子。。。真係唔係好知佢到底係拜緊個。不過善信真係好多喎，日本興捐依ｄ橙色既門來祈福，你睇有幾咁多門：























佢地仲會拜ｄ好奇怪既神，比如神馬。神馬面前呢，佢地就擺左依樣野。。。應該都好岩胃口：

















仲有兔仔神（月兔？），佢咁cute，有冇法力嫁。






















稻荷神社奇就奇在有好多狐狸喎，唔當佢係狐狸精不突止，仲要整到好得意喎：























佢仲有一個「足腰神」，不過，我個Friend拜完佢之後唔夠一分鐘就跣親。。。

SC，希望足腰快快好返！下次拜神要誠心ｄ啦。


清水寺：

如果你有女仕同行既話，一定要預留大量時間比清水寺---前面果條街，真係好多野買。清水寺雖然近在眼前，但係要入去，真係一定要留下買路錢。我地就前後總共用左四個鍾在行街。

果度有好靚既手巾仔、好精緻十足小野妹妹用既梳、各種手織布、大量野食手信，仲有一d只可遠觀既靚靚陶瓷:


















Well，我地又唔係只血拼咁無文化既，清水寺真係好靚嫁，一齊去片：























金閣寺

















依個畫面，真係同一休和尚部卡通片一模一樣呀。依座金殿，真係用金箔舖嫁.

一休哥丫~~~


三十三間堂

















1001個觀音塑像放在一齊真係好震撼，入面唔可以影相，而且一定要在現場先感受到果種又激動、又寧靜既酸酸甜甜感覺.

結論係，京都真係一個可以一去再去既地方，我有個朋友上年去京都渡蜜月，都話好正呢!

IQ題

依個係乜野？
















。
。
。
。
。
。
。
。
。
。
。
。
提示：血拼時用。
。
。
。
。
。
。
。
。
。
。
。
。
。
。
。
。
環保袋？唔係，邊樹裝到野？
。
。
。
。
。
。
。
。
。
。
。
。
答案係：





















。
。
。
吓！仲係唔明？

無辦法啦，無人肯犠牲色相出鏡，唯有用燈來示範。

依個係女仕試身時，店員一定會比你既頭套。

怕且因為日本ｄ女士個妝真係化得太行啦，整到ｄ衫污糟哂，你唔比人試又好難買得出ｄ衫，咪唯有咁囉。