2009年1月20日 星期二

新春愉快

祝各位 :

平安健康

和喜吉祥

2009年1月19日 星期一

無常2

(係,我未講完,而且要趁過年前講埋佢。)

人生補時睇左未呢?

真係好睇嫁!

比你在死亡之前,無端端比你多幾個鍾頭會做乜?

幾年前,世界四大Audit Frim (Big 4)之一,KPMG既CEO Eugene O'Kelly在事業如日放中時,發現自己有腦瘤,只剩返三個月命。

作為一個超級數佬既CEO,佢第一件事係........改寫自己既Mission Statement....

仲要,決定寫一本書......

唉。

唔係好好地攬實老婆同女女,佢選擇同d人生關係圏中最最外圍既人道別先。既係,佢係首先揾d同事、Business Partner、客戶、同埋自從大學畢業之後都無聯絡過既room mate..........



好dry。



結果,佢唔夠時間同自己有如心肝寶貝既唯一親生女兒告別。

佢雖然有錢包晒機同個女去布拉格去一次靈性藝術之旅,但係,排到佢女兒既時候,佢身體已經好差,唔能夠旅行。佢亦唔知道點樣同一個只有十三歲既女兒講解死亡,點樣同佢道別。


依個係乜野決策失誤呢?

未就係排錯Priority,本末倒置囉!



而Eugene全本書都在度強調既Perfect Moment就更加令人揪心。

Eugene係在度壓縮人生,想在最後三個月之中,要更多更多更多更多更多更多更多既Perfect Moment。

條數點計?平日可能我地活一整年甚至好多年,前至有幾個鍾既Perfect Moment,但係Eugene努力地要在三個月之中,在與唔同既人話別時,活出無數咁多既perfect Moment,所以,就算佢只活三個月,但係都勝於其他人活好多年.......

依個,唉,就係到最後一刻時都放唔開囉。



反而,Eugene講佢接受治療時既過程,雖然唔係乜野「Perfect Moment」,但係比到佢另一層既體驗。

機只有一部,個個病人都要等,而且,個個都有錢,個個都願意比多多錢來換時間。


但係,人生唔係比你任揀既,依個世界亦都無義務要討你歡心。

大自然自有其法則,有生就自然有死。就好似花會開就會謝,太陽都會老,地球有朝一日會比老死既太陽吞食,連我地身處既宇宙,都好有可能會有塌縮既一天。

依d野,唔係話你唔喜歡就唔會發生,更加唔會因為你將個頭塞入去沙地入面,唔唔睇唔聽唔諗就會消失........要真正面對現實,先係最困難的。

在等部機既時候,Eugene發現,有人孤身一人,有人害怕,有人忿怒;而當部機又再次壞左既時候,全部人都一齊嘆氣失望.......

原來,有時候,我地唯一可以做既就係等待。



本來,Eugene在公司甚至整個政商界都舉足輕重,佢有如大海中既舵手,幾萬人跟佢揾食,佢一個決定一個策略,就決定好多人既幸福.........不過,Eugene病左,辭左工,KPMG運作如常。

當Eugene走左之後,係佢一生至愛既太太,幫佢完成本書。




Oh,仲有,Eugene亦都無時間同佢太太正式好好地道別。

無常

(依篇十分唔老黎,唔鍾意年尾流流睇埋d大吉利是既野勿看。)



滑完雪一返到office,收到消息,我地英國既Sales Manager星期五心臟病發過身。


我依個人,反應係有d慢,收到壞消息時,第一時間例牌係無感覺,要過一陣先至開始理解發生左乜野事。要坐低一陣,先至開始打冷陣。

佢先至四十幾歲...今個月頭佢先至寫email同我講Happy New Year, looking forward to work with you!...佢次次來香港都話想去西貢食海鮮,但係次次都搞搞下無去...佢上次返去英國前,我又同佢講下次我一定帶佢去食海鮮........

無下次lu。

=======

今次滑雪,我在應該跌既時候唔跌,唔應該跌既時候跌。

比d鬼咁狼死但係技術勁差玩snowboard既板仔揩到我都唔肯跌,但係返上實地行返酒店果下,就因為著住skiing boot而一下子跣到直。

跌倒果一刻,又係腦中一片空白,只知道自己坐左落地,跟住兩個手肘都hum落地,痛....跟住先至識驚,好在身體自動保護,跌倒時手肘先落地,如果唔係,就係後腦落地!

Well,我d Friend呢,竟然唔係立時扶起我,而係問:「你駛唔駛休息一下先!」

你睇!依d就係「朋友」啦。

佢地係見我躂得咁應,嚇親。

依條路係返酒既必經之路,無得唔行,但係我點都要換左鞋先至敢行囉。

雪嘛,還是會滑的,天曉得我仲有幾多時間,又有乜野事發生在我身上,點驚得咁多?

所謂既高危低危真係只係一個機會率而已,六合彩咁難中未一樣有人中!

以前聽過有個笑話,阿甲話,佢阿爸、阿爺、太爺、太太爺、太太太爺、太太太太爺....都係死在床上,所以阿甲唔敢訓在床.....

嘿,阿甲既袓先都幾好彩,個個都可以在床上同自己講拜拜,其實嘛,Life is uncertain,Death is certain,死亡可以發生在anytime, anywhere......


========

之前我聽一位六十幾歲既父親講,佢個仔次次出遠門前,佢都會攬佢,佢話:「梗係要攬啦,點知仲有冇得攬嫁!」

係喎,講得有道理,所以依排我每次出門前,都會去攬下阿媽,同埋呢,總要make sure我出門前最後講既一句說話係一句好既說話。

人生無常嘛。

又,如果我下下都記得人生無常,記得每一句說話都可能係我同其他人既最後一句說話,每一個email都可能係最後一個email...

咁....我諗我個人會好脾四一百倍。

2009年1月11日 星期日

Ajahn Brahm

我好鬼鍾意佢既Ajahn Brahm,佢個名其實係泰文來。有一次有人問佢個名點串,佢話:

我叫Brahm:
B - for Buddhism
R - for Roman Catholic
A - for Anglican
H - for Hindu
M - for Muslim

你真係無辦法唔鍾意Ajahn Brahm。

=========

Ajahn Brahm同其他法師都會落去學校,介紹佛教同佛法。有一次在街度有一班女學生同Ajahm Brahm打招呼。

Ajahn Brahm真係受寵若驚啦,問班女同學:「嘩,我不過來過你地學校一次,乜你地仲記得我既?」

女同學答:「梗係啦,我地點可能唔記得一個叫做BRA既和尚呀!」

2009年1月10日 星期六

Google..... Earth

係咪所有男人都鍾意Google Earth嫁呢?

我當年第一次見Google Earth係在個供應商度。果日已經舟車勞動,加上開會睇廠成日,累得賊死,只想快快去食飯,然後就返酒店訓啦!

但係,一直見供應商果兩個人在間房入面,神色凝重咁一直望住部電腦,而且不停指指點點個mon。心諗,一定係d好重要既野!都係唔好阻佢地。

但係佢地一直指左大半個鍾都未完,我就餓到打鼓...嗯,都係入去睇吓乜事。

結果,佢地睇緊Google Earth,電車甲正在揾緊佢鄉下比電車乙睇....................


==========

我英國來既大老細「阿爺」本來已經熄左notebook諗住走,等我又可以關門收工。但係同我講多兩句,講到位置問題,就立時打開個電腦袋裏面再攞出notebook,再上網,一定要上Google Earth來show比我睇。

跟住又順手show埋佢間大屋比我睇啦當然。




比老外寸我佢個toilet仲大過我成間屋我都慣左,但係大爺間屋真係大得緊要,佔左成個舊鎮差唔多一半!有齊網球場游泳池唔在講,佢仲有一片小森林,有好多樹,所以成日有松鼠、鹿、甚至狐狸走入佢花園。佢仲有個温室,種滿各式蔬菜,又有個小果園,有士多啤梨、Raspberry、黑嘉倫子同梨!聽到我流晒口水。

不過呢,佢話今年d松鼠偷食晒d士多啤梨,搞到佢無得食,佢好嬲喎。哈哈,乜個劇情咁似Peter Rabbit既?

不過佢最驚人既係,咁大地方,佢無揾人來清潔喎,就係佢老婆一個人做齊清潔煮飯園丁同農夫!佢老婆係香港人來喎!只係抺地都半條人命啦,真係佩服佩服。

不過諗諗下又明點解老板娘要自己一腳踼來照顧間大屋,佢在香港做慣野,一下子去到英國工又無得返,人都唔多個,做下家務同園丁都幾好。老板娘不嬲鍾意種野,依家有咁大塊田任佢玩,一定好開心!

=====

阿爺其實來香港都不過係巡視下業務,好鬼得閒,所以成日都會揾我傾計。佢實在係好博學,上至天文地理,下至歷史時事,樣樣都答到嗲,所以同佢傾計都幾好玩。咁,佢食鹽多過我食米嘛,又周遊列國,仲要好hill地講,佢第一次來香港時,我都仲未出世!佢又講流利法文,同埋跟佢老婆學少少廣東話,不過,佢老婆淨係教佢衰野,佢成日自稱「鬼佬」,又學齊「鬼婆」、「鬼妹」、「鬼仔」同「黑鬼」。

不過,我當然永遠都可以大到阿爺。比如我教佢寫「男」字,講佢知,男呢,就係「田」字加個「力」,即係男人本份就係要耕田做下苦力,依家無田耕就應該爭住來做粗重野!作為一個舊式英國紳士,佢---完。全。同。意。

佢呢,講起歐洲人,就個個都唔鍾意。我問佢,吓,乜你地英國人好似無乜人鍾意嫁呢?佢話,係嫁,佢地同個個歐洲國家都打過仗,同法國依個世仇打左廿幾次仗,德國兩三次,其他西班牙、葡萄牙,為左爭地盤唔知打左幾多次。仲有,佢最唔老黎既美國就打左一次。

嘿,咁就真係比晒位我潤佢,立時同佢講,係囉,果次英國衰左在Boston Tea Party嘛!

阿爺就即刻兜返,話果次其實係英國對法國。果時英國在海上打到法國一卜一look,法國為左損耗英國實力,就幫美國人獨立囉。但係打完依場仗之後,法國都搞到一窮二白,成為法國大革命既催化劑.......wow....歷史故仔真係好聽過小說!

阿爺又講佢地成個皇室都係來自德國,啊!唔怪之英女皇既所謂Queen English咁鬼難聽啦,明明鬼咁重口音,係都要話係標準英語發音喎。英國最搞笑係,仲試過有個皇帝(唔記左皇帝個名)係唔識講英文既!!!哈哈,英國皇帝只識講德文......

係囉,歐洲人種實在太似啦,以前歐洲d皇室仲要成日玩和親,d公主成日嫁去隔離國家,根本就係血統大兜亂...做乜鬼仲要分咁多國家,你唔妥我唔妥你呢?

有冇得,一個地球,只有一種地球人呢?

 

2009年1月7日 星期三

INTIFADA


張翠容在佢個Blog度,有好簡明地講返以巴千年既仇怨,有興趣了解多d既可以去睇睇。

而在近代之中,其中最令人震撼難忘,亦都前無古人既一段抗爭,就係發生在加沙同約旦河西岸巴勒斯坦人既貧民窟起義---INTIFADA

INTIFADA發生在1987-1993年,相信大家都有d印象,當時一d既新聞畫面:手無寸鐵既巴勒斯坦平民甚至小童向以軍掟石,以軍就真槍實彈開火還擊...

1987年,阿拉法突領導既巴勒斯坦解放陣線被趕離加沙,流亡突尼斯,而當時阿拉伯兄弟國又轉移視線,主要關注兩伊戰爭;以色列佔領左加沙同約旦河西岸,生活在以軍鐵腕下既巴勒斯坦貧民,無錢無政府無軍隊...十足孤兒仔。

巴勒斯坦人貧苦無依又極度忿怒,終於在1987年12月6日,因為一件交通意外,觸發巴勒斯坦人起義,長久壓抑既怒火一爆發,立時就在加沙同約旦河西岸既各大水小難民營爆發,成為長達六年既人民起義,稱為INTIFADA,又稱「石頭戰爭」。

INTIFADA係阿拉伯文,解做起義革命。

巴勒斯坦貧無立錐之地,乾脆拿出家中既菜刀斧頭,甚至乾脆在地上拾起石頭,掟向以色列軍隊,佢地衫都唔多件,更加唔駛諗有d乜野保護衣物,最多包左阿拉法特都會載住既黑白格仔頭巾,就咁就衝出去掟石。

以色列軍人個個荷槍實彈全副武裝,有齊盾牌頭盔飛機大炮坦克車,但係,佢地對掟石既巴勒斯坦人絶不手軟,一掟親佢,就一定會開熗,就算明明見到果個不過係一個細路仔,都照殺。但係巴基斯坦人已經氣瘋了,一個個前仆後繼,以血肉之軀同石頭,反抗以色列。

講真,上面貼既果張相,令我諗起六四時既王維林。


正式既統計係,有159名十六歲以下既小童因為掟石而被以軍射殺,數以萬計既巴勒斯坦人死傷。

太多太多既照片同影像,比世人見到小童同青年向以軍掟石之後,中槍倒在血泊之中。以色列同美國再有三寸不爛之舌,點都無得講佢地係「自衛」啦掛!

一個人民自發既Intifada抵抗運動,巴勒斯坦以血肉之軀成功喚醒全球各地既人民,到處都有人發起反戰示威,甚至擺買以色列貨。在強大既國際壓力之下,促使美國同以色列承認巴解陣線,開始談判。因為佢地,咁多年以來,第一次確立有朝一日依個世界有可能出現「巴勒斯坦國」。




之後既故事,唉,真係天意弄人,依個運動,正式叫做First Intifada。有得第一次,既係有第二次...

在First Intifada之後,以色列既温和派拉賓上台,主張用土地換和平,同意巴人自治,最終立國。拉賓同阿拉法特仲因為肯和解,在九四年一齊攞諾貝爾和平奬!

但係,拉賓在九五年被激進猶太人組織刺殺身亡;本來既和平希望又再一次幻滅。鷹派既內塔尼亞胡在九六年上台,以巴關係再次緊張,至於Second Intifada,又係另一個故事....



依個故事到底幾時先至可以寫到以巴終於和平共存,在依塊雙方宗教都認為係神聖既土地安居樂業呢?

2009年1月3日 星期六

戰無義戰

以色列打加沙,已經足足打左一個禮拜,連普天同慶、新年伊始既一月一日,都照樣血洗加沙。

我呢,朝朝都希望睇新聞時會報導停火,但到今日,以色列仍然瘋狂轟炸。

在武器強弱懸殊之下,以色列連婦孺醫院都唔放過,正如多次親身在巴勒斯坦采訪的記者張翠容所講,以色列咁既屠殺行為,係未行緊「國家恐怖主義」

最令人痛心疾首,係今次以色列既大規模殺戮,唔係因為什麼「自衛」或者報復哈馬斯,其實,只係因為以色列女外長列夫尼和國防部長巴拉克,為左今年來緊既大選鋪路。講來講去,列夫尼要做以色列總理!!!就係咁簡單,列夫尼依家瘋狂殺戮巴勒斯坦人,就係為左要籌集政治籌碼...

因為一己私利而殺人放火,政治之黑暗骯髒,今次都真係又一次證明,戰無義戰。

張翠容在香港土生土長,但係長期親身入戰場採訪,之前甚至採訪過阿拉法特。對於巴勒斯坦人的苦況有親身體驗,而對整個戰爭既成因都有好深入而獨到既觀察。張翠容既報導同評論,唔係一般其他報紙電視果d翻譯一下美聯社新聞既質素可比。我今日仲見到新聞在度沾沾自喜地報導,巴勒斯坦果d射程只有五十公里既火箭係中國製造....唔係d咁既野都要玩「大國掘起」嘛???

相比之下,張翠容既Blog真係好值得睇。

我同大家一樣,自有記憶以來,以色列同巴勒斯坦就一直打仗、停火、又打仗,試過有好多好多次和平路線圖,結果都係又打起上來收場。我地在香港做唔到乜野,但,起碼可以花一點時間,去了解到底依個猶如被咀咒之地,到底發生左乜野事。

2009年1月2日 星期五

春田花花士多啤梨

原來依家係士多啤梨當做既時候,好紅好甜,仲有d好鬼大粒既。

最好一摘左就既刻在田度食,好味!



我手震影唔到添,原來士多啤梨d花係白色既...仲有其他花花:








咁有爛無好爛既"IQ"題:
Q:綠豆雪條行行下街比人爆樽,咁佢會點呢?
(爆樽會點呢?估吓啦!)
(一頭血喎.........)
A:變成紅豆雪條。
======================
比題淺d既你啦:
Q:中國四大名著,邊本最好睇?

(四大名著係邊幾個先?)
(唔係粥粉麵飯丫!)
(既係紅樓,三國,西遊同埋水滸)
(唔係三國呀,電車!!!)
A:水滸...有成一百零八條好「看」咁多。
=========
無聊時段完畢。

2009年1月1日 星期四

2009

新一年係咪可以許願嫁?

咁我可唔可以好似環球小姐、世界小姐、香港小姐、亞洲小姐同華裔小姐....一樣:



世界和平