2009年4月29日 星期三

瘟疫

豬流感已經變種到人傳人,依個係咪就係傳聞中既世紀瘟疫?

上次香港沙士時,S其實就唔係好大反應,只係一生人第一次要載咁耐口罩囉。最記得既,反而係在沙士爆發初期既一場婚宴。

依兩位朋友呢,真係百無禁忌的。諗住結婚就在日曆上面「督」一個大家都得閒既日子;到佢向大家宣佈要結婚時大家一睇農曆...果時係「月破日,大事不宜」的...聽落,仲要大鑊過「不直嫁聚」。地點呢,勁囉,在正大酒店旁邊果間酒店度擺酒...

當時,所有既待應都戴住口罩既,因為係沙士初期,所有人客都無戴口罩嫁,S仲覺得口罩侍應上菜好有趣,仲差d要同佢地影相添...點知兩個禮拜後,香港成個悲情城市,所有人都戴口罩出街....


昨日要返深圳,在火車上面一直播有線新聞,一遍又一遍地講,墨西哥死左幾多人,美國各州有幾多確診病例,全球有幾多確診病例...仲有,豬流感已經傳到亞洲,在南韓有一單好可能係確診病例....然後,乘客有人大聲討論豬流感應該點預防,有人話食銀翹解毒片就無事,立時佢地就開始硏究最近既藥房在邊.....

S朝早本來係有d唔舒服的,有d頭疼,好攰;聽完依45分鍾既豬流感新聞之後,一起身,頭暈、發汗、心跳....直頭覺得有D腳軟。哈哈,好明顯係,嚇到腳軟。

S同自己講:「唔駛驚,唔駛驚,恐懼先至係病既真正原因,一驚免疫力就會插水!」

亦都諗返Ajahn Brahm在上次沙士時講Fear既一小時講座。

好多人,其實唔係病死,而係嚇死的。

我依兩個朋友,無有怕地照在沙士瘟疫既月破日,在大酒店旁邊結婚...無病無痛,依家都仲係快樂地享受既婚姻生活。

2009年4月27日 星期一

同理心

同理心係乜野?同理心係一種感受到其他人感受既能力。

其他既一d天份,比如IQ,perfect pitch,樣貌,身高,大部份都係天生既,後天都有d影響,但係,唔會太大囉;但係同理心唔同,同理心主要係後天學既,靠既係自己有越來越多人生閱歷,同對人性既了解。

一個真正有同理心既人,係可以感受到人地自己都唔覺察的感受的。

比如在禮儀師之中既一場戲,老禮儀師同小禮儀師遲到左五分鍾,死者既老公就一個雷公咁企在門口等佢地,黑口黑面仲雷公咁響地閙爆佢地。

男人表臉上係發火,憎人遲到,但係老禮儀師睇得出佢忿怒既面具下面,其實係因為愛妻離去既傷疼不捨...日本大男人又唔喊得,未唯有發脾四囉。

老禮儀於是好小心地睇男人妻子既相片,將佢化得好靚,最貼心既係,問佢地攞左妻子生前最喜愛既唇膏,令佢十足生前一樣。

依個剛打完雷既男人都追出來講多謝,話,佢一世人都未見過佢太太咁靚....

老禮儀師點解會咁勁,十足識心靈感應明白到男人真正既感受需要呢?

佢自己講返當年自己點入行,係因為佢太太過左身。老禮儀師呢,就幫太太扮到好靚咁送佢走,然後開始依盤生意....老禮儀師唔只當依份係生意同工作囉,佢覺得自己係有mission既。

同理心,就係咁,慢慢學返來。



又,故仔雖然浪漫,不過呢,男人最好米等到太太過左身先至來贊佢靚,應該係在太太生勾勾時就好表示啦!

又又,睇戲時有一個伯伯坐我旁邊,到最後小禮儀師同佢爸爸化妝時,伯伯喊到好大聲,大聲到在強勁音響下S雖然個頭郁都唔郁,都好明顯聽到佢既sun鼻同嗚咽...伯伯既有爸爸又係爸爸吧,依部戲真係男人的催淚彈....好似仲未落畫呢!

2009年4月24日 星期五

故事

在五十年代,有一個西藏的年青僧侶,由西藏翻過喜瑪拉雅山逃亡到印度,在冰天雪地的山中行左咁多日,佢又饑又渴又涷又累,終於比佢見到一戶人家,於是過去化緣乞食。

戶中只有一個妙齡少女,而女孩一眼就立時愛上僧人。

於是,少女講:「法師,出面又涷又大風,屋入面有暖立立既火爐,你不如入來休息啦。」

僧侶:「你有冇搞錯!我係出家人,點可以同你獨處一室?」

咁,少女就講:「法師,我好想好好地煮一餐飯比你食,我有一隻羊但係太大隻,我殺唔到呀。法師,你幫我殺左隻羊,我煮羊肉煲比你食呀。」

僧侶:「你有冇搞錯!我係出家人,你點可以叫我殺生?」

少女立時講:「Okok,唔殺唔殺。法師,但係我真係好想好好地煮一餐飯比你食,我鄰居有一隻羊仔,在山頭食草,你拖隻羊仔過來,羊仔我殺到,我殺呀!跟住煮羊肉煲你食。」

僧侶:「你有冇搞錯!我係出家人,你點可以叫我偷野?」

少女改變策略:「咁,一係你問過我鄰居,話比佢知係佢老公應承我比隻羊我既,咁你先拖隻羊仔過來,咪唔係偷囉。」

僧侶:「你有冇搞錯!我係出家人,你點可以叫我講大話?」



少女見一切方法無效,於是在火爐旁邊攞出一個玻璃樽,倒出金黃色既瓊漿玉液...立時,滿室芳香。

少女雙手捧住酒杯,臉上掛住最甜美既笑容,温柔地講:「法師,講左咁耐,你都口渴勒,飲左佢先啦。」

唔講唔覺,一講僧侶先發展自己原來已經好口渴,於是接過杯子,飲左一小口...好味!...於是一下子飲晒...


僧侶飲完之後立時智商降到負二十,不知羞恥為何物,狂歌喪舞裸跑,跟住同鄰居講話佢丈夫應承比晒d羊佢,仲親手殺左隻羊來整羊腩煲,酒足飯飽後,當然要「犯下所有男人都犯的錯」。


功德林就咁燒晒。

依個深淵好深,到依家都仲未聽到僧侶跌到洞底的聲音.....


******
佛陀教所有在家弟子要守五戒:殺,偷,邪淫,妄語,酒。

當年我第一次受戒時,只受前四戒,酒嘛,我唔喜歡飲,但只要唔飲醉我都唔覺得係一個問題,無乜大不了。

但,原來,酒是很大鑊的,會令人蠢的。飲左就會好容易失控,戒酒係為左保護其他既戒。

而且,唔想踩落浮沙就一步都唔好行過去,唔好比佢開始,一d都唔好飲。


又,你以為魔鬼係果個張牙舞爪地追住你,用大聲公鏗你個頭,呼喝叫你「跑快d」既Mizuno嗎?

嘿嘿,真正既惡魔係果個甜美既少女,身材好過阿Rain既型男,同只應天上有既瓊漿玉液。

2009年4月19日 星期日

原諒

有冇睇過歲月的童話?我地經歷既遺憾痛楚失望,令我地永遠留在果刻,心裏面一直住左果個無助弱小既小朋友。

我們都是一樣的。

都試過幼小無助,保護唔到自己,亦保護唔到自己最愛既人,比人蝦,比人凌辱。

都試過黑心殘酷忿怒貪婪,犯左自己到今時今日仍然都耿耿於懷既錯誤,傷害左人,後悔莫及,慚愧內疚。

過去既已經過去左,有d仲過左好耐好耐;科幻小說係幻想來的,無辦去再回到未來的。

我地其實分分秒秒在改變,依家既我同以前既我已經唔同。

佛說人世間既一切痛苦緣於無明,而忿怒其實係一種暫時瘋狂。咁,你無理由仲嬲一個無知又癲左既人姐.......原諒自己吧,原諒果個過去的我。

發脾氣係對人的忿怒,內疚其實係嬲自己,兩樣野本質都係一樣的,都係,嗔。

其實,「我」心底之中仲有光明,仲有向善的願望的。

而其實,人人都承受住一模一樣的痛苦。

我們都是一樣的。

當你連自己都可以原諒時,就可以原諒全世界。


Ven. Ayya Khema, Loving-kindness Meditation - Forgiveness

Have forgiveness in your heart for anything you think you've done wrong . Forgive yourself for all the past omissions and commissions. They are long gone. Understand that you were a different person and this one is forgiving that one that you were. Feel that forgiveness filling you and enveloping you with a sense of warmth and ease.

Think of your parents. Forgive them for anything you have ever blamed them for. Understand that they too are different now. Let this forgiveness fill them, surround them, knowing in your heart that this is your most wonderful way of togetherness.
Think of your nearest and dearest people . Forgive them for anything that you think they have done wrong or are doing wrong at this time. Fill them with your forgiveness. Let them feel that you accept them. Let that forgiveness fill them. Realizing that this is your expression of love.

Now think of your friends. Forgive them for anything you have disliked about them. Let your forgiveness reach out to them, so that they can be filled with it, embraced by it.

Think of the people you know, whoever they might be, and forgive them all for whatever it is that you have blamed them for, that you have judged them for, that you have disliked. Let your forgiveness fill their hearts, surround them, envelope them, be your expression of love for them.

Now think of any special person whom you really need to forgive. Towards whom you still have resentment, rejection, dislike. Forgive him or her fully. Remember that everyone has dukkha. Let this forgiveness come from your heart. Reach out to that person, complete and total.

Think of any one person, or any situation, or any group of people whom you are condemning, blaming, disliking. Forgive them, completely. Let your forgiveness be your expression of unconditional love. They may not do the right things. Human beings have dukkha. And your heart needs the forgiveness in order to have purity of love.

Have a look again and see whether there's anyone or anything, any where in the world, towards whom you have blame or condemnation. And forgive the people or the person, so that there is no separation your heart.

Now put your attention back on yourself. And recognize the goodness in you. The effort you are making. Feel the warmth and ease that comes from forgiveness."

May all beings have forgiveness in their hearts!

(好多謝你呀!)

2009年4月17日 星期五

當年....

朋友問我有冇關於管理既書介紹,佢想知幾時應該放手比下屬做,幾時應該自己處理。

關於delegation既書,有用有point既,真係一本都未睇過。反而在blog度有好多人講喎

當年我一升,中間一D gap都無,忽然就要睇成條team。仲要最慘既係,依條team係公司新近收購返來的,人事作風文化完全唔同,連workflow同電腦系統都係新的,我又要學佢地果一套,又要教佢地我果一套,自己都唔識管理之時,仲要做埋change management......

結果,當然好大鑊。今日睇返,S當日既管理質素係肥佬的,連最基本既溝通都做唔到。

S當年既公司一向自持係mnc,講數據做report,樣樣要有data support,工廠要有組織系統housekeeping,管理要scientific...新收購返來既公司,無process無documentation不掟常理出牌,要sell要有presentation甚至要求有creativity,只要你搞得岩,無人有興趣知你點做,咁你搞唔惦,亦唔會有人幫手....

S既感覺係,由打開「天幕」導彈防禦系統,一下子跌落凡間在阿富汗打巷戰。以前個個都係大學生,話頭醒尾,依家一睇,有人HKCEE全面Uncle,有人以前做開空姐,有人仲一直係店舖sales或餐廳waitress,依份係第一份寫字樓工.....因為英文能力問題,email睇唔切,回覆亦令人完全唔明白。全team人成日都做錯野,遲覆漏覆唔覆,比人投訴炸型,次次最甘既大鑊野都會去到S度。

S當年自比消防員,日日返去救火,次次衝入火場之後,都比人燒到焦頭爛額咁出來。有時,S真係會忍唔住摸下自己塊面,睇下有冇污漬,而且長期覺得自己既頭髮係樹起的。

在咁怒髮衝冠既情況之下,S對下屬既態度又點可能好?

雖然S有一個好堅守既原則:唔鬧下屬。因為,S覺得在公司潑婦罵街又或者粗口侍候,唔只無家教咁簡單,仲要於事無補,反而令office充滿怨氣同負能量!但係,唔係大聲先係鬧人既,柄人亦都唔需要粗口,S雖然自以為無表現出來,但係,成條team其實無人唔知S係睇唔起佢地的。S本來就是一個驕傲的人,同自己teammate既磨擦,真係無日無之。

嗯,當時既日子係點過既...只可以講,人既潛力係無限既囉。

直到後來出左一單超大鑊,S要同一個teammate一齊收拾賤局。感覺真係,CK老闆最憎人講既:難!好難!好難好難!

在捲起衣袖不問點解會搞成咁,只諗可以點擺平時,S先至有機會由全新角度睇返依條team。誠然,佢地英文能力,甚至有d人既表達能力都唔係幾好,但係,佢地有令人感動既工作熱誠。雖然睇email要查字查,但係佢地亦都肯學,S親眼見到依個妹妹既英文有明顯飛躍,之後同佢傾返,原來佢係靠睇S點樣寫點樣答email......果下真係好感動的,咁努力上進既女仔,你仲想點?而且,佢地果個好山寨城系統雖然比較容易出錯,但亦都有彈性好多,有一點複雜既情況,在S公司係基本會投投做唔到既,但在依度就好輕易地做到。如果你係在樹林密佈既森林入面,有高科技既GPS都無用既,反而阿黃帝據說五千年前發明既指車針會有用囉,一間公司可以在短短十年間冒起,都唔係無原因。

有依個Paradigm Shit之後,S都好想講自此之後脫胎換骨,成為人見人愛,車見車載既上司....當然無D咁好既事,S之後仲做錯好多野,衰過好多鑊;仲有時衰完又衰又衰又衰,真係好想刀仔吉大肶!

但係,依件事比S最大既體會係:要由其他人既角度來睇同一件事,你先至有可能做到野。你唔放開自我,真係試下著落人地隻鞋度,係唔可能知道發生乜事,更談不上什麼管理。

好老生常談我都知,由古至今都咁多人講未就會因為講得好岩囉,亦都因為知易行難,所以總有人不停咁講。

2009年4月16日 星期四

錢甖


依個唔係手錶,依個係正能量錢甖
佢有25個memory,每個memory可以記100個 lap time!!!你仲可以check返每一次跑步既日子,每一個圏既速度同總時間,係克苦流汗的記錄。
好想快d跑夠25次,打爆佢!
NB大減價,盛惠HKD299,Time Square NB Shop有售,仲有男裝

2009年4月14日 星期二

關......

係,又來,簡直係沒完沒了....


S回首前塵,其實,都不過係兩個月前,S都仲係一個正常人。當時S好滿意自己年年都跑十公里,佢既手帕交粉紅色怪(aka LHY)無論點樣威迫利誘都呃唔到佢去跑半馬。


但係,唉,都係朋輩影響。S識埋晒d傻瓜,終於都同流合污,沾染左傻氣,開始覺得只跑十公里唔夠好玩,要挑戰自己;其實本來只係講話跑半馬,搞搞下,變左下年要跑全馬。


Well,由十公里去到四十二公里唔係講笑的,唔想好壯烈地比人掃上車,之前一定要有組織既長期鍛鍊。在咁關鍵既時候,由天跌落來一個教練。教練唔只係S在網上新近相認既舊同學,仲要熱愛長跑,仲要住得好近...教練平時係一個好人,但係,一講到「跑」就會立時變臉,化身「穿Mizuno的惡魔」!

S細個時實在睇太多日本卡通片,一講到教練就諗起果種你跑步佢踩單車追住你,用大聲公嗌:「跑快d!快d!」仲要你一下跑得慢d,教練就會用大聲公來慳你個頭....今次真係天亡我也,唔係,係天助我也至真。


第一次練跑之前,教練仲要擱下狠話,一步都不能走!


所以,當昨日下午突然風雲變色雷電交加狂風暴雨,S同教練講電話時雖然儘量表現得失望,但係實在是暗暗高興。嗱,今次係天要下雨呀吓,S發誓真係無跳過求雨舞!


誰不知,好快d雨停晒,天清晒仲要出埋太陽,嗚嗚...到跑步時仲要地都吹乾埋...............


離遠就見到教練兇狠地推緊牆....來拉筋。不過好在唔見有單車....(其實,教練識唔識踩單車呢?會唔會遲d學大叔咁,乾脆玩埋三項鐵人呢?)

你以為惡魔會青面獠牙嗎?你咁諗實在太天真啦!惡魔係人好nice,笑笑口咁,一步步推你既人。教練話就話比S用自己速度跑,佢只會在後面跟,但係一跑佢就帶先,S只好跟住越跑越快囉。成條路咁長但只有一個燈口位,教練果然一步都不走,等過馬路時都仲要原地跑,仲要一見無車就衝出馬路....

跑完一個圏之後,教練笑笑口話:「如果下個圏都keep翻今次既時間就好啦!」

嗚~~~


******

S係第一次路跑,亦係第一次跑斜路,以前上咁長既斜S一定會行的。

斜路果然不同凡響,一上坡就知味道。S好少會跑到肚痛的,今次都要大半程都一路跑一路痛;S本來一直都只用鼻呼吸的,但係第二次上斜時都真係透唔到氣,要用埋口來吸氣....

但係,S自己知自己事,其實如果真係要跑既話,係可以再跑多一個圏的.....今朝起身,全身都無痛,連酸軟都無....證明,其實運動量仲未夠....


但係,果個可惡的聲音都仲係嘈:「唔跑啦,唔跑啦~」

又再一次證明,個Glass Ceiling唔係體能,而係自己個心。

個心好似係你既,但又唔係你既。心好任性囉,佢想點就點!

其實,S做人咁耐,有幾多次真係盡晒力,一d都無留力呢?


跑步的感覺,真係打翻調味盤,五味雜陳。

2009年4月7日 星期二

過程

聖嚴法師說:

成功就是起點
失敗就是經驗
過程就是結果
現在就是全部



依四句說話係幾年前去法鼓山打禪七時聽法師轉述的,一直來來回回地不停自己讀,覺得,有好深既道理。

點解「現在就是全部」呢?因為「過程就是結果」。

每一分每一秒都是平等的,都是一樣重要。收到成績表、跑步衝線的一刻好似好重要,好似果一刻先係結果或者收成....唔係嫁,之前每一次練跑、每一次上堂、每一份功課、每一刻温書...「過程」的每分每秒都是「結果」。

所以,現在才是最重要的。

只有現在才是真實的。

除左現在,我地其實什麼都沒有。

2009年4月6日 星期一

六四

人民不會忘記。