2007年6月2日 星期六

支離破碎

當年,其實完全無人預料到會變成咁樣.事情開始於胡耀邦逝世,跟住,就好似萬花筒咁,轉出一幕幕既回憶,一幕幕既影像.

戈爾巴喬夫訪華,王丹下跪,柴玲暈倒,吾爾開希著睡衣見李鵬.

天安門廣場人海旗海漂揚.

學生示威攞住「小平您好!」既標語,Giodano賣寫住「小平您好!」既tee.

首鋼工人都出來示威,學運帶動工運.

毛澤東既畫像被淋紅油,立時狂風暴雨大作.

香港百萬人大遊行,我一家四口一齊上街...好熱,覺得叫口號好瘀,行過既車都會響號支持.

遊行人數太多,快活谷馬場緊急開放比遊行人士.好開心,估唔到未夠十八歲之前可以入馬場!

民主歌聲獻中華.

然後,雙方膠著.趙紫陽到天安門廣場,在學生既包圍下,苦口婆心勸學生回家.




一個星期六晚,事情急轉直下.

忽然,解放軍入城,記者被迫徹走.

當晚,全家人都無訓,一直睇新聞.

亞視有位記者一直留守天安門廣場,用手機打返來香港新聞中心報導.

只記得,佢一直喘氣;香港既主播,一直問佢既位置安唔安全.

好多消息,好亂.

坦克、裝甲車駛入北京巿,解放軍開熗!

長安大街上,有人用木頭車推走滿身鮮血既人,大家爭相走避.

佢地殺人!!!

點解要殺一d手無寸鐵既人民,自己既同胞?

在綠色既煙霧中,解放軍開入天安門廣場.

民主女神倒下.

北京戎嚴,學生工人領袖全部被通緝.

所有領導人,全部不再著西裝,換上中山裝.李鵬在叫囂.

袁穆話,天安門廣場無死一個人.

北大學生宿舍有人扔小瓶.

人民氣瘋了,王維林站在坦克車前...從此,下落不明.

支聯會召集全港巿民大遊行,但係香港果日掛八號風球.

傷心,激忿,難過.

報紙開天窗---痛心疾首.





兩年後,六月四日,我考完會考,上到北京.

天安門廣場藍天白雲,人民英雄紀念碑有兩個解放軍註守.

我在紀念碑前走了兩圏,立時有解放軍來問我:「幹什麼?」

可以幹什麼?你有熗.

只好走去毛澤東紀念館,看那蠟像一般既屍體,那死而不疆既幽靈.




以前俠義兒女,死前慷慨就義,會說:「碗大的疤,十八年後又一條好漢.」

唔知道,十八年前犠牲既人民,而家在邊?

十八年間,經濟騰飛,記憶褪色,當年出生既嬰兒,依家已經攞成人身份證.

但係,中央仍然係定性八九民運為一個動亂,多得當年領導人英明果斷,我地先有今日既繁榮.

在大是大非既問題上,一樣有人敢口出狂言,叫我地揾豬來做實驗.

還幸,親身經歷果一段歷史既香港人仲記憶猶新,香港仲有言論自由,厚顏謊言者只好北上逃之夭夭.




不想提起,未敢忘記.

一日八九民運未平反,真相未公開,維園都會有燭光集會.

到時見!

12 則留言:

Justin 提到...

有時我上youtube睇「民主歌聲獻中華」,就不禁諗,那時候在台上大聲疾呼既,今日,佢地又响邊?佢地又做緊咩。

Angus 提到...

Yes, 此事永誌不忘,See u @Victoria Park

seikomatic 提到...

4)-4

ak 提到...

Samsara姐姐,

十八年悠悠過去,至今未敢遺忘。

就約好,星期一晚,維園見!

不敗的魔術師 提到...

Justin,

錢,可以收買到好多野既.

Justin 提到...

魔術師:
我都覺。
當日離經叛道既張藝謀,今日都貼貼服服的走入中南海了。

C.M. 提到...

以後都係叫你香水妹妹勒。

小女長大後都要清楚知道呢件事。

渣估 提到...

明晚與你們擦身而過...

米生 提到...

姐姐...明晚見

Samsara 提到...

Jusin:
民主歌聲獻中華...主持係曽智偉,你話佢而家做緊乜?仲有譚詠倫,我本來係Alan fans,直至佢唱「人生基本法」,依家首福佳就唔駛講.

真正可以堅持既,好似係梅艷芳,果然係俠女.

angus:
see u

大師:
你去唔去呀.

AK哥哥:
你覺唔覺依件事,真係一個烙印,忘不了.

數怪哥哥:
有人可以買到,但係都有人係買唔到既.

CM哥哥:
係呀,等DaDa大d,帶佢去維園,試下由一個人點起蠟燭,然後再比火下一個人,再傳比下一個人既情況.依個叫薪火相傳.

渣老闆:
除左豬扖同「中挺靚女」,都有d青春少艾會去嫁.當年佢地都可能未識行,都咁有心,真係令人敬佩.

米生:cu2

數怪 提到...

所以呢,如果有得揀,我都係唔會返大陸工作既.

我覺得,一旦你既生計係要靠阿爺既話,你無可避免就要被佢「收買」.

Samsara 提到...

咁,我都唔想返內地工作,文化差異好大,同埋我唔想離開屋企人同朋友.