2007年4月28日 星期六

貴婦狗

火火留言話:「噢,有人話我知...係太陽報老作既假新聞.日文報紙完全無呢個報道呀. 嗚, 上當, 重寫blog立此存照添 (笑緊自己呀, 唔係你), 嗚...」

吾係掛,竟然有報紙作故仔,揾自己既公信力來較非?我地既傳媒真係淪落成咁?仲大鑊過二千隻羊比人當狗賣左喎,真定假嫁?

===================

醫生,點解我隻狗吾識吠既?我有時叫佢,佢仲會答我:「咩...野?」咁呀,佢係咪第一隻識講野既神犬?

醫生,點解我隻狗吾食狗糧同牛扖,吾同佢嫌我d牛扖吾係神户牛柳,太cheap?

醫生,點可以吾同佢打防疫針嫁,容乜易有瘋狗症?嗄,要打口蹄症防疫針先岩?

醫生,點解我隻狗生得咁大隻既,我都抱佢吾起啦,佢明明係迷你種貴婦狗來喎.

.....

吾得啦,依個係咪假新聞來嫁?求你話我知係d人作來玩嫁啦,我依家見親狗都想笑呀!

.....

又,各位朋友,好多謝你地呀,我好耐都未試過好似昨晚咁,笑到流眼水,依家開心返晒.

2007年4月27日 星期五

依排都幾多野諗下.

我諗既問題,係自己在餘下既時間,究竟想做d乜?

咁我吾係細又吾係老,正正係中年,都係時候evaluate.

其實有時都覺得幾荒謬吓既,我而家既所謂事業,其實係我十七歲時揀既.

果時要報U,未大包抄乜野都揀吓囉,而且係用elimination來揀.我讀理科既,但係一早已經知道自己好憎工程,亦知道自己怕血吾可以做醫療人員,更加吾想繼續讀純理科.

咁剩返既,未只有社會科學系囉.果時都真係乜都有報:工管,經濟,會計,甚至傳理系,連d純理科都有報,買下保險,反正我要報好多科.

咁,我既第一志願工管收我,咁未讀工管囉.畢左業,咪做商界既工作囉,吾同做物理治療咩?

諗落都幾搞笑,如果當年工管吾收我,而變左生物收我既話,我依家咪分分鍾在實驗室做緊?

如果我讀左傳理就仲搞笑,我做記者,AK哥哥一定覺得新聞界百份百無希望.

依家我既工作,係在我仲未成年時都幾隨便既選擇,再加睇下邊系收我而決定既.

係咪實在太求其呢?

2007年4月25日 星期三

陳太的自白

我知呀,狗仔隊在我樓下一直等呀嘛.李太同敦太都打左電話比我,話新聞見到我屋企樓下啦.

我又無偷無搶,怕乜比人影相.上頭版喎,幾多人試過.不過早知會登咁大幅相出來,就化下粧,雖然吾係見工,都費事比d記者仔話我似賓妹.

其實我又有乜所謂姐,我老公同第個女人影張相之嘛,代表d乜?

何況,依家講緊一千億喎,係錢吾係活性乳酸菌呀.

就算益力多,都要成十枝先有一千億啦.十枝益力多,飲完都包肚痛啦.

打官司,都係用果零頭十億姐.無問題呀.

如果真係比我知道你個衰佬對我吾住既話,我一定會忍---到你贏左場官司.

咁我地一離婚,我就可以分到五枝益力多.

不過,以後我d小朋友出街都一定要帶傘啦.無辦法,如果比佢地影到d細路,佢地一定會照登出來.

可吾可以放過d細路?佢地係無辜嫁.

2007年4月23日 星期一

To: W

好啦,請得我來,係囉來搞惦d問題嫁啦.

養你咁耐,又可以比你閒到日日不停blogging,都係為左用在一朝姐.

咁,我家陣都只係有一條友做吾惦d野姐,其他既妹妹仔,都好生性呀...雖然佢一個已足夠搞到我半死.

無計啦,攪到咁大鑊,通晒天,咪今個禮拜局晒d貨出去,下個禮拜黃金週,大家得閒時,我過去請吃飯囉. 擺和頭酒咪和頭酒囉.

依位咁出事既,吾係我請嫁下.

我真係EQ飛躍,今日咁多鑊一齊爆,我都可以無發癲.

仲好變態地,落樓在Starbuck買左個飽就算,在lunch time打兩篇文出來.

工作,處理完就好.

今日可以做既,都已經做晒.

聽日再做囉,總之我收工,就吾會帶埋d公事走.

=====================
W,嗱,我依d先叫放下啦!

而且,我仲會在六點就準時收工.

你又收幾點呀?

波特小姐




可以畫出咁可愛又傳神兔仔既女子,係一個乜野人呢?

波特小姐思想獨立,不容於當時既社會.佢吾只識畫畫講故仔,仲係一個植物學家.


未婚夫既突然離世,肯定係波特小姐一生中最大既創傷同遺憾.但係,佢都無被打敗,仍然努力創作,捍衛自己熱愛既大自然,為英國保留大幅既自然農地,又找到另一個愛人,活出豐盛人生.

在戲中,雲妮絲穎嘉演得恰如其份,當時既英國淑女,就應該如此.


最愛佢不加掩飾,由得眼尾既皺紋在鏡頭前顯露,好真實.

睇依部戲吾好遲到呀,片頭拿出畫具,慢慢調色既一幕,好似變魔術.

人生有如探險,在故事既開頭,你吾會知道會帶你去邊.


不如去片,睇下彼得兔既大冒險.

悅讀

在依家這個科技發達、資料爆炸、娛樂豐富既世界,我地點解仲要咁老土,要睇書呢?

書既好處係可以隨身帶,如果你永遠放一本書在身邊既話,咁等車、塞車、等人既時間都好容易打發,吾會悶.(Well,打機聽歌都可以anytime,anywhere.)

書係可以走入另一個世界,無論係科幻小說既未來世界、思想巨人既世界觀、科學家既最新宇宙創生理論、心理學家對人性既分析、才子對時事既精闢見解,都可以在書中揾到.(車,關我乜事,又無得加分、加人工!)

一d比較複雜既慨念同論點,係吾容易用語言來表達.但寫在書上,可以將整個思路娓娓道來;讀者一下子睇吾明,又可以在覺得困難既地方睇多次.原來,有人咁勁係咁樣諗既!(人地點諗關我乜事.)

書既世界分分鍾大過人界,就算兩個人都話自己鍾意睇書,講返鍾意既書,可以無一本相同.有人係咁吾同,係咪好得意?(互聯網仲大,仲快.)

有時候,思想同觀點吾係三言兩語可以講清楚,又吾一定可以好似報紙雜誌咁,今日發生既事,聽日就出評論.思想係需要沈澱既,書,係一個好好既媒介.(都過左去既事,仲有人記得?仲有人有興趣?)


嗯,其實我講乜,都一定有人可以講到d野來反駁,只係想講,識字又喜歡閱讀既人真係好幸福,因為,佢地吾會比身體既籠牢困住,可以隨時遨遊古往今來.

閱讀日愉快!

2007年4月22日 星期日

灣仔趁墟

今日,第一次去灣仔有機農墟

墟仔細細,真係有一種同周圍既高樓大夏完全吾同既純樸鄉村味道.

佢地都係本地既農民,將自己用心栽培既有機蔬菜親自攞來買.

有d檔仔放左農民張相出來,而佢本人就站在個banner下面買菜.以前在日本既超級巿場會見到有d農產品會放個農夫張相出來,多數d農夫都笑得好開心同自豪,好似講話:「睇下d菜幾咁靚!係我種出來嫁.」估吾到香港都會有.

果d菜,真係好翠綠,上面仲有少少泥添呀,好明顯係今朝先摘既,好新鮮呀.

佢地在幫你磅菜之前,一定會順手摘走d無咁靚既葉,緊係啦,依d係佢地引以為榮既產品,一定要以最佳面貌到客人手中.佢地除左有好開心同簡樸既笑容奉送之外,磅完之後,又多數比多兩條菜過你.

果度無人用新膠袋,都係循環再用d百佳,惠康膠袋,所以,都係自備購物袋啦.

有個婆婆仲得意,我地擺左d菜在個磅度,佢望左一輪,攞左個天平秤出來,話:「我好蠢嫁,學極都吾識用d磅,只係識用依d古老秤.我個女就識用,不過去左買飯.」

哇,婆婆你一d都吾蠢,d只有刻度既天平秤都識用,比我就真係吾識就真.不過,我都特別小心check下婆婆有冇找多左錢.

價錢,就係貴d嫁啦,有機耕種既成本好貴嫁.比如果d有機黃豆肥,就貴過化肥五六倍,又因為吾落殺蟲劑,要多d人手來人工除蟲嫁.大既$16-20一斤.種類有羅馬生菜,西生菜,橄欖菜,白蘿蔔,油墨菜,西芹,紅菜頭...

特別推薦車厘茄,有機車厘茄真係好好好好好味!飽滿多汁,仲有好濃郁既番茄味,原來真正既番茄係咁既味既,好香呀.

依個墟馮星期日在灣仔稅務大樓旁既灣仔告士打道花園,時間由11:00 am- 5:00 pm.本來賣埋下個禮拜就完嫁啦,不過依家延長到今年年底.

得閒就去幫襯下啦,健康好味,又有人情味!

2007年4月21日 星期六

快樂多角度(6) - Paradigm Shift

朋友問我究竟係真開心定扮開心?又有好多網友既留言,大既都係問緊我係咪在度自我催眠嫁.

嗯,依樣野係如人飲水,泠暖自知.

我真係拉高左我開心指數平均值.當然一樣有突如其來既情緒低落,但係少左好多,而且好快就上返,未試過在低谷超過一日.

阿朋友仔話可能我文筆吾好,搞到大家吾明.咁,不如等我舉例說明啦.

我既親身經歷係,當我一轉左睇野既角度,世界就改變,連我都即刻改變.

比如,我其實係好鍚我媽媽既,但係我地兩母女一樣係炮仗頸,好多時候因為一d小事而嘈交.

我真係好憎好憎自己d臭脾氣,雖然我知道無論我講過d乜野,媽媽都會原諒我,都係一樣咁鍚我.但係點解我吾可以對佢好d,令佢開心d呢?

傷害到一個咁鍚我而我又好鍚佢既人,我次次都好後悔,諗左好多辦法去改.但係冇一次成功,不停地犯同一個錯.

到左近來,我用左另一個辦法.

我問自己,媽媽有d乜野吾好先?數來數去只有煩呀,嘍囉呀,成日叫我早d訓啦之類,一隻手其實已經數晒.

咁,媽媽又有d乜野好呢?咁就多囉,佢在我受沈重打擊既時候攬住我,叫我喊出來,不停地同我講話無事、無事.佢教我做人要頂天立地,無愧於心,親身示範一個人應該點樣堂堂正正地做人.就算到年紀大左,佢一樣可以保持童心同好奇心,仍然不停吸收新事物,終生學習.佢係依個世界上最愛我既人.

我最後問自己,點解只集中睇媽媽果少少瑕疵同壞習慣,吾睇佢多到數吾晒既優點呢?

媽媽就好似一塊好通透碧綠既寶玉,但係上面有一條細細既裂痕.我一直只係睇依個裂痕,覺得點解咁醜樣,咁吾完美;從來無留意到裂痕之外,係一塊咁靚既美玉.

當我轉左個角度,去睇媽媽既優點時,我就越來越揾到更多佢既優點.我發現自己既媽媽原來好得咁緊要,我都吾知點解咁好彩兼好命,有佢做我媽媽.

依家當再去到我會發脾氣既位,我就好自然地諗起佢對我幾好,我又幾咁鍚佢.怒氣一下子就比依d正面開心既念頭消融,消失得無影無影蹤.我跟本就吾駛忍,吾駛在孝順與脾氣之間掙扎,因為,無脾氣.

Stephen Covey在佢本全球暢銷書The 7 Habits of Highly Effective People既第一章講過一個故事.

話說Convey一日搭地鐵,本來車箱好靜好舒服,有人睇報紙,有人打機,有人恰眼訓.

但係在一個站度有個男人帶住一班細路上車,坐左在Convey隔離.班細路非常頑皮,周圍跑來跑去,大聲嗌,又搞人地d報紙.

但係個男人就好似乜都睇吾到聽吾到咁,繼續閉目養神.Convey就覺得好煩啦,心諗依個男人有冇搞錯,都吾管下班細路,真係無家教.最後忍吾住開口叫個男人管下班細路啦,佢地搞住成車人啦.

個男人咁先張開眼,答話:「係呀,我諗我都真係應該管下佢地.我地去過醫院,佢地媽媽剛剛過左身,我都吾知點做,我諗班細路都一樣吾知應該點反應.」

一下子,Convey既怒氣同不耐煩吾見晒,佢根本吾需要再控制自己既態度同情緒,因為佢滿心都係為個男人同班細路而心痛,為佢地既處境而悲傷同情.即刻吾覺得d細路嘈同討厭,改為問候依位男士,同睇下自己有乜野可以幫到手.

Convey將依個觀點、假設既一百八十度轉變,叫做Paradigm Shift(吾識譯).

Paradigm Shift係用一個極度強力既轉變.當Paradigm一轉移,我地就在一息間改變觀點來睇世界,自己亦都一下子改變.吾需要好似戒煙咁慢慢來,亦吾需要忍.所以吾好以為要改舊習慣一定要好長時間;只要Paradigm一轉移,改變可以發生在一秒鐘之內.

而且你亦都吾駛擔心會好似戒煙咁,一吾小心就會癮起,再跌返去以既舊習慣.你估Convey明白到個男人同小朋友既處境之後,仲會吾會突然之間又覺得d細路無家教呀?

所以,心一改變,世界就改變.

所以,當你真係用正面角度在睇世界,世界立時變成玫瑰色,變得好可愛.

而你,亦會變成開心既人.

2007年4月20日 星期五

快樂多角度(5) - 負面傾向

吾知大家有冇試過畫左幅畫出來,有九個人讚你畫得好好,但係一個人話好醜樣、都吾知畫緊乜.你吾會好留意果九個人既讚美,但係第十個人彈你既意見,就句句都記得?

又有冇試過在考完試之後對答案,答岩既完全吾會理,覺得係應該既;但係答錯既會一次又一次地睇同check,質問自己點解會答錯?

我地好多時都會自自然然地將注意力放在負面既事上面,比如有個硏究顯示,一對夫妻如果有人講過一句批評負面既說話,係要用五句讚美既說話先可以補償返.

點解我地會有依個負面傾向(Negativity Bias)呢?

其實用進化論既角度來睇,都好容易理解.我地既祖先在每一刻都活在危險之中,四周都係隱藏住敵人;一吾小心,就可能做左其他動物既晚餐.

所以,果d好大膽吾小心又吾怕死既人,好快就做晒晚餐.剩返d比較小心翼翼,凡事作最壞打算既人;佢地寧願錯失左一d揾到食物既機會,都要保住自己條命仔先.咁先可以生存,一直有子孫存活到而家.

所以,在Natural Selection之下,我地既祖先都係一點對危險敏感又諗野負面d既人.所以,我地對正面既好事反應吾大,但係一有d負面野呢,我地就諗完又諗,度完又度,記住記住.

我地對負面野既反應,大過正面野好多,而個亦都成為我地既思想習慣.所以我地睇一件玉器,吾會留意佢大部分既地方都好靚,反而一眼就見到d瑕疵.

我地睇自己呢,就見吾到自己有幾多優點,反而成日執著在自己果幾個缺點.

我地好少會真心讚自己努力同做得好既地方,反而一做錯事,就不停地怪責自己.

但係,而家基本上地球己經基本比人類佔領,我地吾駛驚做左晚餐.而且,我地個心既力量其實好強嫁,你留心d乜野,乜野就會放大.

如果一直留心下屬既錯失,佢地就會不停地有新既錯失出現;如果你留心自己既錯失,你就會一犯再犯.

咁,點算呢?咪就係要改變自己既觀點同睇野既角度囉!

嗱,吾該諗多次啦,你既老闆係咪除左縮骨同無同情心之外,真係一d優點都無先?佢對你都真係幾客氣嫁喎. 又,上之你做錯野既時候,佢係咪都幫你同個客賠罪兼無丙到你先?

阿媽除左煩同囉唆之外,佢係咪好鍚你又煮餸好好味先?

你男友雖然吾靚仔又矮又賺錢少,但係佢係咪好勤力上進又對你好好先?

只要你由正面既角度來睇依個世界,個世界其實都真係好可愛嫁.

又如果你多d正面評價自己,咁你個人開心,對人又會好d.當你充滿正能量既時候,你果少少缺失就會越來越細,你做錯野既機會又越來越少,好快,你就會改善嫁啦.

除左對其他人要好,對自己都要温柔嫁,如果你連自己都吾識愛鍚,又點會識得愛鍚其他人呢?

2007年4月18日 星期三

Why we Blog

PK_哥哥見解精闢,言之有物,連打書釘,都有一d好有趣既見解

Why we Blog? 依本書我無睇過,講真,在有咁多其他好書既情況下,我都吾會睇.

而PK_哥哥既見解,正正確認左我對依Sina出依本書既動機既估計.對Sina來講,依個係一個好好既宣傳,亦係留住現有blogger,同埋吸引新blogger甚至其他blogger轉會既利器.

PK_哥哥又指出一個好有趣既觀點,就係,我地依 d blogger,係咪真係在心底之中仍然覺得自己比傳統媒介”低”d先?如果吾係,點解一有報紙雜誌指到blogger,大家都會好開心地爭相奔告呢?

而其實最重要既問題都係:點解我地要寫Blog呢?無錢收嫁喎,仲要花好多時間.又,可能都會有d虛名既,亦都有機會成名,甚至出書添,但係,依個可能性究竟足吾足夠justify我地放在blog上面既時間同心機呢?

我諗,十個人寫Blog有十一個吾同原因.我呢,就真係吾好意思都要承認,最初個動機就真係一d都吾偉大,只係為左練倉頡咋.

我其實都自學過兩次倉頡嫁,不過一直都學吾識.咁我覺得樣樣野都要有motivation,見d人寫既文章咁得意,咪自己都開個場來寫野同comment囉.因為我真係好享受blogging,所以到左依家,我既倉頡就真係快左好多呀.雖然偶然有字吾識打,又多白文,不過都已經叫做ok識打.

另外一個原因,咪係為左以文會友囉.我雖然鍾意同人面對面傾計,因為咁樣既溝通質素係最高既,睇到對方既body language又聽到個語氣,真係會少好多誤會.但係,有時一d比較複雜同需要組織既想法,真係用文字會表達得好d.

而其他blogger既文章同comment,真係帶比我好多mental stimulation,令我大開眼界,同學到好多野.原來有人咁樣睇同一件事嫁喎,真係我完全無諗過,真係有趣.而在寫文同回應既時候,都係一個好好既機會組織自己既思想,再重新審視自己,更加了解自己.

我已經寫左差吾多五個月lu,中間自己都發生左吾少既變化,有blog依個媒介記錄低,仲有一班網友吹下水,真係好好玩呀.

我無諗住會出書同出名呀,但係可以識到一班咁有趣既朋友,都真係已經好開心啦.

同埋,我都要借此機會多謝一班網友,你地既文章同comment,真係令我受益不淺呢!


P.S., 「有問號既請 “why do we blog?”」果句,好好笑呀!

P.P.S., Blogging有一個好大既好處,就係自由啦.學AK哥哥咁話:緣聚緣散.大家都可以自由來去,咁,每個人都有吾同既處境,要來要走都一定有佢既原因.所以,大家都係隨緣啦.

2007年4月15日 星期日

現真身

昨日同在上海長註既朋友web phone,佢提到:「好悶呀!有冇d正blog介紹呀?」

都真係震一震,係佢上年介紹我睇港燦既,咁我先開始睇blog,睇睇下仲自己都寫埋添.

但係我寫blog依樣野,就真係無話任何朋友知.我自己既野,其實好少會吾話比人知,多數講下講下就講出來,可以吾講咁耐,都真係未試過.

咁,未介紹CK同渣估比佢囉.

朋友話:「睇緊啦!」

吾係掛,心諗,咁你有冇click下click下睇過Samsara先.

咁,未推介AK囉,Office Politics佢實鍾意.啊,block左.

咁,CM啦,人治心法,好實用呀.block埋.

咁,ZZ小姐啦,飲食買衫,實岩啦.嗯,又block左.

咁,魔術師啦,sina吾知會吾會好d,又有股經.唉,都係block左.

咁,肥醫生啦.你仲講六四添,block曬.

當時,我希望大陸永遠都block Samsara.

可能我應該開始講六四,八九民運,民主,人權,法治,新聞自由,台獨,新疆獨立,達賴喇嘛,王丹,丁子霖.

仲有,我真係支持全民普選特首:民主與自由,人人都應該擁有.

唉,我睇得最多既blog,緊係Samsara啦.

不過,都在度問自己,做乜咁驚現真身呢?

我依個朋友如果問我問題,我既答案會同在blog既一樣嫁喎.

雖然我成日在辦公時間寫blog,但係一來佢吾會報寸,二來我都無影響工作.

如果有朝一日佢問我係未Samsara,我又會點答呢?

真係幾難同d咁熟既friend講大話嫁喎.我又吾係殺人放火.

最緊要係,有乜好驚先?

真係自己都搞吾明.

Samsara On the Roof

在我參加既禪修營中,為左延承「一日不作,一日不吃」既優良傳統,每日早餐後,就係「出坡」,即係工作既時間.

我分配到一份優差:掃屋頂落葉.

其實,只要吾駛我洗厠所,就係優差.掃屋頂因為有d難度,所以十日都係我專職去掃;吾駛好似其他人咁,要轉流洗厠所.一次係要洗成六個厠所嫁,所以可以免疫都真係幾開心.

禪院全部都係三角形既屋頂,個屋頂仲要好簡單地係用d波浪紋既鐵皮做既.第一次上去既時候,仲有d鐵皮在度搖搖下,都真係有d驚個屋頂負荷吾來,如果一下子比我踩穿左,就真係好似武俠片咁,Samsara從天而降.

但係偏偏個禪院依山而建,由一間屋去到第二間屋,上下都有好大距離,需要大量攀爬動作.有兩個屋頂仲足足有一米幾高既距離,真係無辦法,次次我都係「澎」一聲咁跳落去...千祈吾好驚,要睇得準,企得穏.哈哈,好刺激.

掃地依d睇落容易既手板眼見功夫,其實都真係有d竅妙嫁.最緊要既,係要好似打哥爾球咁,要轉腰.學識點樣用力之後,真係一掃就落葉、果子、花都一齊飛落屋頂,好爽.十足笑傲江湖之中形容既恆山派「飛花摘木」皆可傷人既神功.

佛經有好多記載,話有人在掃地時靈光一閃,了悟真理.

依個真係幾有可能嫁.掃地係好容易令人著迷既一樣野.在一下一下既揮掃帚既動作下,精神開始集中,屋頂變得乾乾淨淨,好似一邊掃地,又一邊洗滌心靈咁.

在屋頂上面只有我一個人,天大地大,萬物歸於寧靜.生活,不就是這麼簡單嗎?

如果我掃到一粒果子,粒果子又撞到枝天線桿,「叮」一聲咁,我會吾會就在依一刻,一下子明白真理,不再煩惱呢?

我地依d俗人,每天營營疫疫,為左追求各樣目標:金錢、權力、地位、名聲、仲有依期人人都講既愛情.但係,世界本身係在不停地變化中,生、住、壞、滅,不停地轉變.在一個咁樣既世界上,去追求一d恆久不變既野,係未緣木求魚呢?

又,好事發生既時候我地想要更多,又會擔心失去;壞事發生時又會惱怒怨恨,質問上天點解偏偏是我.如果永遠心隨境轉,又點會平靜快樂?

嘩,又發白日夢?吾覺吾覺又去到難度最高既廚房.廚房十分細,所以個屋頂都好細,仲好斜.以前試過有人行得太低,無力爬返上來,結果要揾人爬上去救佢.

咁,我吾想比人救,就唯有十二萬分小心啦.真係好鬼斜,只有mou低伸長支掃帚一下下推d樹葉落去.偏偏廚房在正一棵大樹下面,有好多樹葉,真係mou到腳都軟.

OK,真係推曬d樹葉落去啦,個屋頂幾乾淨!

終於可以在屋頂離地最近既地方跳返落地啦.

安全着陸.

腳踏實地,真好!

2007年4月13日 星期五

快樂多角度(4) - 90/10定律

咁,管理專家、The Seven Habit of Highly Effective People既作者Stephen Covey又點睇呢?網上依排流傳佢既90/10定律:

========================================

發現了 90/10 的定律。

它將改變你的一生(最低限度,它將改變你對不同情況的反應)。

90/10 的定律是什麼?生命的 10% 是由你的際遇所組成,餘下的 90% 則由你的反應而決定。

這意味著什麼?我們無法掌握那 10% 的際遇。 我們無法阻止行程因汽車壞掉、航班誤點,甚或車子拋錨而延誤。

我們無法控制那 10% 的際遇,但餘下的 90% 則不然。你可以決定餘下的 90% 。

如何? … 憑你的反應。

你不能控制交通燈轉紅,但你能夠控制你的反應。別讓他人愚弄你,你能夠控制你的反應。

你與你的家人吃早餐,你的女兒不小心把咖啡潑倒在你的襯衫上,這是你無法控制的情況。

下一步將如何則由你的反應而定。

你開始責罵。

你狠狠地臭罵女兒一頓,令她陷於痛苦之中。然後你又把怨氣發洩在太太身上,責難她把咖啡放在桌邊。接踵而來的是一場短暫的罵戰。你生氣地上樓更換你的襯衫。

你下樓,然後發現你的女兒正哭著吃早餐並趕著回校。結果,她錯過了巴士。

你的太太趕著上班,你匆忙開車把女兒送回學校。因為你已經遲到了,你以時速四十英里在一條限速三十英里 上的道路前進。

你付了六十元道路罰款,終於抵達學校,並已遲到十五分鐘。你的女兒沒有跟你道別便已跑進學校。你回到公司,已是九時二十分了,這時你竟然發現──你忘了帶公事包。這是非常糟糕的一天,而你感到你的運氣每況越下,你開始渴望回家。

當你下班回家,你感到你與太太及女兒的關係上出現微小裂痕。

為什麼? … 一切皆由你早上的反應而起。

為何你會有如此糟糕的一天?
A)是咖啡所造成的嗎?
B)是你的女兒所造成的嗎?
C)是警察所造成的嗎?
D)是你所造成的嗎?

答案是D。

你無法控制女兒打翻咖啡一事,但你在緊接那五秒內的反應讓霉運開始發生。

以下是你改寫命運的結局。

咖啡翻倒在你身上,你的女兒幾乎要哭了,但你溫柔地說:「親愛的,這並不算什麼,但你下次得小心一點了。」

你拿起毛巾便上樓去。在你更衣完畢並拿起你的公事包後,你下樓去,望出窗外,你看到你的孩子正在上巴士。她回頭並向你揮手。

你早了五分鐘回到公司,並親切地與你的同事打招呼。你的上司亦對你新的一天給予正面的評價。

看到兩者的分別嗎?

兩個不同的情景,由同一個開首所引起。但結局完全兩樣。

為什麼?皆因你的反應而起。

你或許真的無法掌控 10% 的際遇,但剩下的 90% 則可以由你的反應而定。

以下有一些實踐 90/10 定律的方法。如有人說起你的是非,千萬別當一塊「海綿」,讓那些攻擊性的說話像水在玻璃上一般的流走。別讓那些負面評價纏繞著你!

適當的回應能夠使你的生活免受破壞。一個錯誤的反應能夠使你失去朋友、生氣、甚或被壓力壓得喘不過氣來。

如果車子拋錨了,你會如何感想?你會生氣嗎?你會否猛擊車上的鐵鍊?我的一個朋友就把鐵鍊弄下來!你會怒罵嗎?你的血壓是否急速上升?你會否嘗試去踫擊他們?

誰會在意你上班遲到了十秒?為何讓車子破壞你的駕駛過程?

記著 90/10 的定律,別在意。

你被通知說你被辭退了。

你為何失眠與憤怒 ? 事情總是發生了。不如用你憂心的力量及時間去找尋新工作吧!

航班延誤了,而它將影響你一整天的行程。為何將你的怒氣發洩在服務員的身上?她並不能阻止事情發生。

如利用你的時間學習,或認識旁邊的乘客。不要憤怒,它將令你的一天變的更糟。

現在,你懂得了 90/10 的定律。實踐它,你將會發現它的驚人效果。嘗試實行它,你將不會有任何損失。 90/10 的定律非常神奇,而只有很少數的人懂得運用它。

結果呢?

超過百萬人沈溺在痛苦、嘗試、問題與心傷之中。我們必須理解並實踐 90/10 的定律。

願與各位共勉!

============================================

Convey既睇法,係咪出奇地同Ajahn Brahm好相似呢?雖然我地每個人生出來既樣貎、身材、天資都吾同,我地亦都無得揀揾李家誠做自己既老豆,但係,我地真係咁無助、咁可憐既受害者咩?

雖然每個人既起跑點吾同,但係真正重要既係你揀跑邊條跑道,同埋點樣跑.

我地今日既情況,係以前一連串選擇所積累落來既;同樣道理,明日我地會變成點,就睇你今日既選擇.

又,雖然我地控制吾到自己會遇到乜野人,更加控制吾到你鍾意既人會吾會鍾會返你.

但係,我地可以選擇繼續付出、信任,又或者選擇退縮、抗拒,甚至不再想信愛情,從此遊戲人間.條路要點行,睇你自己點揀.

依個世界,永遠係種瓜得瓜,種豆得豆既.咁你無理由落左西瓜既種籽但係想要佢生出青豆嫁.

好啦,到你終於都識得放青豆種籽落去,又吾淋水,又吾除蟲,咁都種得出豆,就真係無天理啦!

如果我地吾好好地對屋企人,又點可以期望有個幸福美滿既家庭?

如果我地吾花時間精神努力工作,又點可以期望自己事業有成?

如果我地吾真心對待自己朋友,又點可以期望友誼永固?

吾好怨天怨地怨際遇怨命運怨童年陰影啦!

吾好再賴人啦,我地既人生要自己負責.


P.S., 多謝各位關心,我今個禮拜返到來,公司發生左連串爆血事件,真係要我集中精神處理.
而家我變身消防員,全力救火中...