2009年7月23日 星期四

古箏

老爸佢好鍾意音樂,不過細個時無錢又無機會學;佢等仔大女大之後,就係樂器都岩,乜都學:大提琴、笛、馬頭琴、二胡....依排佢學緊saxophone,仲鍾意到,買多左個高音saxophone來玩下(乜原來saxophone有高低音之分嫁咩).....仲會朝朝早去跑一陣步之後,就會攞出saxophone練足一個鍾。

老爸在兩年前退休之後,就全情投入,參加既左個業餘柴娃娃中樂團;佢個樂團勝在夠平,只要比個飯盒佢地食就得啦(有時會好d,請佢地食餐飯;有時,連飯盒都無個呀),所以佢個柴娃娃中樂團都幾受歡迎,成日有人揾佢地去表演。雖然個個都係業餘,佢地好認真的,表演之前晚晚都要練習,佢個女要約佢食飯都要排期,仲隨時會比自己老爸放飛機添。因為咁認真,佢地表演其實都有相當不俗的水準的。


老爸一直好遺憾既係,佢無襯自己既兩個仔女年幼無助又聽話時迫佢地學樂器,搞到兩個仔女都唔識任何樂器...佢個女仲誇張,講到明唔鍾意音樂,收音機一定唔聽,畢業之後乾脆連歌都唔聽;佢個女唔鍾意去Gym既一個好大原因係永遠有強勁音樂,卡拉OK依家野真係無可能叫到佢去......所以,老爸千方百計想tum佢個女是但都學一種樂器。


不過,佢個女覺得大提琴好麻煩大件又難學,口風琴會搞到一面都係口水,結他手指彈得好痛(結他比左人n世),之前學過下彈鋼琴,實在太難放棄左;而老爸一直暗暗地覺得女仔吹sexaphone好型,成日sell佢個女去學,但係....佢個女覺得.... saxophone既聲十足放X,就算係Kxxxx G,都一樣難聽到極....



事情就係咁樣在膠著狀態,直至,上個禮拜....

佢個女去阿爸處食飯,赫然發現多左兩舊木....阿爸竟然攞左兩個古箏返屋企!古箏個樣好似複雜,原來很容易的,而且仲可以在手指帶上膠片,彈得耐都唔痛的。老爸仲揾佢中樂團彈古箏既friend校好音,仲攞左個for beginner's course返來。

佢個女在飯前飯後玩玩下,就彈到首大長今.....



老爸好興奮啦,係咁叫佢個女攞個古箏返屋企啦,好易嫁云云....不過佢個女一連串既學樂器失敗經驗話比佢知,S係無乜耐力的,都係睇定d好,唔肯攞。


之後,S問自己,等乜呢?明明佢自細都覺得古箏好好聽喎,又咁易學,做乜要拖呢?

然後,有同事既爸爸個肺穿左,緊急入院。

係喎,唔係樣樣野都會一直等你的;事實上,係樣樣野都會轉變的,依個世界,變幻才是永恆。

難得喜歡,難得萬事俱備,點解咁怕有任何commitment,點解要拖?



(老爸收到佢個女既電話,竟然要攞古箏,佢好開心呀!)

11 則留言:

Barry 提到...

多一樣興趣調劑下生活幾好!

C.M. 提到...

直頭要鼓掌呀!

Samsara 提到...

師兄:係呀,睇過我可唔可以領略到阿爸成日講果個音樂既唔同境界啦。

CM哥哥:哇,做左老爸既心情果然唔同!Dada鍾意d乜就由得佢啦,玩兩玩就唔玩...講真,都好正常既。

C.M. 提到...

但若果阿Da會響我老左既時候,(都)會做我鍾意既野,真係幾生修到。

學 霖 山 莊 提到...

乖女...

火鶴 提到...

> 係咁叫佢個女攞個古箏返屋企啦,好易嫁!云云....

女仔識玩番樣樂器係吸引D嘅...

kenkachemhazard 提到...

尤其是箏,遐想都多d架。

古裝美女,十指纖纖,時而輕撥,時而激昂,氣質比一眾nemo高不知幾多倍。

CrazyJack 提到...

女仔玩古筝好有气质架
加油啊

Morca 提到...

好開心呀!!!

:D

怒火眼睛 提到...

唔, 追問下個學習進度先 :p

Samsara 提到...

火火:我仲係練緊基本指法呀。要學好任何野都唔容易,要彈出一個清脆既音,原來唔可以好似古妝美人咁只郁下手指,而係要成隻手臂抬高、彈、再抬高既...我只係揾岩條弦都要d時間!

好在箏既聲音真係好好聽,只係練習曲都已經好迷人。

火火你得閒就來盤下我啦,你知我懶,係要人追迫的。