2008年9月9日 星期二

真歷史比假小說來得有趣

我已經封左做偶像既歷史學家唐德剛先生講:真歷史比假小說來得有趣!

真是高見高見,唐先生既《晚清七十年》仲好睇過金庸小說,真係黐手,捱眼訓都要掙扎睇埋佢。

而依家真人真事既新聞,仲好睇過肥皂劇。

比如,泰國總理沙馬捱過反對黨的彈劾,亦都無視人民佔領總理府高呼要佢下台,但係,勢估唔到,沙馬最後下台既原因係:佢上電視教人煑佢最拿手既咖喱鴨胸...講真,我最先在網上面見到以為係講笑...如果肥皂劇有d咁既情節,一定比人her死。

真事有時候比故仔更加離奇。


今晚睇鳳凰衞視一個講台灣政情既節目,睇到下面陳水偏在2000年第一次競選總統既廣告:



今時今日聽到阿偏講佢既親友「都没有外國護照,從來没有想過要把錢存在國外...」...哈哈,真係好笑過什麼獎門人。陳家洗錢風暴的鬧劇正在上演,我承認,我真係有追東森電視新聞,就係因為佢日日新鮮鑊鑊甘,峰迴路轉過推理小說,台灣新聞總有辦法將新聞報導得引人入勝,就算八卦,都八得好睇。

講返依個廣告,如果諗返陳水偏係出身自極度貧窮既家庭,苦學成才,佢後生時仲係一個正義既「維權律師」,真可謂係一個活生生的台灣傳奇。廣告入面一張張純樸既面孔,誠懇既呼籲,再加上台灣當年在江選澤民既文攻武嚇不停軍事演習下,陳水偏講不要戰爭,希望台灣平安...真是很温情感人的廣告,連長得很抱歉的阿偏都立時順眼左。

到左2008年,台灣人在「阿偏八年」之下搞得經濟倒退,人民生活困苦,在馬英九對決謝長廷既總統之戰,網上流傳依個廣告「讓我們好好的投」:



姑乜論依個廣告係咪真係獨立製造,但係,真係拍得好好。用一個女孩子既由二十歲到廿七歲,串連台灣既政經變化,其中講到既招考清潔員既李叔叔,係前兩年台灣失業率很高,一個政府清潔員既招聘廣告,竟然引來超過幾百倍既申請,由於求職既人太多,當局乾脆舉行一個扛沙包跑步既比賽,最終勝出者就可以「嬴」得依份清潔工作;想當年我在東森電視睇到依個新聞時,除左覺得當局連d咁creative既請人辦法都諗到之外,睇到滿頭大汗揹住沙包、只為了一份掃街既工作而拼命狂奔的台灣人,一樣係心有惻側然。

到左依家馬英九上台一百日多d,佢既政府同佢本人就連連講錯說話做錯事,結果好快有人講出一句:「走了一個壞蛋,來了一個笨蛋,我們就完蛋」。

嘿嘿,台灣人既文字功力,真係遠勝香港。


反觀我地呢?很醜的poster,很悶既選舉,更悶既新聞報導。

「讓我們好好的投」...又有幾多個係揀得落手嫁呢?...講來講去都只有三十席直選,全面雙普選仲可能搞到2046,好未來吓。曾特首個樣越來越似董伯伯,令人忍唔住諗曾生會唔會有朝一日宣佈佢腳痛...

在依個悶局之下,我係咪應該轉睇花好月圓算呢?

7 則留言:

seikomatic 提到...

書咩 Er,

Li te 醒喎友yi 昌阿bei er 雞cd,kam咩er chu yi 沙。

匿名 提到...

雖然唔知仲有冇其他既原因,但係對於泰國總理落台既理由,真係好難想像泰國會有飛黃騰達既一日。

再睇香港個堆所謂既選舉論壇,尤其係黃毓民大戰民建聯個段,真係完全失去盡公民責任既興趣。我係西九人,睇哂咁多個參選人,最後都係決定不投票。

姐姐,應該係〝彈劾〞。

seikomatic 提到...

俺真系唔明,乜閣下覺得選隻【大舊長毛癲狗】就於禮/理不合咩。

手法當然可以相榷、但系縱容不義=幫凶。

再者,每種生物都有佢地存在的意義同空間,生存的方法。

C.M. 提到...

香妹:

有時候呢,又悶又醜,都未必差過又精彩又漂亮既。

Samsara 提到...

大師:我係港島區既,結果局住選左一個識做戲既大律師,咁佢起碼好樣過落選既街巿阿嬋嘛。

獅子哥哥:泰國依單野真搞笑,我覺得佢個國家好似有好嚴重既城鄉分裂囉。

改左改左,tks!

CM哥哥:都係嫁,就算馬英九靚仔又肯著住條短褲跑步,結果佢搞唔好台灣經濟,都一樣係坐唔穩。

Hana 提到...

睇三國、孫子兵法、聊齋、水滸傳都好過花好月圓呀(如果隻眼唔累的話)

Samsara 提到...

Hana姐姐:你都唔睇肥皂劇嫁?原來,依部係叫「家」好月圓呀!