食物銀行

愛民邨粥檔老闆派粥比老人家既善舉，相信感動左好多人。連日來，不停有人損錢損食物去幫襯加油打氣，真係人間有情。

老闆，真係好野！


其實我地如果想幫助有需要既人，其實仲可以考慮直接向食物銀行捐款。

其中一間，係聖雅各福群會既既眾饍坊。

眾饍坊只會接受由團體轉介，證明真係有需要既非綜援的低收入家庭、失業、家庭遇突變的家庭、露宿者、「五無」人士。佢地會乜野叫做五無人士呢，就係即無強積金、無退稅、無老人金、無兒童及無直接交電費的人士。

香港今次又威到盡啦，香港既貧富懸殊係亞洲第一，堅尼系數０．５３３！除左老人家之外，在職貧窮係另一個問題，佢地唔想攤大手板同政府攞綜緩，但係真係窮到無錢開飯，如果等特首出手，掟多一籮蕉都無用，靠曾蔭權真係等到餓死都未等到啦！

捐款可以下載表格之後去7-11比錢，寄返收據比佢之後，除左有正式收條等你可以退稅，仲會送一隻靚靚水杯比你添呀！

回購兩隧．范鴻齡下台

因為中信泰富一已私利，抬高西隧同東隧既價錢，搞到紅隧永世都塞車，依家佢個公主抄Accumulator爆煲，要努力撲水，分分鍾要賤買大倉行，咁，點解唔可以在依個時候政府買返兩條隧道？？？

仲有，范鴻齡仲有乜野面目留在行政會？依家佢間公司蝕左足足155億，唔係活性乳酸菌喎，係港幣喎，如果佢係日本人，就應該９０度鞠躬，頭頂個轉對住鏡頭足足一分鍾來比人影像啦。我懷疑范生既能力喎（操守都懷疑），佢有乜野資格在行政會為香港人做決定先？

而且，成個范鴻齡坐在度，行會點傾回覆兩隧先？

范鴻齡，無謂再戀棧權位啦，自己返去中信執返ｄ蘇州啦！

大撒把

在古時，古代到仲有影藝戲院既年代，我破天荒第一次…自己一個人睇戲，睇左一部叫「大撒把」既戲（因為無人肯倍我睇）。

依部係大陸戲，馮小剛導演，仲有葛優做男主角。葛優雖然唔靚仔，但係好戲，仲可以好cute。

大撒把係北京話，佢地踩單車技術好高，勁到可以放開兩隻手來落斜，咁就叫大撒把啦！

嘩，舉高雙手來落長命斜，咁未十足飛一樣？依個境界真係高。


我之後呢，有一次同朋友去北海道自由行，旅遊書話美瑛既道路只係有「暗斜」，建議有時間（又唔識渣車）既人可以試下踩單車遊美瑛，仲有一條畫得好精美既「美瑛花花單車路線圖」。咁我地竟然咁岩四個人都識踩單車，又想趁大家都仲未係好老，都叫做踩得郁時候，就決定豁出去，一於踩單車！

點知，租左單車之後，一出到去就發現出事，什麼「暗斜」呀！佢果度根本就無平地，唔係上斜就係落斜，一座座全部都係山，ｄ長命斜長到呢，真係可以天比高，一條落斜就可以落你幾分鍾，上斜就更加唔駛講，轉gear都無用，踩兩步就開始無力，要落地推...

好在我地有號稱人肉GPS既方向王在度，全程都係靠佢睇地圖指路，一到分义路就大家都會等佢指示。Well，不過因為太攰，所以佢指我地落斜時大家就一枝箭咁衝落山，但係佢一話係要上斜呢，我就立時會質疑佢！！！！...有冇搞錯又係上！

嗯，踩到半路，仲要...唉...有我雨女在度...仲有乜野呀，落雨囉！

唉，咁樣日晒雨淋地上長命斜，真係為乜呢？

但係，藍天白雲綠草地真係好靚，因為做運動呼吸到好多清新空氣，落完雨之後仲有淡淡草木香氣。我地仲去到拍Mild Seven廣告既幾棵樹，仲有好多好得意既草，毛絨絨咁十足貓尾。仲有好好心既ｄ本地人呢，見我一枝二枝地插左ｄ細細枝貓尾草在背囊，就比左我幾枝好大棵既草呀！

其實落斜雖然舒服過上斜，但係落斜其實都幾驚嫁。你一落去就會越來越快，ｄ風呼呼咁吹，你就會越來越驚，哇會唔會車毁人亡嫁，我又唔係北京人，踩單車唔係好叻咋喎。在恐懼既時候，個人就係特別清醒既，我呢，會好大力地捉住兩個扶手，我如果一捉唔穏就會跌嫁啦！

到再快少少呢，我就會開始踩break。踩break呢係要有技巧既，一下子大力踩落去一定會炒車，所以，我次次落斜，都會忍忍忍忍忍一陣，直接快到我真係好驚，個軚已經開始捉唔實先至會開始踩break。

到左下午，食飽午飯之後，有氣力，我呢，終於揾左條唔係好長既斜，由頭到尾無踩break，一直向下衝....

好驚！但係，依個一於同你死過，乜都唔諗，只係全心全力踩單車，只係感受好涷好涷既風吹到自己對手疆晒...好爽呀！！

真係Free Faaaaaaaaaaalliiiiiiiiiiinnnnnnnnnnnggggggggg呀！


唔知，有朝一日，我會唔會真係夠膽，可以放手，完全豁出去，來個「大撒把」呢？

開不了心

(張相同內容無關，不過我喜歡）

（From:無常哥哥）

一想起再累也是要做人　我的思緒便繃緊
誰又要大家比我還擔心　胡亂地鼓勵人
一想起往日某段抱憾　不要用笑話迫我暫時興奮
難道怕我一不快便輕生　輪流伴我談心　放心


不開心就不開心　也別勉強的慰問
但求隨著我的心　灑脫地尊重我的傷感
別要 不開心便找開心　去避過我的良心
消化憂鬱後　才令我拾回自信心


一想起戰亂破壞了文明　我怎可以沒知覺
告訴我幸好這裡沒飢荒　難道便可快樂
一想起我們有話要講　未曾被聽見便閉幕
猶幸我愛惜這個地方　仍然盛放


不開心就不開心　也別勉強的慰問
但求隨著我的心　灑脫地尊重我的傷感
別要 不開心便找開心　去避過我的良心
消化憂鬱後　才令我拾回自信心


不開心便找醫生　吃藥吃到不會恨
但求藍調更興奮　迫我大笑情況更傷感
不開心未必不堪　快樂也要找原因
一瞬間低落　然後我自然又再生

最後塵埃跌定　我便會翻生

***
林夕呢，果然係由焦慮憂鬱地獄爬返上來既人。唔係有自己親身既經歷，又點能夠寫出咁樣既歌詞呢？

有時候，我地會對自己有太多既要求，我地會要求自己名成利就、朋友滿天下，甚至會要求自己一定要時時都pleasant, cheerful，在人面前唔可以鼓埋泡腮，唔可以唔開心。

點解唔比人唔開心姐？開心唔需要原因，唔開心都一樣。

唔開心係唔需要考牌攞資格囉。

比如有好似哥哥咁，靚仔有錢有愛佢既fans同男朋友，但係，佢都係唔開心。

比如林夕咁，年年攞奬才氣迫人，佢都係唔開心。

有ｄ笑話講話去睇心理醫生既都係闊太，講到好似闊太咁有錢，就無資格唔開心。咁講，係咪真係覺等於講有錢大晒，有錢就無得唔開心呢？

唔開心依個事實，係一個人自己最清楚既，亦係實實在在既感覺，外人唔可能講話「你無理由唔開心喎」。而當事人呢，如果佢唔承認自己感覺，甚至因為自己唔開心而覺得抱歉，咁只會令自己心情一直一直沈落去。


有時，唔開心，就由佢唔開心。

都係無謂迫自己點樣振作，點樣cheer up。接受自己依一刻就係唔開心嫁啦，唔開心犯法嫁咩？不如，真係感受一下唔開心既感覺，嗯，原來就係如此酸酸楚楚既滋味。

當心情終於觸底，就會反彈，「一瞬間低落　然後我自然又再生　最後塵埃跌定　我便會翻生」。

冬甩佬

記得Freakonomics入面既冬甩佬嗎？佢本來打份政府工，在一次改組之後，佢決定提早退休，轉行在紐約賣冬甩。


佢無開鋪頭，而係每日一早送一籃冬甩去各大寫字樓，然後再擺低一個錢箱，采取良心制，等人食左冬用之後自動自覺放返一蚊錢落錢箱；冬甩佬讀經濟，本身係一個數怪，所以佢由第一日開始就記錄低每一日擺低幾多冬甩、食剩幾多，又收返幾多錢。佢每星期送８４００個冬甩去１４０間公司．．．咁佢每一日既記錄，就變成依ｄ公司既「誠實指標」。

依個誠實指標都有好多有趣既Pattern，比如，佢發現高級職員樓層既回收率一定低過普通職員既樓層，嘿，到底係個人升左所以開始唔誠實，定係因為佢地唔誠實先有得升呢？記住個故事發生紐約...你有冇諗起Enron、WorldCom同Tyco？

仲有呢，越多人既公司，個回收率反而會低喎。依個現象表面上來睇好奇怪，明明人越多，你比人見到你食野唔比錢既機會就越高，點解人少少既公司仔，ｄ人反而比較老實ｄ肯比錢呢？有個理論係，因為人少少，所以大家之間既bonding更強，好似你住在一個小村落咁，人人你都識，個個都認得你，你自然會因為有羞恥心而behave一ｄ。但係你如果在一個幾百人既環境之中，咁，個人就只係蒼海一栗，就無左依個力量lu...如果咁講，高級職員既樓層就更加過份啦，因為高級職員既房都大ｄ，佢地果層一定少人ｄ嫁喎。

回收率呢，仲會隨住大時大節而波動。有ｄ節日會令回收率升高，但有ｄ節日反而會令回收率下降喎。比如在勞動節、國慶之前，人人因為有假放而心情輕鬆，就唔會想扼東甩佬果１蚊美金，回收率就自然高。但係在一ｄ鬼佬大節比如復活節、聖誕節、感恩節，人人忙於準備過節，又要揾人來倍自己過節，壓力大，仲有人反而覺得更寂寞，所以，回收率會跌......估唔到，大節之前，唔開心既人反而多左...仲有，唔駛問阿貴，情人節前一定大跌。

天氣呢，亦都對回收率有直接既影響。如果天氣出奇地宜人呢，食客就會誠實ｄ；但係如果天要下雨啦喎，阿東甩佬就倒霉啦！

咁，估下冬甩佬平均可以收返幾多錢？係87%。而在九一一之後，升左2%而無再跌過。

雖然，打開報紙你見到依個世界上有人偷有人搶有人殺人放火姦淫虜掠背信棄義，但係，報紙無講既係，絶大部份人都係誠實既。

起碼，有89%既人係誠實既。