S知道自己係一個好幸運既人，雖然生性刁蠻燥底自我惡死，但神奇地，仲有一班由中學一齊玩到依家既朋友。
其實，真係唔明，我地點可能做朋友咁耐嫁呢？比如好簡單地大家出來一齊食飯咁，點菜已經係一個超級高難度------
S有幾偏食，係要成篇文先至講得完。
偶然會在S個已經無乜人睇既blog現身的麥太，係一點點點點辣都不食的。係一點辣都不能。仲記得當年中學時，好似係S提議去食印度野........麥太連個湯都話有辣味，全程乜都無食過，塊面黑既程度，到依家當時在場既人都記憶猶新.......
豬豬油油就最fuzzy，唔食一條條既魚，但係就食魚柳飽；唔食蝦，但係蛋黃蝦佢又食喎；龍蝦肯食，但係賴尿蝦又死都唔食喎...總之，佢係女人，女人到其他女人都唔明。
粉紅怪呢，就最就得人，除左因為愛護海洋生態而唔食魚翅之外，樣樣都食。
不過，請看上面張不食清單，依四個人坐埋一齊，仲有ｄ乜野菜可以點呢呀吓？如果再來多幾個同學仔，就.......都唔明，點解次次我地都可以食幾個round？？？
******
咁多年來，其實我地除左無可抵賴地老左之外，都真係成熟左的。
記得以前讀書時約出街，如果因為要陪屋企人而唔出得來，係會唔好意思講的；S當年會覺得好瘀，陪屋企人好似好老土。
出到來做野就唔同囉，如果因為其他原因而唔出來聚會呢，可能有人會投訴，但係如果係因為要陪屋企人，咁就一定無問題，無人會有任何怨言。
去旅行時，如果同學係想買野比自己，咁大家都係反應普通，有就有無就無啦。但係如果係想買手信比世伯伯母，咁就大件事囉，全部團員都會十分上心，周圍睇周圍揾，一定要買到先至擺休！
以前講得最多既係工作同是非，依家就最關心健康同屋企人。
******
我地都慢慢學識，慢慢明白，乜野先至係真正重要的吧！
明天又係我地一年一度，地獄式馬拉松大食會的時候啦。經過有同學仔病倒又好返之後，S是很珍惜很珍惜很珍惜的。
所以，就算依個禮拜S咳到聲線（難得地）柔弱，都一定會出席，而且會毫無愧色地幫個盤菜加料！！！
祝各位身體健康，新年愉快！
