2008年12月30日 星期二

Never say Never

依個世界,真係Never say never。

比如,次次行街時,我一講親「依間店d野唔岩我。」咁就多數好邪地,唔知點解會買一大袋野走。

比如,昨日先講完報紙有強力negativity bias,只有見死不救先可以上頭條,今日報紙頭條就係:醫生醫好人!

Wow...蘋果繼報導免費送長者早餐既東菇亭之後,又一次帶出暖流!

我相信,醫生、急救員、同熱心途人合力救人既感人故事天天在發生,我自己都試過在街見到有個男人頭暈,食店立時攞出椅比佢坐,jump水比佢飲,街坊七嘴八舌問佢駛唔駛睇醫生,佢話ok咁我就攞佢手機call佢個仔落來接佢。

有時候,報導一下依d事,先至係反映真實社會既各種情況。

=====


昨天有一個勁搞笑既新聞,就係陳水扁在自己再次被收押前一日,唔係花多d時間陪自己年老病弱既母親,唔係花多d時候陪自己老婆仔女,亦唔係又搞煽情群眾運動...佢竟然係運用依個咁寶貴既自由時光,買左面額2500萬冥鈔,到嘉義市地藏庵,燒給地藏王菩薩,化解他上世同邱毅的宿怨。

面額2500萬冥鈔有幾多?多到塞滿一架車,搬到佢既警護索晒氣...乜陳水扁唔係基督徒來嫁咩?

真係:好Dry!


邱毅何許人也?佢係國民黨籍立委,仲係台大經濟學博士,美國康乃爾大學博士後,讀書人來。邱毅被台灣傳媒封為爆料天皇,扁家既貪污洗錢案邱毅差唔多日日有新料爆,仲要單單都係堅料,所以邱毅一出,一定有大班記者去圍佢。

佢同陳水扁既交手自「三一九槍擊案」起。記唔記得2004年陳水扁競選連任總統時,本來國民黨既連戰在民意調查係領先既,但係,在選舉之前一日,發生一單疑似槍擊案,有人向陳水扁同呂秀蓮各開一槍,當時情況同消息一片混亂,而陳水扁亦都係一團亂局之中,以些微票數,出奇地羸左大選,連任總統。

依單咁既槍擊案,真係超多疑點,比如,個槍手話咁快就比人滅口,話畏罪自殺喎。仲有好靈異既係,陳水扁件外套無穿,但係佢又可以中彈喎,真係....用Quantumn Mechanics加「超弦理論」(即係String Theory)都無辦法解釋到依個物理現象!

咁,邱毅份人有獵犬一般既性格,就當然死咬依單野不放啦!佢在三一九之後既兩日,三月廿一日就帶領群眾沖擊高雄法院,仲因為依單野,被控「首謀聚眾妨害公務罪」(係,我都以為依個咁騎呢既罪名在大陸先會有,點知,well,原來台灣都真係中國既一部份囉),坐左七個月監。

中間打官司時,邱毅既老婆同佢離婚。入到監,邱毅話,陳水扁特登搞佢,有好多小動作。比如,成日都揾d癮君子同佢同倉。大家都知,毒品依家野真係「不可一,不可再」,食得多,真係會痴線,會發癲,會打人,而且,仲嘔到周圍都係!

Well,咁,大家都唔難估計,邱毅最愛既小說係...《基度山恩仇記》啦!

邱毅一出監,就立時開始佢既調查同爆料。佢既料,亦都促成今時今日陳水扁一家人被起訴!


咁依單野,明明係今生今世陳水扁自己做既好事,阿扁又會低能到賴什麼前生宿怨。咪玩啦,咁樣賴法,真係完全不負責任!

今朝東森新聞去訪問在地藏庵幫陳水扁燒冥鈔既婆仔,問佢燒左冥鈔有冇用。婆仔好有point地講,依個唔係恩怨問題,而係是非問題,如果陳水扁有貪污就打唔甩!

依d道理,婆仔都明。但係,一世聰明,台大法律係第一名畢業既陳水扁竟然睇唔通....


今日,陳水扁又要返入去坐,我同阿媽兩個追依單新聞追到上左癮,雖然十分不齒陳水扁一家人既所作所為,但係,我地兩個都不免有d唏噓。阿媽話,佢咁樣出一出來又要返入去,真係寧願無出過來,今次入去佢既感覺真係會好悽涼,好慘。

阿媽雖然一把年紀,但係都好天真好傻。佢在度講,可能陳水扁經過今次之後,真係會開智慧,真係會參悟一d人生既道理,可能...連陳水扁都可以改邪歸正!

嗯,我呢,都有d贊成嫁。佛說點解人間會有苦呢?兩個字---無明

佛就比較善良,用詞温和,我講得白d,其實,人會受苦,就係因為無知

我地被自己所蒙蔽,迷失左,所以做左一d害人害己既野,所以無論係咪大隻佬,都一樣要唯有業隨身。

但係,今日做錯,唔代表一定永永遠遠無得救,雖然,「放下屠刀,立地成佛」依d事件真係非常少見,咁只係因為做到依樣野好難,但係,唔係話無可能嫁喎。

所以嘛,都係Never say never,個個人呢,始終都係有希望既。


我諗。

2008年12月27日 星期六

禮物

唔知有冇人留意到在平安夜發生依單新聞

當日既電視新聞之中,亞視同有線都有報導依件事,但係最多人睇既無線新聞無報導。

因為,唔夠「新聞價值」吧!

醫生醫好人,又點可以成為新聞?醫護人員見死不救先至可以做頭條嫁嘛。依位蔡源文醫生行醫十年,其實已經救左五六個在佢診療所門外暈倒既病人,但係,之前一次都無人報導過佢喎。今次,蔡醫生同一班醫療人員救途人,可以出到報紙同電視新聞,依個先至係真正既「明愛效應」吧!

在大家在睇新聞時,請記得,所有既新聞編采都有Negativity Bias既,正所謂No news is good news,好人好事既「新聞價值」極低,大部份時間都只可以「掹車邊」,上下陽光版呀花絮依d唔起眼既版面,佔郵票咁大既地盤。

咁,新聞報憂不報喜本身無乜問題,我都唔想香港有朝一日好似中央台咁,唔係講黨八股就係高官去邊度出訪,人地點樣讚佢同送左乜野禮。

但係,如果你當左報紙講既野就係現實之全部,咁就好大鑊啦!你會以為依個世界只有仔打老豆,男盜女娼,強姦亂倫,殺人放火,同埋,終於都因為聖誕節而停左幾日既「金融海嘯下的日子...」囉。

在依個資料爆炸既時代,我地更加要保持清醒,明白世界仲有好多默默無聞既人,盡心盡力地做好自己本份,仲有好多人,願意在冷冬之中送暖。

蔡源文醫生同一班醫護人員,在發生左明愛依件咁令人心痛既事件之後,在平安夜救左途人,以行動證明人間有情,醫護人員仍然是仁心仁術...就彷如送比所有香港人一份聖誕節禮物...

問題係:你收唔收到?

人生補時

人生有如什麼,咁係足球比賽啦。

就算已經吹左鷄,係咪仲有補時呢?

如果...人死左之後,比你補返幾個鍾頭以前做人虛渡既時間,你會做乜野???

依個日劇好有趣呀,每集都係個單完故事,訴說唔同既人生,包括:一直誓言要在現場殉職既攝影記者,剛做第三日警察既新扎師兄,十分慳家既家庭主婦,為情自殺既護士,剛出道既漫畫家,黑道世家之女既大家姐(常盆貴子好靚呀!),過勞死既經理,同埋,哈哈,隱匿青年...

睇得好感動呀!

個翻名有d怪怪的,叫做:損失,時間,生命

我依個唔睇日劇既人都睇,因為真係好好睇!

誠意推介。

2008年12月24日 星期三

還記得四年前的Boxing Day發生了什麼事嗎?

是捲席南亞的大海嘯。

比起真正的海嘯,依家日日都有人講既「金融海嘯」,真是小兒科。

我們還是很幸運吧。

只要超越左赤貧線,真正重要既野,比如,健康,平安,家人齊整,友情,愛心,正直,勇氣,赤子之心...樣樣都唔係可以用錢買到既...原來,錢其實係最容易既。



祝各位聖誕快樂!

2008年12月20日 星期六

爆樽

本來呢,我開blog時比自己既規定就係,依度只講正面既野,負面野大家睇報紙就得。

但係,周小姐同佢所衍生既一連串言論,令我超級火爆,不吐不快,而且覺得我如果見到d咁既野都唔出聲,形同幫凶。


周小姐如果真係覺得感情係佢地兩個人自己既事,咁就唔好分手又要出聲名,結婚又要出聲名啦。你出得聲名就預左比人知,比人睇,比人講----周小姐依種犯賤既行為,真係影衰晒全體港女。

作為港女一份子,我對周小姐其實仲「興」過倪震。倪震不過係一個好普通既LOSER,四十幾歲人一事無成,勉強識寫字有d小聰明就自封才子,依d人其實周街都係,如果佢唔係有個出名既老爸同女友,應該晨早被人完全遺忘。但係,周小姐依種唾面自乾,任飛任聚既自甘作賤行為,實在令一眾同樣身為女人既觀眾一d同情心都吱唔出,仲令一眾賤男大叫什麼人地就係鍾意大滾友,關卿底事?!

嘿,再無恥一d既男人中要沾沾自喜地講,寧被人知,莫給人見,出來滾時低調d未無事囉!個潛台詞係:「我就滾得有技巧啦,嫖左咁多年我老婆都唔知!」

如此下流,實在無野好講。


====

依期有個超級不知所謂既新名詞:「性工作者」。

我還算好彩,第一次接觸依個term係睇報紙,白紙黑字前文後理,都仲明白佢係指一樓一鳯。我阿媽就無咁好彩,第一次聽依個咁既名係睇電視新聞,聽到佢一舊雲,仲差d以為唔知係社工定心理醫生被嫖客所殺。

依個名實在很趣緻,如果一樓一係「性工作者」,咁d嫖客豈不是「性消費者」?咁講落佢地既召妓都係一個花錢既行為,咁阿爺救港政策之中,係未應該加第十五項,鼓勵「性消費」呢?睇來有朝一日香港渡過金融海嘯,嫖客功不可没。

駛唔駛咁偽善呢?

乜老作一個懶中性既名堂,就可以掩飾到召妓本身淫人妻女既本質咩?

麻煩都係叫返佢地既學名「妓女」(既係,對應「嫖客」),又或者坦白d講出自己心中果句「鷄」(對應「鷄蟲」)算把啦!

做得出d咁既野 + 長篇大論文過飾非 = 文棍。


P.S.:依個世界只有一個周小姐,某毒男都係等比人飛啦!


PPS:講出心中的老實說話,實在很痛快。

2008年12月8日 星期一

之前係太忙定點,完全唔知有個咁既天文奇境喎,連張相,都係在朋友個blog度偷的!

:D

我做乜會唔知呢?明明我平日無端端都會舉頭望明月嫁!

真係有如蘇先生講:「何夜無月,何處無竹柏?但少閒人如吾兩人耳!」

雖然錯過左,但係以後月圓時係圓滿,圓缺時未變成笑口常開囉。

依個世界真係完全由得你點睇,你可以話清風殘月,又可以哈哈笑。

決定權,完全在「你」!


P.S.:全公司最有耐性斯文温柔好脾氣既「家嫂」由關島結婚返來啦!!!曬得紅粉菲菲仲要笑得2x甜美,真係識行識走的幸福呀!都不枉我同潮童因為佢放假而做到扖晒地。


家嫂,祝你幸福呀!

:D

i-Bank

當年S剛出來做野,坐在隔離既數佬部有位大隻哥哥,洋名叫做(好打得既)韋思理,但係,佢係好討厭依個佢阿媽改既名,所以大家都翻譯左個名做中文,叫佢阿西。

阿西十分跳脫,會懶活潑可愛地,行行下無端端跳兩步,有一次在我個位旁邊跳時,落地果下,我個位都震一震,好似地震,很可怕的。講比阿西知,阿西就流留出狗仔比人掉石頭既受傷的眼神,既衰既怨;但係呢,就乖乖無再動如跳兔啦,well,起碼唔夠膽再在S旁邊跳啦!

阿西亦十分姿整,日日都查濃烈古龍水返工。S呢,由於天生一個狗鼻子,其實朝朝唔駛望,只係聞下都知佢有冇返工...但係,依樣野雖然S同阿西講左n次,韋思理都係依然故我,日日都係一陣味咁返工...S暗暗估計,阿西應該有強力臭孤!

阿西呢,中學年代移民美國,屋企都ok有錢...依個係講,比起S依d平民啦。但係,阿西自己呢,就成日覺得自己窮,比起「真正」有錢既人來講囉。

阿西唔鍾意美國,覺得中國人在果度無得發圍,所以讀完書就既刻返來香港,做依份工呢,都係暫時嫁姐,佢真正想做既係:i-banking!

阿西真係好努力...地揾工...嫁,佢有次仲好失望地同S講,佢已經見到個End User,睇下大家有冇Chemistry,佢自己就覺得言談甚歡!但係,結果都係無消息,灰爆喎。

不過,皇天不負有心人,在揾左成兩年幾之後,阿西終於入到i-banking啦!一班人,實在係十分為阿西高興的,阿西咁多年來咁高調地揾工,一朝終於理想達到,真係有d感人肺腑的。

但係,大家熱烈地farewell完阿西之後,阿西就無晒消息。

半年之後,S在街遇到阿西,但係阿西一句Hi,就鷄咁腳走左....

佢d兄弟話佢發左達唔識人喎.....

S有d聽唔明,又有幾發達呢吓?

當年,科網bubble仲未爆破,e-commerce如火如荼,係生意都要在前面加個e或i字,如果唔係就會比人話係Old economy......

S一直以為i-banking係.................
係....................................
.....................................................
..............................................................
.....................

.....
係....internet-banking....(唔準笑!)

仲一路都唔明,阿西一界數佬,點解要入電車銀行.....

唉,唔知阿西仲係咪「艾崩卡」呢?