2008年9月29日 星期一

的士司機

我今次在上海幾經艱苦截到一架的士,一打開車門,就見到座位上既白布椅套已經發黃,仲要佈滿五頻六色既污漬,唯有努力地找出一塊乾淨少少既地方坐依,而且,第一時間挍下車窗,吹走車廂入面可既煙味。

我一講出目的地之後,司機就立時開始投訴,話咁近做都要坐車...well,上海的士起標11蚊,己經可以去好遠,如果唔塞車,,由城中到城西都只係廿幾蚊,我依程要15蚊,行路係分分鍾要成個鍾,佢係咪有生意唔想做先?之不過,只要的士大佬唔好踼我落車,佢依d「中男前更年期全世界都欠左佢怨氣沖天生意失敗候郡症」,我係可以當係耳邊風既。(我之前真係試過有個的士司機話佢唔識去淮海中路,吱一聲停車,之後自己落車幫我打開車門,「請」我落車。要知道,淮海中路繁華有如彌敦道。)

但係,今次大佬真係病發,一路上抱怨由牌費的士租貴、周圍塞車、個個都係短程客、成日落雨...總之就係天地不仁之類。司機大佬一面罵得口沬橫飛,一面渣車渣得如狼似虎,在繁忙既路面上寸步不讓,仲差d撞到一架電單車,之後同個鐵騎士互相怒啤一陣,再各自上路...

突然,大佬在我既哼哼哈哈既回應之中發現我既香港口音,就即刻改變話題,問比如「香港人都很有錢吧!」、「你過來上海做生意嗎?」之類關你鬼事既問題,仲要在我落車時遞上佢既咭片,叫我去機場時call佢的士....

張咭片,在我發現第一個垃圾桶時,既刻掉左入去。

11 則留言:

Juicy Runners 提到...

開心不開心,都係睇佢自己點選擇啦~!
這視乎個人天生之性格,後天之EQ,幫不著邊際,找不著空間。

學黃子華講:開心又一日,唔開心又一日,咁我仲意咪揀唔開心LO~!吹呀? 點解一定要揀開心呢?

SAM姐呢篇,很有黃教授’心無罣礙’之中一篇呢味道。

匿名 提到...

report趕完...

以一個負能量勁爆到超標既在下,似乎見到依一篇都唔係好應該講野...

不過...作為一個勁勁勁負能量既人,要可以係短時間之內轉換面色口音話題...依d真係要有專業訓練之外,仲一定要有天份...在下...自問應該做唔到...

果位的士司機,可能可以去表現奇人奇技喎...

C.M. 提到...

香妹,雖然個司機咁騎呢,但睇落你好似好開心咁博...

匿名 提到...

dog o:
點解一定要揀開心呢??

這個問題值得思考. 我總是選擇快樂, 發現如此艱苦的.
這一周,我實踐和學習做不快樂, 因為我不快樂!
原來非常不錯的, 每個人都來向你關心. 這通常是我的角色.............

Samsara 提到...

On Dog哥哥:贊成,我成日都話,我有唔開心、黑口黑面既權利,邊個話我一定要時時刻刻都要pleasant嫁?

之但係呢,有得揀我就緊係揀開心啦,因為如果個人既基調係開心既話,都係唔好老脾一陣就無野lu。

AK哥哥:實情依個司機大佬由頭到尾個語氣都係咁上下無禮貌,所以佢比咭片我時,我真係忍唔住要佩服佢既勇氣。人係要有自知之明囉,佢呢,根本唔覺得自己有問題,衰乜都唔知囉。

CM哥哥:我因為今年年頭大風雪時試過完全截唔到車,要在雪中行左差唔多一粒鍾,所以只要上到車,我係可以忍受的。

牛牛:林夕有本新書,佢話自己一世人寫得最慘既歌詞,係「原來我非不快樂,只我一人未發覺」...咁岩,我有一段時間勁down時,腦裏一直唱依兩句。

依家睇返,覺得第一步要承認自己既情緒,唔開心,未就係唔開心囉,犯法嫁?之後,慢慢可以體諒到,情緒會來,亦都會走,有如大雁飛過長空,了無痕跡。 :-)

匿名 提到...

姐姐,我都想揀快樂架,點知今日係放完假後第一日返工,就發覺俾人屈,條氣頂足一日,而家仲有 D 頂住。

匿名 提到...

"唔開心,未就係唔開心囉,犯法嫁?"
--------正!
愛你,愛你,愛上你!

K 提到...

估唔到上海的的士司機見錢開眼, 仲衰過香港!

姐姐您幾時仲要去上海?

Samsara 提到...

獅子哥哥:咪唔開心啦,食死貓真係打工仔好難免,人同人點解硬係有咁多衝突嫁呢?

牛牛:愛上我,就是你人生中最大的錯...哈哈,正經講返,開心唔開心既情緒,都係會過嫁,我呢,寧願快地觸底,之後先至可以回升呀!

Karen:一樣米養百樣人,香港我都試過有司機又依又lu又話唔識去,結果要我截第架啦。

Marshmallow 提到...

話說有次小女子係機鐵站坐的士番屋企啦,咁我都知衰,最多跳一次錶,都諗住俾多十蚊個的士佬架啦…點知個衰人一路駕車一路係個walkie-talkie跳跳聲咁鬧,臨落車重話要收行理費.喂!件行理明明係我大脾喎!慶起上黎,咪數足$21.60既毫子俾佢,落咗車之後,都重睇住佢係到數呀數,數呀數…心涼晒!!

Samsara 提到...

綿綿:依招又幾絶...我呢,只係時不時要去上海姐,希望今年都唔駛再上。