2008年8月8日 星期五

雜雜想

實情,今次係我第一次睇晒成個奧運開幕典禮,連長到嘔,204個國家運動員進場都有睇。我呢,仲未搞清楚十二碼係乜,不嬲唔係點睇運動比賽。


很喜歡畫軸既概念,打開一軸軸畫來講故事;仲有十足matrix既活字印刷,拼出不同既「和」字。不過中國既文化歷史實在太多太豐富啦吧,只可以樣樣講dd。而且,有冇搞錯,崑曲表現時,竟然用古箏來伴奏...咪玩啦!...唔駛急,中國絶對仲會再舉辦奧運既,唔駛真係將五千歷史壓縮在一個鍾頭內講晒。


運動入場時,你會見到富國與窮國既分別,加拿大有幾多人口?但派出三百幾個運動員,仲要上次只係攞到幾個奬牌。而窮國呢,小貓三四隻,國家名都未聽過,要評論人介紹,依個國家在非洲或者係太平洋小島。

運動員入場時,我一直在留意,有冇國家係只有一個運動員呢?真係有,坦桑尼亞。


一個人的奧林匹克會下星期在香港上畫,1932年,中國當時都已經有幾億人口了吧,只有一個人,孤獨的奧運會,好似好好睇呢。劉長春在日佔時期差d比日本人老屈要代表偽滿州國出席奧運,搞到要流亡海外,坐廿幾日船先去到洛杉磯單刀赴會,但係旅程太辛苦,體力不繼而攞唔到奬牌。

唉,比人踩到上心口就係咁。

到1984年,已經十億人口既中國,先至有射擊手許海峰羸到第一面金牌。哇,搞到要1984年前至有零的突破,真係估唔到咁遲!

今年2008,體操王子李寧在北京代身男版飛天,以Skywalker姿態點燃聖火。王子雖然有小小啤酒肚,頭髮又有d稀疏,但係,仍然寶刀未老,吊住威也圍住鳥巢跑咁大個圏都一樣係咁瀟灑有型。對於李寧,我最記得既唔係佢勝利時既風采,而係佢失手在吊環跌下來,仍然燦爛既笑容。

百年蒼桑,人間冷暖。


不過蒼桑既不只中國,在栢林奧運會時,希特拉一心認為優良人種阿里安人一定可以嬴田徑項目,結果呢,比美國既黑人運動員Jesse Owens嬴男子一百、男子二百、跳遠同男子4x100接力,一個希特拉心中只配做奴隸既低賤種族,嬴晒高貴優種德國選手,恨恨地傷了希特拉脆弱既ego,搞到依個小家種,在眾目睽睽仲要有電視錄影之下,唔肯同Jesse Owens握手,傳為千年笑柄,哈哈,很爽。



如果真係有同一個夢想,就是和平吧。

不如一齊放和平鴿啦。

9 則留言:

s-pig 提到...

Samsara姐姐,

你真係講得好好呀...
真係好似睇左一個濃縮既中國歷史文化encyclopedia咁...好豐富呀!

Juicy Runners 提到...

Good...

學 霖 山 莊 提到...

偷書賊都是以, 後Jesse Owens的背景來寫德國平民的故事...

一小撮人嘅權力慾,
每每惹來生靈塗炭...

Anyway, 記唔記得個放鴿手勢點做...

Gideon 提到...

加拿大其實好鬼窮架喎,不過佢地有一個好有趣既信念,就係國家借錢人民享福,諗諗下都幾醒,即係國家今日借錯起大學鋪路撘橋,然後我個仔同埋我個孫一齊還。咁佢地有較好既環境成長,應該就較有能力還債。係咪好過癮?

匿名 提到...

sasa
我都係第一次坐定定

et

Samsara 提到...

小豬妹妹:多謝,其實我呢,係睇運動員進場太悶,忍唔住一心二用上網揾資料寫blog啦,哈!

On Dog哥哥:好爛呀...Job!

學霖哥哥:
>>一小撮人嘅權力慾,
每每惹來生靈塗炭...

唉,估唔到奧運開幕當日俄羅斯同格魯格亞已經打起上來,普京仲直接由北京飛過去指揮...

鎚呀鎚:咁我係將加拿大同坦桑尼亞比...如果貧富唔係懸殊得咁緊要就好囉。

ET姐姐:係呀,我越來越無耐性睇電視,連一集半個鍾既肥皂劇都睇唔完,今次睇足四個鍾,破晒記錄。

匿名 提到...

Sam,

我又有時間上您個blog啦!無錯又要重新找工啦!放心心情已平服了\0^0/。庸人不自擾(亦不懂自我反醒)。

我無即時看直播,在youtub看片。特別是在今天聽到新彊的新聞後,令我對升國旗那段(一班小朋友帶國旗)比較心傷,世界真的可以大同(孔子提出的)嗎?

另外,我要對所有參與演出的人,表示讚賞,特別是集體操及活字表演。

無聊的
麥太

Morca 提到...

好鬼"吳宇森"...

K 提到...

成個奧運開幕典禮好有電影感覺, 同埋點聖火真係好震撼。

尤係集體操及活字表演, 以及李寧點聖火, 我相信下屆辦的倫敦真係頭痕哩!

仲有, 唔駛買鴿都可以放和平鴿, 真係環保又節儉, 一絕!

遺憾的係奧運開幕當日, 俄羅斯同格魯格亞停火無耐又打過, 和平係咪真係要戰鬥到最後至有呢?

學霖哥哥:我記得點做"放和平鴿", 但係無webcam, 幫唔到您, sorry!