2007年6月5日 星期二

燭光

依個一年一度既節目真係好鬼悶嫁.次次都係王丹、華叔,又唱來唱去都係自由花、血染的風采同中國夢.

千祈唔好著裙去,因為要坐地下,仲係露天,落雨就會照頭淋,雨具同水都要貴客自理.今年仲要鬼咁熱,真係可以聞到隔離果位先生既汗味,真係全球暖化呀.嘩,仲要點蠟燭添,真係好熱呀!

咁辛苦,做乜要來呢?

其實,如果可以既話,我係唔會去既.咁辛苦...

但係,每一次最感動既,仍然係宣讀六四當晚死難者既名單.今次我仲坐得好近大銀幕,可以睇到死難者生前既照片,同佢地滿身鮮血,又或者墓碑既相.佢地都好後生,正係前程似錦既年齡,但係一夜之間失去生命.其中十六七歲既後生仔,如果仲在生,而家都已經三十幾歲,可能已經結左婚,生埋仔.

最傷心既,係一班天安門母親,佢地又再一次多謝香港人無忘記六四,我地依個集會對佢地依班每日都被監控既人來講,係好大既安慰.要知道,佢地痛失親人之後,連在公開場合弔唁既自由都無.而有一d死難者既家屬已經辭世,只留下平反六四同要昭雪沈冤既遺願.

更大既問題係中共政府一直唔承認當日有屠殺在北京既學生同巿民,佢地一日唔正視依一段歷史,一日都無可能真正得到認受.只靠經濟發展係唔足夠既,除左吃飯之外,人仲有對公義自由民主既追求.

點解馬力會講出依一番不經大腦、等同政治自殺既言論呢?佢真係唔知佢會令到六四燭光晚會更多人?會唔會就係因為佢心虛?

十八年轉眼過去,只見華叔老矣.唔知佢依家佢仲係咪朝朝游水?望住佢臉上果d好深既皺紋,不禁諗起陸游既【示兒】:

死去原知萬事空
但悲不見九州同
王師北定中原日
家祭无忘告乃翁

希望我地唔駛等好耐先可以見到公佈真相,希望好快我唔駛再去六四集會,要用腳來表示「不想提起,未敢忘記」.

9 則留言:

喵妃 提到...

Sara姐,早晨呀!我好尊敬你地每一位有份出席既人士!你地既精神好令人感動呀!

另外想問下,你既e喵係咩呀?我想請你去我個新貓竇度坐下呀,賞面嘛?^^

Samsara 提到...

喵妃:

唔好意思呀,依排比較忙,遲左比email你.我已經send左email比你啦,我既仇家比較多,所以無公開我既address,費事比人spam...

ak 提到...

Samsara姐姐,

果日AK番完工去到,坐左係第三個足球場...

其實,每一年都係咁過,或者到既原因,都係俾國內曾經受過苦難既同袍知道,仲有人無忘記過去...

其實,打從2003年七一之後,次次去六四,七一,大會都會不停報數,講真...你無論坐滿十個足球場又好,得自己一個又好...同路人多少,會影響你對件事既睇法咩?我諗唔會囉...

Samsara 提到...

我唔知自己坐在邊個球場呀,係在圖書館隔離,對住個銀幕囉.

依個其實係一個幾個人既儀式來既,不過知道多d人來參加,我係會開心d既,因為都仲有人係一樣無忘記,兼且肯來花時間來表達意見.

同埋,我深信我地既參與,係會比到當權者好大既壓力既.只要堅持到底,終有真相大白既一日.

七十樓危危下望 提到...

samsara 師姐:
唔洗 delete 喎
ummmm
可能佢工作上有唔方便既地方
所以先成日兇人地囉
轉貼
除左係讚賞
仲有表示認同文中所言的意思

佢果篇文
係寫得幾好架喎

渣估 提到...

乜唔係「燭」光咩?

渣估 提到...

我果晚坐左晌三個自由行後面!

hihkhi 提到...

當夜,我亦想起這首詩。只是,我想不清,究竟,「王師」是誰。

Samsara 提到...

王師可能係人民既力量,到果一日,就可以真正平反六四,公報真相.