2008年7月15日 星期二

科技

據說,我地生活在科技一日千里又資訊爆炸既年代,如果大家好似我咁有返咁上下年記,回憶往事時,就係十足婆仔咁,講緊一個完全唔同既世界。

記唔記得未有手機未有傳呼機之前既世界係點運作呢?當年一家只有一個電話,頂多係加個分機,但係都只有一條電話線,仲要無call waiting,阿女煲電話粥時,全家就成為孤島,當年成日打成幾個鍾頭電話都唔通,就係因為同學仔既阿哥家姐煲緊粥。

因為大家一出左街就無辦法揾到你,當年約人都係會先去一d好簡單易去既地方等齊人先既,我都真係好耐無聽過約人在「旺地恆」、「老地方」見依d咁老土既事囉。而且,因為無得call人話要遲d到,所以,反而大家都比較準時d,否則如果你遲半個鍾頭既話,朋友仔就真係要在度好徬徨地乾等。

又,仲記唔記得以前在茶樓永不間斷既廣播:「陳xx先生,陳xx先生,請聽2號線」?當年我係好恨有朝一日會call我名嫁!哇,連你飲茶時都要揾你,咁你一定係好重要啦!


之前睇左篇文章,係一個男人講帶佢九十幾歲既祖母返去鄉下既經歷。在坐飛機時,祖母唔識校張椅,唔識打開張枱出來,唔識打開toilet門,入到去唔識上鎖,仲要最大鑊係唔識點樣拉開度toilet門出返來...祖母話,佢覺得自己唔屬於依個世界,世界已經變得陌生而可怕,佢完全唔明白發生乜事。佢既朋友都走得七七八八,自己都ready....

係科技走得太快,定我走得太慢呢?Okok,我承認比部3G手機舞到暈駝駝...但係,我地都要分清楚莊閒嫁,一部手機最緊要係乜野呢?未就係打電話囉!點解我以前按一個制就可以call到個Phone Book出來,依家要成四個唔同既制先至去到Phone Book呢?莫非...不過係一部手機我都要攞本user manual出來硏究?我作為史前人類,始終都係唔明,有乜咁緊要既事,要搭車時都上網呢?咁未仲勁過在茶樓有人嗌咪揾佢?

咁搞法,如果我有幸活到九十歲時,唔知會唔會連門都唔識開呢?

27 則留言:

dog o 提到...

haha...

咁妳要聽S. JOBS話, 出部IPHONE啦!

dog o 提到...

and...

NOKIA 個"屎變人"OS, 唔係比"人"用架...

Samsara 提到...

555555555555555.......

匿名 提到...

放心實開到門, 到時對對門都係自動門

維修技工 提到...

聽講, 而家d 介面係就住人o既思維模式來設計.
照計, 係應該唔駛睇說明書, 好直覺咁就識得用.
但係, 我一d 都唔覺囉... 搵個制隨時要搵成幾分鐘!
可能, 我o既思維模式唔係好正常啦, 唉!

Samsara 提到...

匿名君:你好明顯串緊我喎,咁我驚拴唔到門囉...5555

修哥哥:嗯,你好似已經係電車精英喎,你都咁講,嗱嗱,證明依個係一個廣泛既現象啦!

獅子皇 提到...

唉‧‧‧好衰唔衰,唔知係咪琴日衰多口係你呢度話唔會換機住,點知今朝就係公司臨出去時係 lift 口度跣左係度,咁啱我又講緊電話,跟住就係生平第一次睇住部電話跌落地然後向前跣左一大段路,不過好彩部電話仲用得,係個殼爆開左少少‧‧‧〝落機呀〞果然夠硬淨,希望聽日唔好唔著呀。

另外,其實所謂以人為本既設計,咪又係個設計師自己認為人地係咁諗,所以佢咪咁設計囉。就算以而家既 M$ Windows 既 GUI,你諗下有幾多個 Icon 或者 Button 係你憑直覺就好肯定而又的確係個個功能呢?不過,就算係你好肯定同的確係個個功能既同時,我覺得個個係你既經驗兼被灌輸左一特定概念之後所得出既所謂直覺,所以到最後人應該都係要睇〝使用手冊〞既。

Morca 提到...

唔用相機.唔用收音機.唔用MP3...

你已經.贏.晒.啦!!!

Samsara 提到...

獅子哥哥:哇,保重保重,不如你都出返部N82啦!對我地一齊可以做苦主。其實以前Nokia既interface我覺得真係好human既,唔駛睇user manual,我個個function入去睇完就會摸熟部機...但係依部呢.......................................................................................

Morca姐姐:講野你知,不過你唔好驚喎。

就係,well,我係無MP345678依d野既,仲要唔識點樣將cd轉做mp3,我真係山頂洞人來嫁,講到low tech我真係贏到開巷。

獅子皇 提到...

Samsara 姐姐,N82 應該都唔平架喎,而且 3G 對我黎講暫時冇乜用,所以,算把喇,Mobile 對我黎講,最好只係幾百至千幾蚊有交易既 Model 就夠架喇,

引用一句 IT 界名言,〝Hi-Tech 揩野,Low-Tech 撈野〞,Samsara 姐姐,你都應該贏唔少人。我部電話用得最多既係聽同講既功能,其他既如 MP3、相機同收音機,我都少之又少用。我又唔需要連搭車搭船時都要睇下有冇人 e-mail 野俾我,不過,有都最好唔好要我知喇。

Samsara 提到...

獅子哥哥:我部N82只係一千尾咋,因為我同數字公司答左個好長既plan,手機依家野,只可以粗用姐,我就唔會買d好貴嫁囉。

但係,3G其實係電車既必需品,只係,分分鍾可能會比人寫...

Samsara 提到...

我愛小雲,咁正既空姐都妳你樹揾到!

seikomatic 提到...

愛會否因科技而改變呢:

【我愛你R2D2k2200,求下無唔好 turn me off from your network..】

Marshmallow 提到...

N82可以設定short-cut架,要先去 工具->設定->一般->個人化->待機模式->捷徑… 揀你常用嗰啲function就得架啦…

不過真係留意下佢自動上網既功能好喎…小女子第一個月買架N82,唔知佢會自動上網/GPS/…俾數字公司屈咗成千蚊電話費…搞咗成個月佢地先肯打個三折同埋加data plan…

Yun 提到...

下﹐我望左好耐先至知道你同我示緊愛我添。:P 仲以為你講邊個。

哇﹐我最近發現o個個hope﹐都好正。我好有衝動係佢每一篇度留言﹐「超有同感!!」唉不過算啦﹐驚嚇壞人囉。

(你知唔知ah yo就係空姐b?)

又﹐我用緊Nokia 3250(之類)﹐好似除左打電話﹐乜都冇囉。(三年前開時已經係舊款了!!) 有必要時﹐我可以好high-tech架﹐但冇需要呢﹐我中意保持簡簡單單囉。以前有用PDA﹐而家轉返用小本子啦。

seikomatic 提到...

師妹,

于丹姐姐有本新書:游園惊夢,系講昆曲既,內容無留意,不過d插畫 by 馬得幾得。

收買佬 提到...

喂﹐Sam 姐, 你係咪看完TVB 週五晚套懷舊野﹐有感而發呀﹖

余若虛 提到...

我係認為科技養成人既陋習。人腦潛能無限,以往大家所有電話都入哂腦,今時今日你記得幾多個電話?再者個個依賴電話,約人唔清唔楚,銅鑼灣老麥等喎,以前都唔知要搵幾多間,而家好多人都係出到去先再打電話你係邊係邊呀見你唔到呀下乜你係個度呀我係另一邊喎唉。遲到就更大問題啦。

Samsara 提到...

大師:我諗呢,又唔可以賴晒科技既,你要說愛就anytime都得啦。

大師,我好鍾意你呀!

于丹本書買左,但係翻兩翻就放低左...因為睇完都係唔明喎,可能,都係唔可以偷懶,要買本字典咁厚既註解,由佢引既詩詞一直睇先會明...好大工程。

綿綿:我都學識啦!好彩我公司個潮童都係用N係嫁姐,我出機時已經叫哥哥仔幫我set好,用GPRS之前係要攞permission既,應該都無問題,而且,我個3G plan都未開...

Samsara 提到...

收哥哥:我無睇電視呀,我係比自己部電話欺凌囉!真係自己攞來辛苦。

小雲:係呀,係你呀!我見到果個McDonnald未知囉,真係有人咁心靈手巧嫁呢,要我在飛機上面批蘋果,就真係好難講會發生乜事囉,咁拋。

我呀,n年見當Palm仲叫做Palm Pilot時我已經買左部,之後發現我只要將d contact information入晒落手機已經得,我又唔係日理萬機,又唔係鬼咁多人約,依家連planner都唔用。只會用一本簿仔,無論返工開會take minutes、shopping清單、見客資料、甚至寫blog,乜都係佢。

余弟弟:聽講以前d人唔識字,個記性仲好呀,識寫字已經依賴,到你有更多科技野呢,就記性仲差。

不過等姐姐話樣野比你知,我同好多朋友既經驗都係,依家之所以記性無以前咁好,主要唔係因為老左,而係因為太多野分心,唔會好似以前細個時咁專心囉。

獅子皇 提到...

估唔到 Samsara 姐姐都有用過 Palm Pilot 喎,我都仲用緊部 Palm T3,不過已經越黎越少用,今朝要用時先發覺冇哂電,咁可想而知已經幾少拎出黎用呢。

我估 Jack Welch 做 CEO 既年代,都仲未有咁多電子科技幫人丫,人地咪一樣係咁勁。

我成日都覺得所謂既多功能電話最主要既一個功能,就係 Show Off 囉。我公司做 CEO 個個都冇用 Blackberry,佢都只係同我用埋同一款電話,但係佢下面既人個個都話要用,但係個 D 人個個都唔係經常要出外工作或工幹個喎,大部份都係日日坐係度做野,每個人枱頭都有一部 Desktop 個囉喎,咁仲要 Blackberry 黎做乜呢?係咪真係咁神心放左工都仲覆公司既 email 呢?

Samsara 提到...

獅子哥哥:我並唔抗拒科技,只要佢真係幫到我既話,我亦都唔會吝嗇,但係,個point係科技究竟係幫到你,定會其實搞到你既生活m更覆雜囉。Palm Pilot比我既經驗係,無錯,最先係幾好玩,但係又要差電又要synchronize data又要帶多舊野出街又要好難揾返資料...所以,都係用返簿仔all in one,仲好!

講起黑莓呢,我第一次見人用係有同個supplier一齊上大陸既時候。哥仔呢,個莓一震就攞出來,雙眼發直,向下狂look,之後,立時好似打機既手勢,兩隻手渣住部機,用兩個大拇指來打字覆email...雖然在當年,黑莓仲係一個好新&好貴既玩意,而即日可以覆晒demail又幾吸引...但係,依位哥哥狂look個roller同勁禁制既表現,有如上左身...

匿名 提到...

I read an article few years ago, saying isn’t it amazing that technology really apply to our daily life wildly only started around 1985. Not that long ago, we are a bunch of lucky people, that when we started work, we went thro’ all these changes. From telex to fax, from fax to email, etc. etc. From Words 2000, Windows 95, 2000, XP.........

Oopp, disclosed my age.....

Holly Cow

Samsara 提到...

牛牛呀牛牛,我寫得依篇都明顯係中女啦,講到變幻才是永恆呢,依個就幾時都岩,重要既係,究竟係人用緊科技,定好迷失地,比返科技控制?

米都話唔搞咯 提到...

就咁,

第一.你真係唔應該再信數字公司架啦,响咁多間service provider當中,我覺得佢地既service係最s嗰囉...呢個係我响十幾年前數字公司仲係叫x記既時候領悟出泥既。因為我為左要cancel佢地既service,竟然要搞左幾個月,而practically泥講佢地都仲爭我幾舊水...但我當然係費事浪費精力去追...

第二,喂,如果你唔諗住用mp3呀,3G呀咁,點解唔出個幾百蚊平平電話呢?好多間公司(包括samsung,motorola,even Nokia 都有)都注意到呢個「只係要簡單打出打入既電話」既市埸,而市面亦有好多隻款揀。

第三.就你講既例子,唔好忘記上年亦有電視報導話有個阿伯學識寫朴同啲孫溝通...科技,有時係在乎你以咩態度去應對既。就如,而家都仲有啲阿公阿婆唔肯用提款機架,佢地唔會生存唔到既,不過,生活冇咁方便囉

匿名 提到...

明顯係中女才有this kind of wisdom and knowledge Ah?
The new book "dumbest generation" explains that people under 30s don't know how to calculate, don't know how to write, and don't know how to communicate with other.... all because of our new technology.

(Sorry, I can't write chinese in the office which I love to!)

Holly Cow
Canada

Samsara 提到...

米哥哥:哈哈,數字公司個名改得唔好,我唔係用緊爛橙山,係用緊數手指公司呀!山就點都唔用,更加唔會簽長約啦,數手指公司都ok嫁,我用左咁多年都無風無浪。

我今次係想出個有相機既電話,之前有次去旅行,唔記得帶相機...不過今次出左手機之後,係唔記得左關機,無晒電...泣。

如果d科技真係好似ATM咁幫到我,我係會學既,但係我覺得自己要識選擇,有d fancy gimmick真係會幫你添煩添亂。

牛牛:我仲以為你係識睇唔識打添!雖然我係中女,但係對d後生都唔係太悲觀,當然,我一定要承認,我見到d靚仔在地鐵度攞住部遊戲機好似扶磯咁樣刮刮刮時,十分滴汗,但係,佢地鍾意打機,都唔代表佢地蠢既我諗。