2008年4月25日 星期五

貧窮

貧窮係未真係離我地咁遠,一定要好似劉喜玲咁,去貧民窟度訪問小朋友先揾到?

其實,貧窮真係就在你身邊,只差到你有冇心去留意。

我上年剛去依家間公司時,同老闆攞到d錢去做Team Builing,同妹妹一齊去海洋公園。爛Gag女皇超緊張,不停地問要準備乜野。去到時,佢唔知道海洋公園分上下兩層,唔知道海洋公園曾經有集古村、水上樂園,未聽過海威...佢唔係從來未去過海洋公園,就係上次去時好細個,唔記得晒。

爛Gag女皇係土生土長香港人,只有二十歲。

唔心痛就係叻你既,我知未去過海洋公園、廿幾歲先第一次搭飛機無乜大不了,我地既年代大把人係咁啦;但係社會一直富裕進步呀聽講,我點可以要求一個生於八十年代未既女孩子過我依d老鬼既童年生活呢,做乜貧富懸殊得咁緊要。


阿Eason問,你見到阿婆推住一車既紙皮在街上行時,有冇問候下佢?

問候?我之前在上環依個舊區返工時,經常見到婆仔執紙皮,有一次食lunch後,在唐樓既樓梯口見到有個婆仔放左一大堆紙皮在車仔,好努力地拖上樓,我終於鼓起勇氣,幫阿婆在樓梯下面託住車仔,結果婆仔正在發力時突然車仔輕左,差d失去平均,見到我依個不速之客,係好惡地鬧左我一餐。

個問題唔係問唔問候呀嘛,就算要幫,都要用岩辦法,如果唔係,只係嚇親阿婆兼激嬲佢,只會好心做壞事。


好多時候,現實係令人難受既;特別係赤裸裸既現實,特別係當你將佢地既生活同自己比較時。
面對d咁雖以忍受既現實時,只可以化為怒火。

點解你唔讀書?我細個時都窮,依家讀到書揾到野做,未有錢囉,我得你做乜唔得?

點解你後生揾到時唔蓄錢,依家搞到臨老唔過得世?

香港有綜援嫁喎,你自己衰好啦,做乜搞到d細路要跟你一齊捱?咁叫有骨氣咩?係On居咋!


我明,真係令人好無力難過,但卻始終係現實;而且,要知道香港人已經係衰極都仲有個譜;在世界仲有好多人係要挨餓,無乾淨水飲,無厕所用...

我地可以選擇唔聽唔睇唔理,又或者嘗試睇下自己可以做到d乜,唔一定有d乜野成效,而且九成九只會加深自己既無力感添。無乜野道德高地值價判斷,只係個人既選擇。

又諗起依個我當年開blog第一個post上面擺既依條Thread,難得時不時有人推下佢,仲未沈。

2008年4月24日 星期四

窮人的銀行家(五)點解只借錢比女人?

Grameen最先借款時係主要借比男人既,在孟加拉依個超級重男輕女既保守回教國家,男人係一家之主,手執財政大權,借比男人係好正常既決定;但Dr Yunus好快發現應該借比女人先岩。

依個真係超級反傳統,在孟加拉,莫講話窮女人,就算有錢女人都好難借到錢,銀行會要求女人帶埋佢老公來一齊借錢,佢地根本唔相信女人有獨立理財能力。Dr Yunus決定要借錢比女人,唔單止為左兩性平等咁簡單,佢發現借錢比女人對社會影響更大更快。

在孟加拉,女人承受既窮困同饑餓比男人大得多。母親係在在一家人食完飯之後先可以食既,如果有人要挨餓,一定係母親挨。男人仲隨時可以休妻,只要連續講三次:「我要休妳、我要休妳、我要休妳」就搞惦,連寫休書同羅列七出之罪都唔駛,方便過中國男人好多,女人被拋棄後,只能自生自滅。因為萬惡既Dowry比得唔夠,令到丈夫不悅而被虐待至死既女人不知凡幾,亦無人覺得有乜問題,警察亦唔會理。女人承受既痛苦,亦都可以在孟加拉人平均壽命既統計數字中睇出,孟加拉女人既平均壽命係短過男人既,女人明明天生就長命過男人,男人長命過女人依個情況在全世界都絕無謹有,孟加拉女人生活之困苦可見一班。

因為受苦太深,孟加拉女人要爬出窮困深淵既決心,比男人大得多。而當有任何機會時,女人既表現,比男人大為優勝。女人有強烈既動力要建立安全感---財政安全感。

另一方面,當借完錢做既小手工買賣揾到錢後,男人傾向將d錢駛到自己身上,Dr Yunus稱之為"Enjoy himself",即係嫖賭飲吹既上下;但當女人揾到錢時,佢地會立即將錢用在孩子身上,改善下一代既飲食健康教育。要脫貧,就係要切斷隔代貧窮,既然借錢比女人有咁多好處,仲點解要借錢比男人?所以Dr Yunus決定Grmeen只借錢比女人,到左依家,Grameen既借款人都仲係97%女人,在孟加拉依個地方真係非常唔容易做到......請拍手!




(待續)

窮人的銀行家(四)非一般的銀行運作

借貸生意要成功,第一件事係要d人有借有還。聽過有人講話Grameen Bank之所以可以保持98 - 99%還款率,係因為孟加拉人講信用,如果在中國就無可能云云....嘿,咁講既人肯定從來未接觸過孟加拉人。

孟加拉人出名走數既!我從來無聽過有任何香港公司肯比孟加拉公司一毫子Credit,佢地係會用任何方法來走你數,就算係好少錢,佢都一樣唔找,直至你hold左佢account,下次佢無辦法,一定要來你公司訂貨,你扣住唔肯出貨,佢地先會乖乖地找左上次同今次既數。抱歉咁樣講全孟加拉既人民,但孟加拉人既信譽,真係超低。

Dr Yanus當然唔會唔知道依樣野,佢仲好仔細地硏究孟加拉銀行既借款流程,發現銀行都係要求借款人要一筆過還晒d錢,一下子攞出咁大筆錢出來,在心理上會好肉痛,就算有錢還都會諗盡方法拖延,拖拖下就會變左唔還。所以在設計Grameen Bank既Mirco Credit時,Dr Yanus為左克服肉赤依個問題,決定要借款人日日都還錢,每日還少少,唔肉痛仲會養成習慣,所以要還365taka,就要一日還1taka。之後發現日日收錢實在太麻煩同行政費用太高,改為每個禮拜還錢,實行到依家;而且由於個個星期收錢,如果有人還唔到既話,Grameen亦都立時可以發現問題,睇下可以點幫手,執行上成為:

1.一年借貸
2.每個星期攤還
3.借款後第一個星期開始還款
4.利息固定為20% pa

另外,佢地發現一支竹仔易折彎,幾支竹仔斷折難既道理,所以並唔接受個人借貸,要借錢既話,借款人一定要揾到五個人組成一組,最先只有兩個人可以借款,到依兩個人可以連續六個星期都成功準時還款,其他人先可以開始借錢。原因係個人借錢時,佢一個人要承受所有風險,個人行為亦會比較飄忽不定;但團隊就可以互相支援,同中和難以預料既行為。而依d團隊亦無形向各人產生朋輩壓力,要佢地準時還款。到左今日,當有調查問到Grameen借款人點解佢地會準時還錢,最重要既原因就係佢地唔可以令自己既組員失望。

仲有既係,任何組員要借貸之前,一點要得到其他所有組員既批准,依個一來令到佢地可以互相硏討,諗到最好既辦法賺錢。Grameen深相窮人在咁惡劣既環境仍然可以生存既依個事實,已經係佢地能力既最佳證明,佢地先係最有創意最了解自己本地情況既人,所以Grameen從來唔會干涉窮人借左錢來點用,甚至當女人們走過去問Grameen員工應該點用錢好,佢地員工既訓練係會答話,「你知啦,我地好蠢嫁,就係唔知點用d錢先至會借錢比你地,我地Grameen就有大把錢,等你地諗到點樣用時我地就會借比你。」

由於點樣用錢係五個人共同硏究出來,質素相對有保證,而又由於係大家共同批准時Joint Decision,當一個組員有困難時,其他人都覺得自己有義務幫忙,互相扶持之下,共同渡過難關。

還款率高達98%喎!因為咁,Grameen Bank可以自給自足,甚至仲有盈利;因為咁,Grameen Bank既人唔需要分出人手來做籌款,可以專心做好扶貧工作;因為咁,Grameen Bank有穏定可靠既收入;因為咁,Grameen Bank可以做到一系列既社會企業。

窮人的銀行家(三)一個女人的故事

Ammajan Amina係其中一個最早既Grameen借貸人,佢既故事可以講到Micro-credit點樣幫到一個街頭乞丐。

Ammajan有六個孩子,四個因為饑餓或疾病而早夭,只剩下兩個女兒在生。佢既丈夫年齡大過佢好多,病得好緊要,Ammajan不繼變賣家產來幫佢丈夫治病。當佢丈夫過世時,只剩下佢地住緊既屋比Ammajan,佢既叔仔想趕走左佢同小孩,霸佔間屋,但Ammajan唔肯走。

佢每日都整d蛋糕餅干逐家逐戶去賣,賺一點錢維生。有一日佢返到屋企時,發現佢叔仔拆左佢個鐵皮屋頂去賣。無左屋頂,又到左孟加拉既雨季,Ammajan太窮亦無錢再整餅干來賣,佢只有行乞。

有一日佢返到屋企時發現因為佢已經無頂,大雨吹倒左佢屋企,Ammajan發瘋地找佢兩個女兒,發現大女兒已經被壓死。

當Dr Yunus既學生發現Ammajan時,佢抱住自己唯一剩下既女兒,饑餓、心碎、絶望。

任何銀行甚至大耳loan都唔會借錢比佢,但憑住Grameen既借款,Ammajan活過來,用借來既錢整竹簍來賣,佢既女兒而家係Grameen既成員。

直至2008年,Grameen有730萬個借款人,有730萬個唔同既故仔。

窮人的銀行家(二)鄉村銀行是如何建立的

咁,點幫呢?

Dr Yunus首先去走訪農村,想揾出佢地貧窮既原因,有一個叫做Sufiya Begum既村婦解答左Dr Yunus既疑問。

好似好多當地村民一樣,Sufiya同佢丈夫及小孩住在一間漏晒水既泥屋,佢丈夫做散工,一日只賺到幾亳子美金,仲要唔係日日有工開。為左揾食,Sufiya在屋企手編竹凳,d竹凳好漂亮實用,但係,Sufiya既辛勞工作並唔能夠令佢一家脫貧。

點解?因為Sufiya無錢買做竹凳既原料---竹枝,佢唯有向佢村入面既大耳loan借錢,大耳loan唔單止利息高,仲有一個好苛刻既條件,要借錢既話,Sufiya既竹凳只可以賣比大耳loan,價錢隨大耳loan喜歡而訂價...大耳loan當然好識做Profit Maximization,務求令到Sufiya每日只有幾毫子收入,吊住佢條命,餓唔死繼續做依種奴隸工作就好。

Dr Yunus知道竟然係因為d咁既原因令到Jobra入面有咁多窮人永無翻身之日,真係嬲到震,亦都唔敢相信信今時今日仲有d咁樣既吸血鬼存在。Dr Yunus同一個學生收集在Jobra到底仲有幾多個大耳loan既受害者,結果一共係42個人,總共欠耳loan...估下幾多錢?856 taka...既係USD 27。

只係港幣200蚊就令到42個家庭永世活在貧窮既無間地獄!!!Dr Yunus即刻攞出兩舊水比佢地,佢當時都無諗過要佢地還,只係想做自己應該做既事。Dr Yunus亦都做唔到依兩舊水可以帶比42個家庭咁大既歡樂,佢地既喜悅令Dr Yunus決定要繼續做落去,既然依d借款可以切中要害,真正有效地幫到窮人,點解唔做多d?

咁Dr Yunus佢老豆又唔係李+x,無可能攞出大舊大舊錢來幫村民贖身嫁。Dr Yunus於是走去孟加拉一間政府銀行,想幫村民借錢...well,你都可以想像銀行會有乜野反應嫁啦!借錢比d一文不明既窮人?...無抵押!!!...嚘,每個人借幾蚊至幾十蚊美金?咁少?...要填FORM嫁喎,吓?佢地連自己個名都唔識寫!!!

如果Dr Yunus唔係一個有頭有面既大學教授,可能晨早比人當係傻佬咁掟出去。

咁,Dr Yunus唔係善男信女,更加唔係一個輕易放棄既人。足足搞左六個月之後,在1976年12月,最後係由Dr Yunus作擔保人,由佢d學生幫村民填FORM,咁先可以開始幫村民向銀行借款。

Dr Yunus覺得,銀行既體制完全將窮人拒於門外,令佢地變成Financial Untouchable!但係,依班Untouchable竟然唔止Touchable,仲係Huggable!!!佢地既還款率,竟然高達98%!因為窮人深深知道,要脫貧,依個係佢地既唯一機會,佢地拼了老命,都要還到錢,咁先可以再借一次錢,令自己遠遠逃離貧窮既深淵。

睇下Dr Yunus佢自己點講:

2008年4月19日 星期六

窮人的銀行家(一)Dr Yunus

Dr Muhammad Yunus,孟加拉人,2006年諾貝爾和平奬得主,對人類和平既主要貢獻,係設立Grameen Bank(鄉村銀行),專門向窮人借貸(Micro-credit)既窮人的銀行家

Dr Yunus生於1940年East Bengal,在十四個兄弟姊妹中排行第三,在孟加拉接受教育,攞到奬學金去美國讀PhD。1971年,孟加拉在九個月既獨立戰爭中勝利,脫離巴基斯坦立國。1972年,Dr Yunus由美國回到孟加拉,在Chittagong University任教,打算在學術方面為建設祖國作出貢獻。

Well,人生往往有出乎意料既轉折,1974-5年,孟加拉發生近代最嚴重既全國大饑荒。

饑荒既貧民由鄉村湧入城市,乞求一點糧食。佢地並無(力氣)大吵大鬧,遊行示威,而係靜靜地乞食,靜靜地挨餓,靜靜地餓死。

睇住街頭廋骨如柴既饑民...甚至屍體,Dr Yunus覺得自己唔可以再留在舒適既象牙塔中,教授Elegant既經濟理論,同在黑板上畫著完美既供求既大交义;佢組織學生走出校園,到大學附近既鄉村,睇下點解自己既祖國會搞成咁,有d乜野可以幫助到窮人。

Dr Yunus第一個Project係在附近既農村Jobra搞水利工程。雖然提高農作物收成,但Dr Yunus並唔滿意,佢發現,水利工程只幫到擁有農地既貧窮農民,但係幫唔到更窮既、連立錐之地都無既村民。窮人都唔係鐵板一塊,之中仲可以再細分擁有一小塊農地或者夠錢租地既農民;同埋再窮d既「屋無半片瓦,缸無半柆米」既赤貧人民。

咁佢地點樣維生呢?做散工、做手工藝品、乞食。令Dr Yunus印象深刻既係,有一次稻米收成時,農民請左好多女人來做散工幫助打谷,Dr Yunus見到依d女人迫在打谷車上,拼命地踏車,雙手青筋畢露地捉住扶手保持平衡,又你推我ong地希望迫去比較有利既位置,可以無咁攰,為左霸好位佢地日日鬥早起身去返工。嫌辛苦?妳唔願做大把人爭住做,女人們其實好開心可以散工做,今日有工開即係今日有錢,家中既孩子可以開飯。

Dr Yunus望住佢地依種有如牲畜地做苦工既女人,腦中閃出兩個字:奴隸!

要幫,就要幫窮人中既窮人。

2008年4月16日 星期三

無聊野時間

在腦汁用盡,火滾如食左炸藥既時候,最好係講無聊野。


公司妹妹潮童攞左盒傳聞中既香港潮語學習字卡返來,潮童係邊個?未就係好想買紫色素菲果位狂野小姐囉。又,素菲已經比人買左lu,不過潮童睇中第二架銀色既Stephen。


一攞出來,爛gag女皇就老作多個潮語:Oct Cut Vege....


負責我地公司IT Support既電車M哥哥下午來到我地office,為左洗刷佢之前同其他電車連線失敗,同埋IP搬到天一半地一半既失威紀錄,電車M竟然破天荒.............Gel頭


Oh no!實在d gel可能唔駛錢,一見到電車M,唔係以為出面落雨,就係以為電車M為下年渣打馬拉松練緊跑。


咁就當然要在傳聞中既香港潮語學習字卡之中,抽返張"KEI"字卡比電車M啦!


依套傳聞中既香港潮語學習字卡始終唔夠潮,連電車依張卡都無,下次出加強版時,一定要加返:


電車

英文: Tram

意思: IT Freak / Communication Handicap

例句:010101100010010010001100010011001010000001000000100100111111101010010100111010101010101010101000001101111010101010010101010100101010101

-完- 

*********
報告

電車M今日來到office,唔單止仲保持佢個wet look頭,仲終於換左佢個用左十年以上既backpack,竟然識用Porter斜揹袋。

雖然電車M死都唔認係有人幫佢買,但係以佢果種不知購物為何既性格,一定係有人終於睇唔過眼,捉住佢去買既!

電車M好幸福啊。

2008年4月4日 星期五

崑曲表演---湯顯祖

介紹及購票


有進念既加入,希望係會令部劇易睇左而唔係仲難明啦,崑曲,真係好靚好聽好優雅嫁。


湯顯祖係邊個?佢既來頭就勁囉,係明萬曆年間既進士,因為佢個人實在太正直啦,唔肯埋堆又夠膽犯顏直諫,一生仕途坎坷,最後頂唔住官場黑暗,四十八歲時放低辭職信就走左,真係正宗既劈炮唔撈,回鄉專心從事自己熱愛既崑曲創作。


佢既代表作,首推牡丹亭,此劇一炮而紅,當時走去睇牡丹亭既盛況,簡直係萬人空巷,湯顯祖可以在自己有生之年能夠見到自己成功,相信都老懷安慰。巧合既係,湯顯祖同莎士比亞係同一年代,仲要係同一年1616年死,究竟湯顯祖係東方既莎士比亞,定莎士比亞係西方既湯顯祖?

湯顯祖雖然失意於世途,但正因為如此,佢可以將所有時間精神用在戲曲創作之中,成就一代大文豪,人生既得失,其實都係絲絲緊扣,一體兩面。想湯顯祖寫牡丹亭時,真正發揮自己既天才,一定會開心過做官時...掛。


湯顯祖份人咁有型反叛,所以牡丹亭個故仔其實十分之咁YEAH同勁爆!話說南宗年間南安太守既女兒杜麗娘有一日在花園中遊玩後睡著,夢中與一名年輕書生柳夢梅在夢中相遇,共墬愛河...哇,依一出牡丹亭之遊園驚夢,講得白d,其實係夢中幽會喎,五百年前講一個咁樣既愛情故事,真夠疆!

個故仔仲好長,真係要睇晒全劇既話要成九個鍾,之前由白先勇策劃既牡丹亭青春版,要分三晚來演。


中央電視台制作左一個八集既記錄片【崑曲六百年】,其中依一集就係講湯顯祖同牡丹亭:







什麼是「如花美眷,似水流年」?請在下面既片由第五分鍾開始看...睇啦睇啦,只要兩分鐘,真係美之極致。




「越優美的東西它越留不住,我們喜歡花,喜歡青春,但是喜歡的是真實的東西,而不是假花和冒充的青春。這些東西我們希望它永遠的美好,但它必須跟着它生命的過程,慢慢地結束。


崑曲,我想它也是這個樣子,我們留不住它,似水流年,像水這樣的過去了,我唱崑曲唱的很投入時,我父親曾很感慨地說:『你們是如花美眷,我呢,只剩下似水流年了。』...等我的學生唱得很好的時候,我也會很感慨很油然地說:『你們是如花美眷,多美呀,我呢,只剩下似水流年了,但是我不悲哀,水會這樣的流過去,藝術會傳下去,崑曲會永遠的美好下去。』」

2008年4月2日 星期三

電車

其實,人同電車既溝通真係十分困難,但係估唔到,電車同電車都係一樣溝通唔到。

何解兩部電車,會爭辯個device係router定firewall呢?又會問一個ip係咪由個WAN connect to LAN?咁,依舊黑色既野究竟係橙定蘋果,又點會有得拗嫁呢?

仲有
PING
MT
FE0/1
????????

什麼呀大佬!PING係咪撼頭埋牆果聲呀?

電車之間既問題,可唔可以電車自己解決呢?係都要夾小小在下在中間,我都唔知我問緊乜,亦都唔知答緊乜,係咪玩先?



上海既電車就仲攞命,不停地問我『貓』係邊...

貓???

結果係,Modem....................

又話我個LAN頭有事,什麼八盞燈之中三盞唔着,唔影響上網,但係又要fix喎....之但係,fix乜野先炸???


唔明。(句號,無尾音果隻)。