2009年7月14日 星期二

其實.....

其實..........S係黑社會來,成日都踼人入會去跑步。

比如,有人終於都怕左我,話遲d腳無咁痛都會試下跑喎。

又比我我公司同事,有兩個已經完全淪陷!一個睇完物理治療已經急不至待地要去跑,搞到S反而要叫佢唔好跑住;另一個拉埋老公去跑,佢老公都由原來既無奈地比老婆迫住跑,去到依家成日問老婆幾時一齊跑!

最新一個剛開始跑既小美女,跑到停唔到,覺得對腳自己識得跑,本來諗住跑五個圏,結果跑足十個先至收手.....

呵,果然係可怕的黑社會。

=====

上個星期六,係打風的,在中午落左一場大雨,之後又出返太陽喎,所以,下午出奇地大風涼爽,正是跑步的好天氣。

S在馬場係咁跑,由天亮跑到天黑,睇住天上既白雲變成粉紅色,睇住周圍既大厦華燈初起,睇住天色完全變黑....總共跑左21.1公里。

之前睇大叔寫佢第一次走去意大利既馬拉松鎮跑全馬,因為係自己去跑,唔知道要在一個彎位跑多少少,所以唔知道自己係未真係跑足全馬拉松既42.195公里,語帶遺憾。

講真,S睇時心中暗暗笑大叔既書生頭布氣的!車,佢都跑左42公里啦,差果少少尾數,不過係唔夠二百米,真係可以不理啦,做乜咁介懷呢?

但係,依家S終於都明白大叔既心情lu!唔係幾百米既問題,而係,總之未跑夠全馬既42.195公里就係未跑完全馬,未跑夠半馬既21.0975公里就係未跑完半馬!依個只有係唔係FINISHER既問題,只有「係」同「唔係」兩個答案,中間係無灰色的。所以,馬場一個圏1.4公里,今次S跑完15個圏都要再跑多小半個圏,make sure自己係Finisher!

=====

但係,跑完之後,雖然都幾開心自己第一次跑咁遠,但心情亦好複雜,開心、失落、攰、迷茫....依個就係傳說中既Runner's Blue啦!!!

我跑得太慢啦,慢到....跑左咁遠第二日周身都無處痛呀!

我留太多力啦!

即係,我未盡全力呀!

哇,唔得咁嫁,太球其啦!



今晚再跑!!!!

18 則留言:

Ebenezer 提到...

嘩!你仲勤力過隻馬喎!

On Dog 提到...

黑社會? (驚...) T___T|||


我頭髮長唔代表我係飛仔!
我跑步唔代表我係黑社會!!!

唔好洽我呀~!!!

南區肥龍 提到...

到時男女老幼人人都跑。。。係咪和味過和味龍先?

((((呵呵呵呵~))))

Samsara 提到...

Ebenzer:係呀,馬仔放暑假,我就用佢個場衰跑。

On Dog哥哥:你直頭係有為青年啦,你果個社團,好似叫「橙色傻瓜軍團」喎...咁英,邊有人夠膽蝦你呀!

教練:無錯,一於用層壓式推銷,每個人都要交兩個頭,好快就數人頭數到手軟...哈哈哈!

C.M. 提到...

唓,若果有青春少艾著住緊身超短熱褲,黑社會遮,又有咩好怕呢?

維修技工 提到...

啊! 真好. 我都仲未跑得返咁長呀.
不過, 我都會繼續努力o既.(雖然唔會好勤力)

數怪 提到...

>依個只有係唔係FINISHER既問題,只有「係」同「唔係」兩個答案,中間係無灰色的。所以,馬場一個圏1.4公里,今次S跑完15個圏都要再跑多小半個圏,make sure自己係Finisher!

我有個同事k, 成日都係無立場, 永遠都企灰色地帶, 無野需要分是同非嘅, 唔「得罪」人喎, 會影響relationship 喎。

佢自己做自己野無問題,最慘有時我要同佢夾呢!我真係好想同佢講:呢個世界,真係有野係只有「是」同「非」架!

Samsara 提到...

CM哥哥:嘿嘿,等你喲!

修哥哥:哇,乜你有跑開嫁?做乜停左既?

數怪哥哥:實情,我一睇你個comment,第一個反應既按多次計數機,15x1.4真係21km....

同事嘛,岩傾就傾多d,唔岩傾既就只講公事囉。返工做野基本上都有一定目標時間同project既,總之要在依個死線之前要做到咁咁咁...應該點做未點做囉。

提到...

我都跑緊, 但興趣不大.. 只想減肚腩..

想問問 ... 好似你咁喪跑.. 其實係咪真係減倒?你而家係咪得返棚骨?

Samsara 提到...

well.........

我一開始跑無耐就唔見左拜拜肉,依家仲有dd老鼠仔...真係有嫁,不過只有我見到之嘛。

我一直因為成日扭唔開蓋而好困擾,好口渴但係又扭唔開枝水喎,好嬲嫁嘛...依家,拍一聲就扭得開。

豬腩肉嘛....well,我著一條上年買既半截裙,鬆到條裙在度轉....當日一講比公司妹妹聽,佢地個個都話要跑呀!

車,我都唔肥,減肥唔係我既目標!我大概輕左5磅,而且,肌肉可是重過脂肪的...

跑啦跑啦,跑夠mileage就自然會收效嫁啦!

Samsara 提到...

BTW,我諗職業跑手果d瘦骨如柴既身型,係要加埋節食先至可以搞成咁,跑馬拉松越瘦身分負擔越小,會著數好多。

我剛剛跑時,超級好胃口,試過食完一大個湯飯都仲肚餓,要食餅....依家食量先正常返,所以跑步時又唔駛話好嚴格地唔比自己食野既...我仲因為有運動,成日攞正牌食雪糕!

維修技工 提到...

我一直有跑啊. 舊年跑得尤其多, 也參加很多賽事. 可惜十二月時腿受了傷, 到現在連跑 10k 也很勉強. 不過, 我也正在嘗試回復練習, 希望秋天時可以重踏賽道啦.

p.s. 跑馬拉松也不可太廋, 因為身體會不夠能量. 越廋越好是比較舊的說法了.

獅子皇 提到...

姐姐,好耐冇係你度留言喇。

最近受左一次重傷,心靈受到重創,好想搵人傾下偈‧‧‧好想搵個地方喱埋!!

提到...

想 P.M. 你.. 哈哈.. 你響邊度有圈跑咁過癮?又,跑個時銀包鎖匙放邊?跑到好似跌左落海咁連條底都濕埋... 跑街既話邊有地方沖涼換衫?

Samsara 提到...

修哥哥:wow,blog界果然croaching tiger hidden dragon...但係點解我見到跑羸馬拉松既人都係瘦得很嫁呢?

秋天跑?依個有冇興趣:
http://www.hkdrc.org/

獅子哥哥:乜咁大件事呀...嗯,講真,如果情緒低落又或者depress,跑步係十分有用的;衰跑完之後,又臭又攰,身體疲勞,但心情會出奇地平靜。而且,我好多時候都係跑之前好煩好灰,跑跑下突然靈光一閃,心念轉變,根住就好開心輕鬆啦!

依家,我做野一辛苦就會話要去跑,因為我跑完真係會平靜d,公司妹妹都會見我mun就話:「S,去跑步啦!」(死妹丁!)

鎚:我去馬場跑呀,馬場一個圏有成1.4公里,跑多幾個圏都唔會悶,馬場有齊locker、toilet、浴室,小食部仲有燒賣同魚蛋(不過唔好食)。

跑街既話,我係由屋企跑去深水灣,再跑返屋企囉,我只帶鎖匙同八逹通,你如果想帶多d野都可以買個shoulder bag既。

疯杰 提到...

我都唔小心影响左一两位朋友加入跑步
XD

Samsara 提到...

啊!!!!你係黑社會!

疯杰 提到...

至多米系跑步会
=D