2009年6月13日 星期六

改革歷程 - 經濟改革

更多有關 改革歷程 的事情

依本書叫《改革歷程》,比起英文版Prisoner of the State貼題得多。當然外界對六四既部份最關心,趙紫陽亦都有詳細交代,但係由89年4月15日胡耀邦逝世至六四屠城一段只是近因,真正既導火線遠埋在80年改革開放時,所以,趙紫陽大部份篇幅都係講在文化大革命以後既經濟政治改革。

趙紫陽果然唔係一個空談既理論家,而係一步步實踐模索硏究而行出一條生路的總理,套佢既說話,就係,「模著石頭過河」,中國,一步一試之下,無好似東歐蘇聯行震撼經濟治療,在風高浪急下,今次力保不失,無在經濟上翻船... well,不過政治上進行對手無寸鐵既人民大屠殺,政治人權倒退....囉。

趙紫陽解釋點解需要貿易,係我有史以來睇過最簡淨有力而深刻既解說。趙講佢1978年去歐洲考察,去到法國南部,見到當地非常乾旱,成個夏天都唔落雨。根據中國既思維方式,咁既土地一定要大興水利來種糧食啦;但係法國人無咁做,佢地種比如葡萄依d耐旱既植物,再釀酒,農民生活非常富裕。

去到希臘既丘陵地區,又多山又乾旱,如果根據中國既想法,又會要開梯田同大修水利啦;但係希臘人無,而係在返原地種橄欖,榨橄欖油,農民生活好富裕。

點解佢地可以咁?因為佢地唔係封閉既經濟,可以靠對外貿易,賣左自己種既農作物,用賺返來既錢買自己所需既物品。

每處地方既天氣土壤都唔一樣,適合種既植物亦都唔同,如果無貿易,個個農民都只可以用自己一小片田地來種可以食既植物,來填飽肚子。如果你係廣東浙江依d漁米之鄉就當然無問題啦,但如果你在貴州廣西依d窮山惡水既地方,就算你早出晚歸做足365日,都只可以在餓死邊緣上苦苦掙扎。

趙紫陽返到中國後,一次去山東魯北睇過,果度係鹽鹼土地,種糧食產糧好低,但係非常適合種棉花。但係由於中國限制貿易,要個個農民自給自足,多年都只可以可憐地種糧食,在貧窮線上掙扎。於是趙紫陽決定魯北可以種棉花賣比國家,而國家就為農夫提供糧食。結果兩年之內棉花大幅增產,農民立時翻身,仲在1985年「搞」到棉花多到成「災」,賣唔出去....要知道,不過係兩年前,中國仲係大量入口棉花既。

農民除左買棉花既收入之外,仲因為種棉花就有棉花籽,棉花籽榨油之後係非常好既肥料。有左依d肥料,在非鹽鹼既土地種小麥又大幅增產!

以前係1.5畝地來種小麥都食唔飽,依家係「一畝小麥吃飽飯,半畝棉花做貢獻。」1畝土種小麥已經夠食,仲種棉花來賣添!

依個係我讀咁多經濟書以來,解釋貿易點解可以創造價值既最精簡深刻既解說。讀趙紫陽既感覺很似讀Yunus,都係No bullshit既實踐家,依個係佢由計劃經濟到巿場經濟一步一腳印地行出來既經驗,果種摸索出來的實在,唔係一般經濟學者可比。

依家中共官方喉舌,叫鄧小平是什麼「改革開放總工程師」,實是過譽。鄧小平支持經濟改革是真,否則趙紫陽一個小小地方官又點可能頂得住陳雲、李先念依d老人既壓力?但,由四川到全國,真正落手落腳模索出改革的,是趙紫陽。

鮑彤在導言之中講得好:

「有人,說鎮壓壓出了繁榮。我只知道,是經濟改革改出了繁榮。是人民,用巿場經濟打破了毛澤東的枷鎖,才創造了繁榮。」

歷史,一定會還依位第一個實行經濟改革既人民總理一個公道。

13 則留言:

Yun 提到...

Sam 姐姐:

睇到最後一句﹐居然有點感動。


又:

> 點解佢地可以咁?因為佢地唔係封閉既經濟,可以靠對外貿易,左自己種既農作物,

>仲在1985年「搞」到棉花多到成「災」,唔出去....要知道,

>農民除左棉花既收入之外


係「賣」呀。 :)

Samsara 提到...

小雲:我睇到魯北既農民終於可以有飽飯食,仲要綿花多到成「災」,我都好感動呀...依家我地見慣自由痕狂掃LV唔記得左姐,70年代80年代初,剛搞完十年浩劫,人人一窮二白,趙紫陽一直係想盡辦法,點樣可以令人人有飽飯食呀!

改左改左,真係難為你咁都睇得明,港女淨係識得買買買,呵!

Quality Achemist 提到...

趙紫陽在經濟的貢獻很大,
可惜在政治上鬥不過保守派.

seikomatic 提到...

師妹,

俺硬系對大好人,大聖人有保留,睇既時候就不斷提醒自已:

1. 佢錄音既時候系咩身份,當權定敗勢。

2. 出呢本書既目的,名為歷史提供真相,但如果真相有前題,有針對性,有對立既立場,有暗喻,有目的,咁仲有幾多客觀的真相呢?

3. 【講】政治既,唔單止有羅輯思維就可以明白。

趙生如果無受逼害,講得出呢d建地?

敢講當然要鼓掌,不過俺覺得結果系李前總理同華叔鬥長命。

至於經濟改革同民主的關系,睇下自由黨同民主建港聯盟o罷。

Samsara 提到...

品質先生:多謝來訪,你講得岩,有大事時絕不可外訪,同埋趙紫陽推鄧小平出來推錯左,我同年咁細,一聽趙紫陽講話鄧小平是舵手都覺得:嗄!真係當眾confirm老人干政啦!

經濟改革有分保守同開放,但係在政治方面,所有老人包括鄧小平都係保守既,趙紫陽下台既原因,同胡耀邦一樣:因為鄧小平唔再信佢地。


大師:嗯,今次只講經濟改革,依方面,趙紫陽既功勞一定好大;至於政治方面我唔係好諗得通,但係你睇,改革時只有經濟一條腿走路,政治仲係用返文革思維,經濟搞得好就好地地,但係好似88年咁物價關過唔到,銀行擠提,通漲飛升,咁就比保守派一個套權既機會,再加上有學運,終至屠城慘案。

六四事件,有偶然性,但係,穩穩地,導火線一早在經濟改革時已經埋下。

至於每個政治人物既功過,我覺得趙紫陽係confirm左一直流傳既說法:係鄧小平決定屠城的,依點,鄧小平無得開脫。

seikomatic 提到...

64在會唔會系依朗重演,定系又一個OnShanSuKi?

Samsara 提到...

大師:實情,我依兩日好留意新聞,好驚伊朗會大鎮壓。

C.M. 提到...

若果寫白d,唔係貿易,而係經濟自由,促成改革開放。而關鍵詞,仲係“自由”兩個字。

唔,我睇果本 Capitalizing Communism(放左響anobii)雖然無明顯提到趙紫陽,但亦好體會到“終於有飽飯食”既感動。

Samsara 提到...

CM哥哥:係喎,有依本書喎,不過無評論既?

關於經濟改革依部分,好清楚地話比世人知,中國有今日做「金磚四國」,唔係因為鄧小平鎮壓民主同反貪運動。

政府唔好又搞什麼運動已經係幫忙,仲要比人民自由貿易,所以中國人既生產力先至可以釋放出來。

中國人所以有今日,靠既係自己雙手。

C.M. 提到...

https://www.blogger.com/comment.g?blogID=37862247&postID=6698416231622491140

Samsara 提到...

係喎係喎,你原來年幾前已經講過...本書幾有趣呢...不過,係中國人用英文寫再翻譯做中文?我呢,好怕人地用英文寫中國的...戶籍,治理整頓依d咁深既名詞點翻譯呀。

我有d似明非明,只有經濟改革,而無政治改革既問題...

C.M. 提到...

哎呀,鎖你。頭先忙到甩麓,草草留低條拎就走。

果本查實係中文書黎架,唔係英文翻譯既。

雖然我唔係好明你最尾果段所focus既意思,不過我個感受係:政治改革,係經濟發展/改革既副產品;而非vice-versa。

(唉,想搵日過黎探你,但勞累得過分,再諗)

提到...

在家創業系統讓您實 現在家工作夢想,
你還在尋找一個真正可靠的網路賺錢方法
在家創業網路加盟在家工作不二選擇,不靠人脈,不靠口才,不用推銷,
不用囤貨,完全網路自動化的在家創業在家工作方式!
http://joe80411.weebly.com/
祝~天天都是有美好的一天˙快樂與您同在