2007年12月28日 星期五

型男

多謝各位一年來對Samsara既支持,年近歲晚,小妹亦趁此機會,回饋讀者~~~~~~隆重介紹,本年最佳書籍:型男講座---瞬間必殺50技

作為一個型男,工作就是生命,辦公室就是你的舞台。要型,一定要由細節做起。
有漂亮女同事嗌你,雖然心竊喜,但千萬不能停止手上打字的動作,一面保持打字動作,一面轉身,就係<BT旋轉法>。加埋單眼,好Cool呀!
另,BT唔係點對點或者Bad Taste,而係Blind Touch咁解。


女同事叫你過去?一定要用<倒轉瞬間轉移法>。秘訣係,全程要保持背脊向住人既姿勢,咁至有「型男來襲」既氣勢。

電話響起,咁就係你既表演時間啦,以下既<鷄尾酒接電話法>要多加練習:



型男的工作,當然唔可能只局限在室內,型男外出時,一定要以性命擋住快要關上既Lift門,為穿斗零踭而行動不便的嬌弱女同事爭取寶貴的時間----絶對今女同事心如鹿撞既<大字型人肉擋Lift門法>。




西裝雖然係型男在職場上的盔甲,奈何香港地處亞熱帶,天時暑熱時,脫下外套,仍然要保持最佳狀態,比如要用<劉華式拿法>:


甚至<大佬式拿法>,方便隨時開拖。


就算在街跑來跑去,弄得大汗淋漓亦唔需要擔心自己會變臭男人,秘訣係,有型既<荷里活式擦汗法>:
哇!好閃亮呀!

領呔係束縛?錯!Happy Hour時,領呔絶對係你表現個人風格同野性既最佳道具,比如:

咁樣:

或者咁樣:

又,乾脆,咁樣:
點解依本只售票$57,在三聯仲有85折既絶世奇書竟然打唔入暢銷書龍虎榜?

各位男士,千萬不要怕丑,將依本會改變你一生的書帶回家吧!都係有d唔好意思買?咁咪將佢夾在【殺悶思維】同【中國大歷史】中間,在Cashier姐姐不知不覺間買左佢囉。

各位女士,一定要將依本人生再教育天書送比老公/男友做新年禮物呀,等佢洗心革命、痛改前非,在就一年成為一個你拖住在街上行,會招來無數艷羨目光既型男!

又,可見Samsara唔只只睇埋d悶絕人寰既書嫁,佢偶然都真係會有d好介紹。

要多d睇Samsara’s Blog啦,如果唔係,就真係走晒寶啦!


有謂:
「日日睇Samsara’s Blog,包保唔會頭惡惡。」

新年快樂!



P.S.: 鳴謝朋友J拔刀相助---幫我cut圖,及朋友S冒比人打既危險,買左依本矌世奇書來交換禮物...依家本書應該已經去到某未來型男手上... hey man, you are sooooo lucky!

2007年12月27日 星期四

朋友

朋友朋友,原來「朋」唔同「友」---「同師為朋,同志為友」。咁,我地依班中學同學,就既係朋,亦係友。

在平安夜時收到消息,真是有點突然。人生既無常,真是令人有點措手不及。似乎,生命一直在提醒我們,要珍惜現在擁有的一切,要好好把握與自己所喜歡的人相處的機會,要活在當下。

我地每年都舉行既大食會,不知不覺間,已經成為一個對我好重要既節目。其實,我除左次次都會買d奇奇怪怪既野,食唔晒剩在屋主家中之外,我仲會因為大家都可以同願意抽出時間來相聚,而覺得好開心嫁。我地依班同學仔可以keep到咁多年,實在好難得,亦令人好感恩。

前一排我媽媽中學時代既死黨來香港旅行,佢地既節目竟然係相約一齊去迪迪尼玩…睇見阿媽影返來既相,係兩個六十歲既阿婆級女士,在米奇老鼠前面攬頭攬頸,笑到好似小朋友一樣。Wow,唔知我地n年之後,仲會唔會咁有童心呢?

朋友,要好好休息啊,我地都會誠心地祝願你既手術成功。要快快康復啊!

〈XXX美食XX〉,等你歸隊。

加油!

2007年12月21日 星期五

聖誕快樂

可能因為依排太奔波,忽然發現來緊星期一就係平安夜啦!仲有兩日假放添呀!

蝦,一年咁就過完,我地好快已經去到北京奧運既2008啦。唉,我呢,唔單止已經到左要計減數先知自己幾多歲既年齡,亦都到左覺得時光飛逝既年齡lu。

我覺得寫blog超過一年既最大好處,就係可以睇返當年今日啦。日子一日一日咁過就唔多覺,但係一睇返自己一年前寫既野,先發現自己原來在不知不覺間有好大既轉變。

我一d都唔期待滿面皺紋既一日,但係,人大左,跌過、痛過、開心過、傷心過、憂鬱過,先真係會生返少少智慧,同埋會產生d同理心,唔會好似細個時咁無聊&無知囉...雖然其實依家都仲係好無聊&無知,但係點都好過之前咁囉。

上個禮拜我攞返一本兩年前買既書出來,當時因為睇唔明,睇左一個Chapter就放低左,但係依家一睇,竟然明喎,仲睇得好開心添!可見青春(正確d來講係時光)的流逝,係可以換來知識的增長…其實,都幾令人老懷安慰嫁,個天,都真係對我不薄呀。

昨日我所做既行為決定,令我成為今日既我,而今日我既努力同決定,亦會成就明日的我,咁樣一步步行來,有起有跌...真係幾有趣。

又,有情人老公老婆陪伴過聖誕就緊係好啦,但係就算無,仲有朋友兄弟姊妹父母嫁嘛,未一樣咁好!唔駛煩惱喎,依樣野,有又煩無又煩嫁姐。

都係,祝各位聖誕快樂,下年想果樣有果樣啦!

恭喜恭喜!

2007年12月20日 星期四

書店

我以前一直都認為,書店的店員同Boutique既店員係唔同既,不過諗真d,其實佢地都係好似既。

一個好既Boutique店,員最重要都唔係要好好戲地讚個客『你著得好靚!』而係要介紹一d真係會著得個客好睇既衫。比如個客方面既就比佢著圓頸,大塊面就比佢試V領,太廋既就比個心口加摺既,中間肥胖呢,就一定要著闊髀兼有後袋加袋蓋既褲,一個好既Boutique店,真係可以幫老闆做多好多生意。

咁書店店員,其實咪一樣,如果可以幫到個客揾到岩既書,真係可以做多好多生意。

之前去曼谷時,我又真係遇到一個好惦既店員喎。咁我一入到去就唔知點解間歇性失憶,捉住個店員之後,只可以講到:「本書名好似係African Diary,個作者叫做Bill…唔知乜野,佢好出名,有另外一本書叫做類似乜野A Brief History of almost everything…」我自己都問到有d唔好意思,咁少資料,要人查案咩?

點知店員姐姐好醒目地,連電腦都唔駛,查即刻講:「係咪Bill Bryson? African Diary好似仲有,等一等。」轉頭就攞左依本我恨左好耐,全香港都揾唔到既書比我…好感動!


(又,本書好笑兼令人感動,Bill Bryson真係可能係世界上最好既說書人…點解香港無人入依本書???佢仲將收益損晒比CARE,就算貴d都實有人買啦!)

在上海,又完全係間間書店有唔同Style囉。上海書城,真係好大…而無當,書放得又散又亂,入既書又唔岩睇,個店員仲勁搞笑,我問佢:「金庸在哪?」,姐姐竟然答:「金庸在哪?金庸的書在哪?」…咁係書店唔係揾書,唔同係揾遊戲武器咩?都唔好笑既個笑話。之後姐姐攞左套又髒又bun角既笑傲出來…都係算把啦。

咁在上海書城旁邊既上海古籍,又係一個唔同既世界。佢放出來既,好多係一排排,同一顏色既套裝書,比如資治通覽,唐詩未詞果d…丁丁comment話,係比人買返去放在書架度擺…都岩,不過我肯定亦都有人除左擺,仲會睇。

上海古籍既暢銷榜就咁勁,上榜既唔係d什麼減肥烹飪財技書,而係d文學歷史書囉,榜首仲要係一本叫做論語講義既書。

個作者張相十足五四青年咁,深色長衫加頸巾…以為佢死左好耐啦,結果作者介紹講佢竟然係1976年出世,仲有季羡林同佢背書,稱佢為小友…唉,咁我好附庸風雅地,買左,依d咁既書,我係絶對唔肯打書釘既,現代人解釋論語,我都有d機會明,放在屋企如果有一日我真係無野好做,都有可能睇下既...okok,我知我屋企d封晒塵既書都係咁來。

咁我又去到問店員問有冇金庸,哥哥好有趣地講:「你要金庸全集嗎?」哇,唔係唔係,只要笑傲,哥哥攞出一套乾乾淨淨又無傷既笑傲出來,仲會問:「金庸還有好多書呀。」我知,好驚我一個軟弱話好既話,佢就會抬出全套金庸全集出來,再攞埋卡通箱出來pack埋比我(當時真係有客pack緊箱)。

唉,香港呢,商務三聯天地,其實都係聯合集團既書店,入既書,大同小異,不過Discount Card又唔可以通用喎。唯一同佢地唔同既,就係Page One囉,可惜佢書超貴,雖然有靚靚裝修,但係好孤寒地,一個座位都無。

其實,幾年前銅鑼灣商務英文部都有個好叻又有heart既店員(定係店長?)嫁,當依間書店,只要貼上Highly Recommended既書,我只要翻兩翻,覺得內容有興趣,咁就一定唔會買錯書。

我仲好記得見到佢攞住本書,一邊同個店員講:「依本係好野!」,一面拍一聲貼上Highly Recommended既label;果一拍,係對書既熱情;果本書,係Guns, Germs & Steel。果時,Jared Diamond在中國人圈子都仲未咁出名,依本書過左好耐先出中文譯本,唔似佢之後既Collapse咁,一出平裝書已經差唔多有中文版。Guns, Germs & Steel真係好好睇。

不,過之後一直都唔見佢lu,銅鑼灣商務既Highly Recommended亦不復當年勇。

2007年12月19日 星期三

大上海戲院

我weekend在上海,順便探長駐上海既丁丁。除左飲飲食食之外,丁丁有兩張電影coupon,咁就一齊去睇戲。

依度一場戲竟然要80蚊人仔!!! IFC Palace都只係依個價錢,張coupon只係60蚊,仲要再補20蚊,心諗,唔該你果張係鑲金大班椅。

個戲院雖然有幾個影院,但係全部都播投名狀,無得揀。一入到戲院就已經知道出事,地毯又舊又污糟,燈光暗,牆又灰灰黑黑,唔單止無爆谷既香味,仲有陣霉dup dup既味。

入到影院,真係開始妖啦,地下有好多垃圾,行兩步都隨時會踢到野...佢播緊廣告,但係又開曬燈,非常光猛,等我好清楚地睇見d白色布椅套上面有好多一逹逹既積,好心d戲院無打算日日洗椅套既話,就唔好用白布來做椅套啦...雖然咁貴戲院又唔靚,都一樣full house喎,上海人d消費力真係勁...坐我隔離係一位著住黑色皮褸,個頭gel到好型地一支支樹起既男士。係囉,個樣就型囉,但係佢個頭發出一種應該十日無洗頭既濃郁氣味,相信如果有烏蠅既話,一定在佢頭上盤旋。金玉其外就係講緊佢啦,比足十個妖你呀~~~臭男人!

部戲…真係…妖!陳可辛如果夠疆,真係諗住拍部男人既戲,就唔該咪擺個徐靜蕾係度做花瓶,權力利益已經夠晒令人腐化同出賣兄弟,加左依個無厘頭紅杏出牆既女人,太多枝節,反而分薄左佢已經無乜既劇力。

講到兄弟之間因為力利慾薰心而出賣左當年既『劉關張』結義…well…又到喉唔到肺囉,佢地結義唔係因為d乜野義氣,又或者什麼光復漢室既遠大理想,只係因為大家互相猜忌但係又被迫要合作,先至下投名狀囉。因為利益而結拜既兄弟,又因為利益而分裂,好正常呀!

而所謂既出賣兄弟,講來講去都只係李連杰殺劉華之麻。咁劉華在蘇州城外拖馬話要走時,其實已經係叛變,犯軍令者死係常識,唔駛佢即刻人頭落地,係因為仲需要佢既人馬來打南京...何況,劉華由一個殺人放火、姦淫虜略無所不作既山賊,忽然變成浩然正氣既紅臉關二哥...吓,無交持佢點解有咁既轉變喎,就憑果一幕下軍令處決姦污民女既士兵?咁唔夠令人洗心革面嫁嘛...而且,如果陳可辛真係要講權謀既話,不如乾脆話劉華不滿分贓不勻而反面啦,講乜野仁義道德咁假呢?唔通,因為劉華永遠都係劉華,做唔到奸角?

最後果場李連杰狂毆金城武既戲,真係超難頂…李連杰比金城武插左一刀都可以完全無事,金城武呢,比李連杰打斷n條骨之後都仲可以企起身,真係好煩,好想幫李連杰打鬼死金城武,快快完場算啦!

我呢,就係咁樣,在男人味之下睇完一部『男人的電影』...上海d戲院咁恐怖,唔怪之佢既番簡事業咁昌盛啦!

2007年12月12日 星期三

我在伊朗長大

Persepolis - 我在伊朗長大在百老滙有得睇啦!

漫畫好好睇呀,部戲,都應該好睇。



聽日上畫,依部戲唔荒收得,要睇就快手買飛啦。

2007年12月9日 星期日

大屋

聽Ajahn Brahm講Craving,講人要有幾大間屋先夠,諗起之前去泰國出trip既事。

我同泰國真係八字不合,諗返真係次次去親都會病,而且好似同食物有關。我鍾意泰國菜,在香港食泰國菜亦都無問題,但係一去到泰國食泰國菜呢...就會出事。

今次其實總共都只係在泰國逗留48小時姐,而且我全程都好乖地,只食西餐。在最後一晚,咁,我又心情輕鬆兼死唔信邪,在我既純西餐之中,點左一個冬蔭功...咁就無蔭功囉,當晚就已經出事,喉嚨勁痛,低燒又頭暈。

今次酒店overbook,upgrade左我去一個仲大過我屋企既suite。有齊廚房客廳飯廳衣帽間儲物室、兩個toilet、兩部電視、浴缸仲有jacuzzi。

但係當你一個人病左要揾個水煲時來煲d熱水時,就真係要翻箱倒櫃地周圍揾,仲要個廚房實在離睡房太遠,我已經好攰嫁啦,乾脆將水煲攞入睡房,擺在床頭櫃。仲有果張超大Queen size++既床,真係要look幾轉先可以去到床邊jump水,到你終於攞到水時,已經好暈...所以都係訓在床邊算...

就係咁,依間deluxe suite,結果都係比我變成普通酒店房既陣勢。

2007年12月5日 星期三

....

在尼泊爾既山頭行左一整日,就天黑時我地上到山頂,在一間旅館住下。

依間都真係我有生以來(so far)住過最簡陋既旅館囉,全屋用好舊既木造既,没熱水,只有幾個燈泡照明,地板有d搖晃,行起來會發出吱吱聲。我地吱吱吱咁在一個好狹窄既樓梯行上去房間。

房間好細,細到只夠擺一張窄窄既床,連一張椅都無,我既背囊只可以放在床上。

依個都唔係重點,最緊要所謂既房間,唔係用木板圍出來既,只係由一塊塊木條拼起來而做既『牆』圍成,d木條仲要彎彎曲曲條條唔同形狀,所以『牆』上有很多裂縫...其實...根本就係loan,我只要湊近d『牆』少少,隔離房就可以望得一清二楚。

床上被鋪乾唔乾淨?...都係唔好睇得咁清楚,太陽一下山就降温到只有幾度,咁涷,你可唔可以kum被呀!只好不停催眠自己:好快訓着,好快訓着。因為實在太攰,真係好快訓着。

第二朝天未光我地就起身,為左睇日出。

我地攞住電筒行去向東既山頭坐低,等既時候,寒風刺骨,涷到不停打冷震。

唉,我呢,係一個雨女,唔知點解去到邊都會落雨。之前去過兩次鳳凰山夜行都睇唔到日出,仲有一次大雨傾盆到要行到半路扎營避雨,最後都係太大雨危險而要半路撤退...所以到果時為止,我都仲未見過日出。

咁,在尼泊爾依次,我又遇上天陰,睇唔到日出。不過當個天慢慢光時,面前既雲霧開始散,我可以慢慢見到腳下既雲海,最後見到遠處既珠穆朗瑪峯。

珠穆朗瑪峯既雪山連綿,好似離自己好近,咁,我又有d疑幻疑真,有d唔相信面前依個真係珠穆朗瑪峯來。旅館養既狗跟我地一齊去睇日出,好乖地坐在我隔離,我既朋友就在依個時候幫我同狗仔影左一張我倆都極目遠望既相。

嗯,依張相,我無眨眼。

2007年12月4日 星期二

...

尼泊爾依個雪山之國雖然天氣苦寒、生活艱苦,但尼泊爾人卻出奇地温和友善,見到人唔理識唔識,都會打招呼,講:Namaste!我當時以為Namsate係『你好嗎』咁解,但係查左Wiki先佑原來依句說話咁有意思。

(多謝Wiki,令我足不出戶能知天下事。)

去到尼泊爾,當然要行山啦。在山區陰晴不定,會一下子好曬跟住又忽然落雨,跟住又好曬;我地d衫就跟住重重覆覆地乾完濕、濕完乾。

有一場雨實在太大,我地跑入山上一戶人家避雨。

依戶人家的屋好細,而且半窩在山洞裏,咁樣冬天時應該比較暖。主人同佢太太都好好客,雖然言語不通,都會用手勢請我地坐。佢幾個小朋友都好奇又害羞地躲在一旁偷看我們;屋內没電,窗戶又很小,看不清楚孩子的樣子,但隱約見到佢地都係面圓圓又紅冬冬的可愛蘋果臉。

主人的妻子很快地煮好茶比我地飲,仲好慷慨地放了很好糖。當時我一日之內淋左幾次雨,又攰又涷,飲左依杯甜美的熱茶之後,真係由個心裏面暖出來。




上年我媽媽忽然想助養小朋友,去宣明會填了表格,也没有指明要助養男女或者哪一個國家既小朋友。結果宣明會安排左一個尼泊爾既三歲小妹妹比佢。我媽媽作為一個虔誠既佛教徒當然好高興,很喜歡這個來自佛陀出生聖地既小女孩,深信同佢好有緣份,仲將佢既相片放在床頭…要知道,佢床頭連我既相都無擺呀!

當日尼泊爾既村民贈我熱茶,今日我媽媽助養尼泊爾既小女孩(係我比錢既),冥冥之中的緣份,真係好奇妙。

其實如果一直追索到古代,我地都係在非洲的同一個女人的後代,所有人類,不論什麼膚色,不管身處地球哪一角落,我們其實都是兄弟姊妹。


想助養孩子嗎?

2007年12月1日 星期六

如果葉劉贏...

我都考慮移民。

我唔係話陳太有幾好、幾咁有良心呀吓。不過葉劉既政生命,已經在七一遊行一刻結束,唔該唔好殭屍咁,忽然彈起身要復出。

一個講得出什麼『希特拉都係民主選舉出來』、『唔通的士司機、家庭主婦會同我傾廿三條』,仲要臉部肌肉不受控制,隨時唔順就會在萬千鏡頭前照樣藐嘴藐舌既政治白痴都可以當選...香港真係無希望lu。

都係開始學渣鑊鏟,技術移民。

~~~~~~~~~~~~~~~~~~~~~~~~~~~
我地都係去片,睇下真正高質素既選舉前瞻。香港又真係臥虎藏龍,令人又重新覺得唔係咁無希望。

大力哥哥,無論你想寫定唔寫,我都一樣咁支持你嫁...不過,最好就寫啦!

~~~~~~~~~~~~~~~~~~~~~~~~~~~

區選泛左大勝,因為佢地真係做左好多實實在在既地區工作,依個係選民成熟既表現;但係立會之爭既議題唔係民生而係政治...應該話,一日我地未全面普選之前,立會都係政治議題既選舉。

我上個禮拜同個英國人傾澳洲選舉,當時Howard既執政黨竟然夠膽偽造選舉傳單,嫁禍工黨!!!咁鬼低能既野我咁以為只有在台灣先可以發生...乜佢地真係以為唔會比人發現咩?

英國人話,依d野在英國唔會發生,如果有d咁既事,唔只黨內高層大鑊,直頭係會ruin the whole party,佢覺得澳洲依個國家太年輕。言猶在耳,英國就爆出獻金醜聞,係有人在無申報既情況之下比工黨捐款,咁就緊係好唔岩啦,但係嚴重程度,比起老作支持恐怖主義單張來嫁禍於人又差好遠...但係英國人一樣好大反應,Brown都一身蟻。

一個國家既政治成熟程度,係要靠日積月累而來既,今次係香港人既另一個表達機會,希望大家都去投票。

~~~~~~~~~~~~~~~~~~~~~~~~~~

我今日去過灣仔同銅鑼灣,真係行幾步就有人拉票,拉票派傳單既人,仲多過前兩個禮拜既區選。乜一個六十份一既選舉值得咁樣總動員咩?

今次一個補選,其實係中共測試香港人係咪單純既經濟動物既試金石。

我由細到大都聽人講香港係文化沙漠,鄧小平講五十年不變既時候,都係講『馬照跑,舞照跳』,好似我地一有錢有飽飯食就會收聲。在佢地眼中,香港人唔只係商人,仲係商女---不知亡國恨果隻。

依個咁既logic一直傳到江澤民,亦一直傳到胡錦濤,直至爆發七一大遊行,五十萬人上街呀大佬,中共先發現自己完全錯估形勢,亦低估左香港人既民主訴求,亦都低估左香港人對經濟低迷既不滿,所以有一連串既政策調整---葉劉、董健華下台,自由痕、屍爬出台,在政治同經濟雙管齊下落藥,挽回人心。

依家香港人總體地開心左,咁問題來啦,究竟係政治牌定經濟牌收效呢?又或者更加直接地問,而家香港經濟好反,你仲要唔要民主先?

再講一次,依個係一個極度政治化既選舉,亦係一個中共測試香港人究竟係飽暖而知榮辱,定係只顧個人利益既經濟動物。

而且我地講得再遠d,香港作為中國既一部份又同時係一個行政特區,依個咁奇特既身份除左可以今香港有經濟先鋒同實驗示範區既作用之外,其實一樣可以係政治實驗塲,要測試全民直選既效果,一樣可以由香港先行。

香港人如果一日有民主選舉,而又有足夠既政治成熟同廉潔選舉,唔會搞到台灣咁樣黑金兼玩弄民意,咁就可以做一個真正既示範比十三億中國人睇,點樣先叫做『人民當家作主』。


各位,你投左票未?