關於放棄...

果然係關於放棄，依篇我寫左幾次都寫唔到，睇過今次post唔post到出來。

小blog長期讀者可能都有印象，我已經唔係第一年讀巴利文。

果一個巴利文初班，我已經係讀第二次啦。

巴利文真係超級深，同一個字可以有十幾廿個變身，真係完全認唔到。又要記字，又要記grammar，上完堂既一份功課，閒閒地要做三四個鍾。S試過有一次坐左成晚，先至做左半份，改完之後，滿江紅咁返來....

雖然S不嬲都知道自己無記性，但係，起碼既背誦能力係有的。上次讀時結果搞到一個學期未過已經不停走堂，仲要第二個學期直頭唔返，試都唔敢考....係，連在考試時出現，交一份白巻既勇氣都無。

當然，S有好多好多原因既。

公司有需要我在上海一個月，成四堂無上，光係功課都要用我起碼12個鍾啦，仲要唔識做添，點追？

其實巴利文有乜用途先？巴利文已經係無人用嫁啦，學左又唔會加人工升職，又唔會有野加落resume。又揾唔到食，花咁多時間精力，不如讀吓日文法文西班牙文好過啦！

咁我報巴利文不過見好似幾得意，試下之嘛，原來咁深都唔好玩既... Why so serious??












不過，自己心知肚明，依ｄ都係藉口，都係假既。

巴利文當然唔係心血來潮玩吓啦，依家講緊學一個新既語言喎，個投資當然好大（巴利文既投資結果比想像之中大大大大大大大大大大大大大大大好多），S明知自己記性差都要學，係因為要讀真正的佛說。

佛經翻譯既版本有時候差別好大，有ｄ詞彙真係比ｄ翻譯搞到頭都痛，比如，pañña，ñanā都係比人譯做智慧，但係依兩個字係有ｄ唔同既。如果一個鬼佬真係認真地想學儒家思想，佢一定唔可以只睇翻譯而要立下決心學中文；同樣，S要求自己要學識巴利文來睇佛說。雖然巴利文超級深又古怪，但係莫講話佛只係講巴利文，就算佛講既係火星文，S都要跟住學啦。

而且，S知道，如果今次放棄左，以後每一次上堂法師一講巴利文時，S心中都會暗暗刺痛。依種係好熟悉好熟悉既痛，係每一次S放棄左一樣野時都會有既感覺。係，就係自己失敗左既感覺。

S雖然係運動白痴，但係讀書還可以的。巴利文依個純粹腦力的學習，S都搞到不戰而逃....今次S既自尊心真係被狠狠地刮傷了。

S已經受夠了受夠了。

受夠又要放棄，受夠放棄之後要揾借口開脫，受夠自尊心隱隱作痛，受夠逃避現實了。

所以，同一個課程，重新再學一次，下個月就要考試，S要合格！哈哈，我好似都真係未試過讀書會以合格做目標的，但係講真，今次如果能夠合格，我會真係超級開心的！

做咩姐，唔認真係野就唔好浪費時間去做，要做就要做好佢。

"Never, never, never, never, never give up."

(Leave your old self behind)

(Reincarnate NOW!)