真歷史比假小說來得有趣

我已經封左做偶像既歷史學家唐德剛先生講：真歷史比假小說來得有趣！

真是高見高見，唐先生既《晚清七十年》仲好睇過金庸小說，真係黐手，捱眼訓都要掙扎睇埋佢。

而依家真人真事既新聞，仲好睇過肥皂劇。

比如，泰國總理沙馬捱過反對黨的彈劾，亦都無視人民佔領總理府高呼要佢下台，但係，勢估唔到，沙馬最後下台既原因係：佢上電視教人煑佢最拿手既咖喱鴨胸...講真，我最先在網上面見到以為係講笑...如果肥皂劇有ｄ咁既情節，一定比人her死。

真事有時候比故仔更加離奇。


今晚睇鳳凰衞視一個講台灣政情既節目，睇到下面陳水偏在２０００年第一次競選總統既廣告：



今時今日聽到阿偏講佢既親友「都没有外國護照，從來没有想過要把錢存在國外...」...哈哈，真係好笑過什麼獎門人。陳家洗錢風暴的鬧劇正在上演，我承認，我真係有追東森電視新聞，就係因為佢日日新鮮鑊鑊甘，峰迴路轉過推理小說，台灣新聞總有辦法將新聞報導得引人入勝，就算八卦，都八得好睇。

講返依個廣告，如果諗返陳水偏係出身自極度貧窮既家庭，苦學成才，佢後生時仲係一個正義既「維權律師」，真可謂係一個活生生的台灣傳奇。廣告入面一張張純樸既面孔，誠懇既呼籲，再加上台灣當年在江選澤民既文攻武嚇不停軍事演習下，陳水偏講不要戰爭，希望台灣平安...真是很温情感人的廣告，連長得很抱歉的阿偏都立時順眼左。

到左2008年，台灣人在「阿偏八年」之下搞得經濟倒退，人民生活困苦，在馬英九對決謝長廷既總統之戰，網上流傳依個廣告「讓我們好好的投」：



姑乜論依個廣告係咪真係獨立製造，但係，真係拍得好好。用一個女孩子既由二十歲到廿七歲，串連台灣既政經變化，其中講到既招考清潔員既李叔叔，係前兩年台灣失業率很高，一個政府清潔員既招聘廣告，竟然引來超過幾百倍既申請，由於求職既人太多，當局乾脆舉行一個扛沙包跑步既比賽，最終勝出者就可以「嬴」得依份清潔工作；想當年我在東森電視睇到依個新聞時，除左覺得當局連ｄ咁creative既請人辦法都諗到之外，睇到滿頭大汗揹住沙包、只為了一份掃街既工作而拼命狂奔的台灣人，一樣係心有惻側然。

到左依家馬英九上台一百日多ｄ，佢既政府同佢本人就連連講錯說話做錯事，結果好快有人講出一句：「走了一個壞蛋，來了一個笨蛋，我們就完蛋」。

嘿嘿，台灣人既文字功力，真係遠勝香港。


反觀我地呢？很醜的poster，很悶既選舉，更悶既新聞報導。

「讓我們好好的投」...又有幾多個係揀得落手嫁呢？...講來講去都只有三十席直選，全面雙普選仲可能搞到2046，好未來吓。曾特首個樣越來越似董伯伯，令人忍唔住諗曾生會唔會有朝一日宣佈佢腳痛...

在依個悶局之下，我係咪應該轉睇花好月圓算呢？