2007年6月22日 星期五

福佳始終有你

各位網友: 請支持「慶」七一大行動,七月一日Blog界齊齊post出林忌既大作【福佳始終有你】.

小妹七一唔在香港,依家post定先.

2007年6月12日 星期二

生命中的小幸福

半夜醒來,外面狂風暴雨,打雷閃電.

我又伏在窗邊看閃電.

閃電既顏色係白裏帶藍既,大部份都離我地好遠,只見到天空閃光.如果好彩既話,可以見到從天而降垂直既一條閃電,一下子劃破長空,然後有一聲好似爆炸咁既雷聲.哇,好大既威力!

好希望有朝一日可以見到閃電劈中對面樓既避雷針,咁就刺激囉.

閃電仲可能係生命之源添,佢高壓既電力,令空氣中既氮合氨基酸,氨基酸再組成蛋白質,成為生物既基礎.閃電仲可以淨化空氣,令懸浮粒子沈於地面,所以雷雨過後,空氣特別清新.

大自然真係令人敬畏,生命又真係奇妙.

外面橫風橫雨,我地都可以好安全地坐在屋企笑看風雲,真係我地既hunter-gatherer祖先發夢都估唔到既野.有瓦遮頭,真幸福.

落雨,又駛乜驚喎!

##################################

小白屋既伯爵奶茶布甸,有濃濃既茶香加上奶香,吃落齒頰留香,真係有幸福的味道.本來以為伯爵茶只適合淨飲同加檸檬,原來加奶都咁好味.

以前有部電影叫「濃情朱古力」,女主角煮得一手好菜.當有人問佢點解煮得咁好吃時,佢兩次都答:要用愛來煮.

原來d甜品係老闆娘親手整既,唔怪之老闆成日都笑口常開,周圍向客人介紹甜品啦!

##################################

放工等車時忽然傳來陣陣香味,原來巴士站旁邊有夥玉蘭樹.在黃昏既微弱光線中,隱隠見到白色既玉蘭花.樹枝樹葉既形態都好美,佢一定係一夥快樂既樹.

夥樹一直都在度,只等我見到聞到佢.

##################################

買左一對好可愛既通心南瓜型銀耳環,好漂亮啊!我要萬聖節時戴...其實今日已經戴左.

2007年6月11日 星期一

影相

以下既內容情節雖然好假兼笑爆嘴,但絶對係真人真事.


話說我幾年前去北海道時,曾經去過涵館.涵館出名既除左魚巿場之外,仲有佢一班叮噹(我係老餅,所以係叮噹,唔係多啦A夢)列車.依班火車就犀利囉,成個日本得一架,由外殼到內部裝修,全部係叮噹主題.

班車隔日在涵館開出,去一個唔記得乜野名既地方.好多遊客都會學似我地咁渣住Rail Pass入去,同架車影完相之後就會走,反正Rail Pass已經包左,唔駛另外再比錢.

一入到去,大家都好興奮,每部車箱都有唔同既主題,叮噹,大雄,靜宜,牙察仔,仲有技安.車箱入面,仲有好多公仔同靚靚佈置添呀.咁我地d香港人當然第一個反應就係狂影相啦.仲碰到其他一樣係在香港來既人,有個男子自己一個人來,見我地幾個講廣東話又好嘈既女仔,就揾我地幫佢影相.

咁我地跑下跑下都散開晒,依位哥哥仔在一節車箱拉住我,要我落車影返上來,佢就在門口擺post.

依個時候,月台開始播叮噹首主題曲...我都仲咪醒水,覺得日文版幾好聽呀咁.

當我剛剛影完,首歌都剛好播完.之後,可怕既事就發生左---度門閂左.

果一刻,我地兩個都呆左.好似做戲咁,你眼望我眼.之後,架火車仲向前行添.事情發生得太快,我地兩個人都唔識出聲.

咁樣,依位都幾有型既哥哥仔就跟架火車走左,留返我同佢部相機在月台.我睇住依部單面反光鏡既Nikon相機,好大個鏡頭,但係好輕.就算我依d咁唔識貨既人,都知道部相機一定好貴.

我渣住部相機揾返d朋友求救,佢地最先仲以為我係講笑.大鑊,我地果晚就要坐JR返去扎榥嫁啦,而家渣住人地部分分鍾係物主老婆既相機,真係點算?

好彩我地同行之中有人識講日文,一翻解釋之後,我地去到失物認領處.更好彩既,係依位哥哥都識日文喎原來.火車上已經有員工打返電話返來,話哥哥仔會坐下一班車返來,叫我地擺低部相機在車站度.

咁,我地先可以放低個燙手山芋,放心地繼續旅程咋.

我在依度呼籲2003年11月有去涵館既果位朋友,可唔可以send返張相比我留個記念?依d咁死似做戲既經歷,怕即都唔會多.而且,如果唔係我d朋友做證,真係無人信依件係真事呀,實在太搞笑啦!

2007年6月9日 星期六

非旁觀者的感覺

睇左火火既依一篇,令我回想一次既育嬰經驗.

我有個中一識到家陣既姊妹生左個女,在BB半歲大時我又去探佢,大家見到BB狀態幾好,決定帶埋佢一齊去吃tea,咁就開始左我個難忘旅程.

我地有成兩個人,就推BB車去,我係推得好過癮嫁,直至要上van仔.

我先抱BB上van仔,佢媽媽就負責閂BB車.但係唔知點解搞好耐都閂唔到,架van仔就越來越滿,司機哥哥最後開口叫我落車...

一翻努力之下,先知原來上左safety lock.咁先閂到BB車上到van仔去商場.

坐低叫左野食之後,本來乖乖又好奇既BB開始悶,跟住開始喊,而且喊到收唔到聲.好多BB喊時只有喊聲無眼淚,但係依個BB唔同,d眼淚大滴大滴咁流落來,真係睇到心都痛,仲會時不時餵佢飲水,等佢補充返失去左既水份.

咁餐廳咁多人,BB喊實在太嘈,我地唯有輪流一個食tea,一個抱BB出去行下.阿BB又真係有佢媽媽既風格喎,比佢睇乜野都喊,但係一帶佢睇鞋就會收一陣聲,眼仔look look咁,停一陣先再開始.途人見到我依個婦人抱住個喊得咁悽涼既BB,都會望多兩望.唉,我都唔想既,但係BB決定要練習肺活量,我又有乜辦法.蝦,BB你咁喊法,會唔會聲沙嫁.

在大家都飛快地解決左個tea之後,立時打道回府.BB可能喊得太攰,開始唔喊啦.

在我地排隊坐van仔時,前面有一個太太,又係抱住個BB,仲要加上一個大袋同一架BB車.嘩,我地兩個人分工合作都搞到好狼狽,佢一個人一袋二袋咁,點上車?依個時佢後面有另一位太太主動伸出援手,幫佢拎BB車,咁佢先至順利上到van仔.依個畫面,在我地兩個抱住BB既人眼中真係特別温情.我個friend話,果位拔刀相助既太太,一定自己都有BB,所以留意到其他媽媽既需要.

真,有好多野,真係非旁觀者的感覺.我以前真係從來無留意d媽媽既需要,我又行得咁急,真係就算佢地想叫我幫手,都唔一定來得切截停我.經過依一役之後,我先至會對帶住BB既父母特別留心,睇下可唔可以幫到手.

有時,趕時間都唔係一個藉口來既.

2007年6月5日 星期二

燭光

依個一年一度既節目真係好鬼悶嫁.次次都係王丹、華叔,又唱來唱去都係自由花、血染的風采同中國夢.

千祈唔好著裙去,因為要坐地下,仲係露天,落雨就會照頭淋,雨具同水都要貴客自理.今年仲要鬼咁熱,真係可以聞到隔離果位先生既汗味,真係全球暖化呀.嘩,仲要點蠟燭添,真係好熱呀!

咁辛苦,做乜要來呢?

其實,如果可以既話,我係唔會去既.咁辛苦...

但係,每一次最感動既,仍然係宣讀六四當晚死難者既名單.今次我仲坐得好近大銀幕,可以睇到死難者生前既照片,同佢地滿身鮮血,又或者墓碑既相.佢地都好後生,正係前程似錦既年齡,但係一夜之間失去生命.其中十六七歲既後生仔,如果仲在生,而家都已經三十幾歲,可能已經結左婚,生埋仔.

最傷心既,係一班天安門母親,佢地又再一次多謝香港人無忘記六四,我地依個集會對佢地依班每日都被監控既人來講,係好大既安慰.要知道,佢地痛失親人之後,連在公開場合弔唁既自由都無.而有一d死難者既家屬已經辭世,只留下平反六四同要昭雪沈冤既遺願.

更大既問題係中共政府一直唔承認當日有屠殺在北京既學生同巿民,佢地一日唔正視依一段歷史,一日都無可能真正得到認受.只靠經濟發展係唔足夠既,除左吃飯之外,人仲有對公義自由民主既追求.

點解馬力會講出依一番不經大腦、等同政治自殺既言論呢?佢真係唔知佢會令到六四燭光晚會更多人?會唔會就係因為佢心虛?

十八年轉眼過去,只見華叔老矣.唔知佢依家佢仲係咪朝朝游水?望住佢臉上果d好深既皺紋,不禁諗起陸游既【示兒】:

死去原知萬事空
但悲不見九州同
王師北定中原日
家祭无忘告乃翁

希望我地唔駛等好耐先可以見到公佈真相,希望好快我唔駛再去六四集會,要用腳來表示「不想提起,未敢忘記」.

2007年6月4日 星期一

SUN

唔好意思各位,由於我confirm左近排個天真係玩緊我,所以我d正能量真係用晒,而且我仲要sun.

好鬼負能量嫁吓,跟住d野,如果心情唔好,真係咪睇,費事比我傳染.


事情係由一個人辭工開始,新人請唔到,我老闆又死都唔肯借人比我,又係爆血大旺季,咁,就開始連鎖反應...

於是,我一星期之內收左七封辭職信,仲有人係即走既.

同時,有兩個大肚婆前後腳去生仔.

再加上有個同事入左醫院做手術,本來話一星期可以返,但係情況比較嚴重,要兩個星期.

今朝,佢確認生cancer,要十月先返.

之前既所以backup plan全部都用唔到啦.

而我,亦頂唔順辭左工.

有趣既係,我老闆之前死都唔借人比我,到我辭工,就借到人來...但係已經太遲,都係唔夠cover.

最慘既係我有焦慮症既同事,要幫手pick up我d野.我真係好唔好意思,但係我既身體先係最要緊.我已經做到雙手不停出汗,兼心跳想嘔,再做落去我真係驚連我都焦慮症埋一份.我同個同事一講,佢就鬧鬼我,話我都走兼會去旅行,係無可能有焦慮症既.

咁又係.

我個replacement聽日會出現來傾吓個情況,我會出盡法寶令佢肯來既.



希望我患癌既果位同事,要樂觀積極面對,祝佢快d好返!

寫到依度,我又忽然明白,其實個天都仲係對我好好.

起碼我平平安安,身體健康,咪已經係好大既福氣囉.

一d小挫折姐,無乜大不了.

而且,咪趁機放暑假囉,好好休息同整理一下自己.

嗱,各位唔駛擔心,我無野,而且會好好地鍚自己,你地肯聽我sun吓,我已經好開心嫁啦!

2007年6月2日 星期六

支離破碎

當年,其實完全無人預料到會變成咁樣.事情開始於胡耀邦逝世,跟住,就好似萬花筒咁,轉出一幕幕既回憶,一幕幕既影像.

戈爾巴喬夫訪華,王丹下跪,柴玲暈倒,吾爾開希著睡衣見李鵬.

天安門廣場人海旗海漂揚.

學生示威攞住「小平您好!」既標語,Giodano賣寫住「小平您好!」既tee.

首鋼工人都出來示威,學運帶動工運.

毛澤東既畫像被淋紅油,立時狂風暴雨大作.

香港百萬人大遊行,我一家四口一齊上街...好熱,覺得叫口號好瘀,行過既車都會響號支持.

遊行人數太多,快活谷馬場緊急開放比遊行人士.好開心,估唔到未夠十八歲之前可以入馬場!

民主歌聲獻中華.

然後,雙方膠著.趙紫陽到天安門廣場,在學生既包圍下,苦口婆心勸學生回家.




一個星期六晚,事情急轉直下.

忽然,解放軍入城,記者被迫徹走.

當晚,全家人都無訓,一直睇新聞.

亞視有位記者一直留守天安門廣場,用手機打返來香港新聞中心報導.

只記得,佢一直喘氣;香港既主播,一直問佢既位置安唔安全.

好多消息,好亂.

坦克、裝甲車駛入北京巿,解放軍開熗!

長安大街上,有人用木頭車推走滿身鮮血既人,大家爭相走避.

佢地殺人!!!

點解要殺一d手無寸鐵既人民,自己既同胞?

在綠色既煙霧中,解放軍開入天安門廣場.

民主女神倒下.

北京戎嚴,學生工人領袖全部被通緝.

所有領導人,全部不再著西裝,換上中山裝.李鵬在叫囂.

袁穆話,天安門廣場無死一個人.

北大學生宿舍有人扔小瓶.

人民氣瘋了,王維林站在坦克車前...從此,下落不明.

支聯會召集全港巿民大遊行,但係香港果日掛八號風球.

傷心,激忿,難過.

報紙開天窗---痛心疾首.





兩年後,六月四日,我考完會考,上到北京.

天安門廣場藍天白雲,人民英雄紀念碑有兩個解放軍註守.

我在紀念碑前走了兩圏,立時有解放軍來問我:「幹什麼?」

可以幹什麼?你有熗.

只好走去毛澤東紀念館,看那蠟像一般既屍體,那死而不疆既幽靈.




以前俠義兒女,死前慷慨就義,會說:「碗大的疤,十八年後又一條好漢.」

唔知道,十八年前犠牲既人民,而家在邊?

十八年間,經濟騰飛,記憶褪色,當年出生既嬰兒,依家已經攞成人身份證.

但係,中央仍然係定性八九民運為一個動亂,多得當年領導人英明果斷,我地先有今日既繁榮.

在大是大非既問題上,一樣有人敢口出狂言,叫我地揾豬來做實驗.

還幸,親身經歷果一段歷史既香港人仲記憶猶新,香港仲有言論自由,厚顏謊言者只好北上逃之夭夭.




不想提起,未敢忘記.

一日八九民運未平反,真相未公開,維園都會有燭光集會.

到時見!