2009年6月13日 星期六

改革歷程 - 經濟改革

更多有關 改革歷程 的事情

依本書叫《改革歷程》,比起英文版Prisoner of the State貼題得多。當然外界對六四既部份最關心,趙紫陽亦都有詳細交代,但係由89年4月15日胡耀邦逝世至六四屠城一段只是近因,真正既導火線遠埋在80年改革開放時,所以,趙紫陽大部份篇幅都係講在文化大革命以後既經濟政治改革。

趙紫陽果然唔係一個空談既理論家,而係一步步實踐模索硏究而行出一條生路的總理,套佢既說話,就係,「模著石頭過河」,中國,一步一試之下,無好似東歐蘇聯行震撼經濟治療,在風高浪急下,今次力保不失,無在經濟上翻船... well,不過政治上進行對手無寸鐵既人民大屠殺,政治人權倒退....囉。

趙紫陽解釋點解需要貿易,係我有史以來睇過最簡淨有力而深刻既解說。趙講佢1978年去歐洲考察,去到法國南部,見到當地非常乾旱,成個夏天都唔落雨。根據中國既思維方式,咁既土地一定要大興水利來種糧食啦;但係法國人無咁做,佢地種比如葡萄依d耐旱既植物,再釀酒,農民生活非常富裕。

去到希臘既丘陵地區,又多山又乾旱,如果根據中國既想法,又會要開梯田同大修水利啦;但係希臘人無,而係在返原地種橄欖,榨橄欖油,農民生活好富裕。

點解佢地可以咁?因為佢地唔係封閉既經濟,可以靠對外貿易,賣左自己種既農作物,用賺返來既錢買自己所需既物品。

每處地方既天氣土壤都唔一樣,適合種既植物亦都唔同,如果無貿易,個個農民都只可以用自己一小片田地來種可以食既植物,來填飽肚子。如果你係廣東浙江依d漁米之鄉就當然無問題啦,但如果你在貴州廣西依d窮山惡水既地方,就算你早出晚歸做足365日,都只可以在餓死邊緣上苦苦掙扎。

趙紫陽返到中國後,一次去山東魯北睇過,果度係鹽鹼土地,種糧食產糧好低,但係非常適合種棉花。但係由於中國限制貿易,要個個農民自給自足,多年都只可以可憐地種糧食,在貧窮線上掙扎。於是趙紫陽決定魯北可以種棉花賣比國家,而國家就為農夫提供糧食。結果兩年之內棉花大幅增產,農民立時翻身,仲在1985年「搞」到棉花多到成「災」,賣唔出去....要知道,不過係兩年前,中國仲係大量入口棉花既。

農民除左買棉花既收入之外,仲因為種棉花就有棉花籽,棉花籽榨油之後係非常好既肥料。有左依d肥料,在非鹽鹼既土地種小麥又大幅增產!

以前係1.5畝地來種小麥都食唔飽,依家係「一畝小麥吃飽飯,半畝棉花做貢獻。」1畝土種小麥已經夠食,仲種棉花來賣添!

依個係我讀咁多經濟書以來,解釋貿易點解可以創造價值既最精簡深刻既解說。讀趙紫陽既感覺很似讀Yunus,都係No bullshit既實踐家,依個係佢由計劃經濟到巿場經濟一步一腳印地行出來既經驗,果種摸索出來的實在,唔係一般經濟學者可比。

依家中共官方喉舌,叫鄧小平是什麼「改革開放總工程師」,實是過譽。鄧小平支持經濟改革是真,否則趙紫陽一個小小地方官又點可能頂得住陳雲、李先念依d老人既壓力?但,由四川到全國,真正落手落腳模索出改革的,是趙紫陽。

鮑彤在導言之中講得好:

「有人,說鎮壓壓出了繁榮。我只知道,是經濟改革改出了繁榮。是人民,用巿場經濟打破了毛澤東的枷鎖,才創造了繁榮。」

歷史,一定會還依位第一個實行經濟改革既人民總理一個公道。

2009年6月7日 星期日

死幾多人先算屠城?

一個都算。













唔係六四果日先講六四嫁喎,就好似你都唔應該在母親節先諗起阿媽一樣。

一眾講什麼要去到楊州十日,嘉定三屠,甚至南京大屠殺先至算係「屠城」既人,我其實好希望你坦白d,乾脆講「港股就快二萬點,唔好亂,唔好阻我發達!死既係你個仔唔係我個仔,關我乜事?」,唔該面對自己既自私膽怯同醜惡。

依家睇返,馬力個「壓豬」論,起碼係真小人。

好過依家遍地既偽君子

2009年6月4日 星期四

遺忘....?

問題根本唔在於係咪遺忘,曾經親身經歷過二十年前波瀾壯闊的民主運動,曾經感動過,充滿希望,上過街,傷心過,喊過既人,無可能失憶。

人生在世,不過幾十寒暑;功名利祿,轉眼成灰。

在此時此刻,正正係人性既照妖鏡。

如果你乖乖地就範,中共金主就大把錢另加回鄉証比你。

唔好以為只有美女先至可以出賣自己。


總有一日,正義會得到伸張,到時依家扭盡六寅來淡化、歪曲、美化歷史現實既一班小丑角,自有其應有既歷史地位。

六四的真正歷史重要性雖然仲要等時間以及中國未的的民主進程發展來肯定,但,六四事件肯定被大部份人所低估的。雖然民主人權既火花一時被坦克車壓下,但,正如嚴加祺所說,「把中國的所有寃氣都盡量地壓住,壓到後來,學過物理的胡錦濤就會知道甚麼結果了。」

我從來無諗過六四有可能唔平反的,你有可能屠殺自己平民百姓之後扮無事發生嗎?平反六四係一個必然,只係唔知道乜野時間會平反。

而且,唔需要咁悲觀,唔一定要再一個二十年的。

二十年前有邊個估到栢林圍牆可以一夕之間倒下?


哈哈,我實在生在一個有趣的年代,絕對會見到中共形勢突然轉逆,六四真相重見天日的。

到時,六四死難者可以安息,天安門母親沉怨得雪,在承認錯誤既基礎下,中國可以真正前進....再會同場加映,一眾小丑角再一次表現光速變臉。


天地攸攸,我地都不過活在借來的時間,借來的空間。人生在世,重要既係:

問心無愧。

二十