2008年12月30日 星期二

Never say Never

依個世界,真係Never say never。

比如,次次行街時,我一講親「依間店d野唔岩我。」咁就多數好邪地,唔知點解會買一大袋野走。

比如,昨日先講完報紙有強力negativity bias,只有見死不救先可以上頭條,今日報紙頭條就係:醫生醫好人!

Wow...蘋果繼報導免費送長者早餐既東菇亭之後,又一次帶出暖流!

我相信,醫生、急救員、同熱心途人合力救人既感人故事天天在發生,我自己都試過在街見到有個男人頭暈,食店立時攞出椅比佢坐,jump水比佢飲,街坊七嘴八舌問佢駛唔駛睇醫生,佢話ok咁我就攞佢手機call佢個仔落來接佢。

有時候,報導一下依d事,先至係反映真實社會既各種情況。

=====


昨天有一個勁搞笑既新聞,就係陳水扁在自己再次被收押前一日,唔係花多d時間陪自己年老病弱既母親,唔係花多d時候陪自己老婆仔女,亦唔係又搞煽情群眾運動...佢竟然係運用依個咁寶貴既自由時光,買左面額2500萬冥鈔,到嘉義市地藏庵,燒給地藏王菩薩,化解他上世同邱毅的宿怨。

面額2500萬冥鈔有幾多?多到塞滿一架車,搬到佢既警護索晒氣...乜陳水扁唔係基督徒來嫁咩?

真係:好Dry!


邱毅何許人也?佢係國民黨籍立委,仲係台大經濟學博士,美國康乃爾大學博士後,讀書人來。邱毅被台灣傳媒封為爆料天皇,扁家既貪污洗錢案邱毅差唔多日日有新料爆,仲要單單都係堅料,所以邱毅一出,一定有大班記者去圍佢。

佢同陳水扁既交手自「三一九槍擊案」起。記唔記得2004年陳水扁競選連任總統時,本來國民黨既連戰在民意調查係領先既,但係,在選舉之前一日,發生一單疑似槍擊案,有人向陳水扁同呂秀蓮各開一槍,當時情況同消息一片混亂,而陳水扁亦都係一團亂局之中,以些微票數,出奇地羸左大選,連任總統。

依單咁既槍擊案,真係超多疑點,比如,個槍手話咁快就比人滅口,話畏罪自殺喎。仲有好靈異既係,陳水扁件外套無穿,但係佢又可以中彈喎,真係....用Quantumn Mechanics加「超弦理論」(即係String Theory)都無辦法解釋到依個物理現象!

咁,邱毅份人有獵犬一般既性格,就當然死咬依單野不放啦!佢在三一九之後既兩日,三月廿一日就帶領群眾沖擊高雄法院,仲因為依單野,被控「首謀聚眾妨害公務罪」(係,我都以為依個咁騎呢既罪名在大陸先會有,點知,well,原來台灣都真係中國既一部份囉),坐左七個月監。

中間打官司時,邱毅既老婆同佢離婚。入到監,邱毅話,陳水扁特登搞佢,有好多小動作。比如,成日都揾d癮君子同佢同倉。大家都知,毒品依家野真係「不可一,不可再」,食得多,真係會痴線,會發癲,會打人,而且,仲嘔到周圍都係!

Well,咁,大家都唔難估計,邱毅最愛既小說係...《基度山恩仇記》啦!

邱毅一出監,就立時開始佢既調查同爆料。佢既料,亦都促成今時今日陳水扁一家人被起訴!


咁依單野,明明係今生今世陳水扁自己做既好事,阿扁又會低能到賴什麼前生宿怨。咪玩啦,咁樣賴法,真係完全不負責任!

今朝東森新聞去訪問在地藏庵幫陳水扁燒冥鈔既婆仔,問佢燒左冥鈔有冇用。婆仔好有point地講,依個唔係恩怨問題,而係是非問題,如果陳水扁有貪污就打唔甩!

依d道理,婆仔都明。但係,一世聰明,台大法律係第一名畢業既陳水扁竟然睇唔通....


今日,陳水扁又要返入去坐,我同阿媽兩個追依單新聞追到上左癮,雖然十分不齒陳水扁一家人既所作所為,但係,我地兩個都不免有d唏噓。阿媽話,佢咁樣出一出來又要返入去,真係寧願無出過來,今次入去佢既感覺真係會好悽涼,好慘。

阿媽雖然一把年紀,但係都好天真好傻。佢在度講,可能陳水扁經過今次之後,真係會開智慧,真係會參悟一d人生既道理,可能...連陳水扁都可以改邪歸正!

嗯,我呢,都有d贊成嫁。佛說點解人間會有苦呢?兩個字---無明

佛就比較善良,用詞温和,我講得白d,其實,人會受苦,就係因為無知

我地被自己所蒙蔽,迷失左,所以做左一d害人害己既野,所以無論係咪大隻佬,都一樣要唯有業隨身。

但係,今日做錯,唔代表一定永永遠遠無得救,雖然,「放下屠刀,立地成佛」依d事件真係非常少見,咁只係因為做到依樣野好難,但係,唔係話無可能嫁喎。

所以嘛,都係Never say never,個個人呢,始終都係有希望既。


我諗。

16 則留言:

匿名 提到...

真係因果報應, 佢唔係基督徒但自比耶穌釘十字架.
見一生在監獄出出入入, 通櫃巳通到佢生痔瘡.
http://stevepolylife.pixnet.net/blog

Barry 提到...

陳水扁有中國傳統信仰特徵,就係以為拜得神多就有神保祐。佢應該覺得冇辦法甩身,於是人地話邊個神靈就拜下邊個。

匿名 提到...

其實大陸同台灣根本就 x 味相投,只不過政治上打交... 台灣其實係好大陸,例如幾年前去台中,出火車站俾啲人圍住問要唔要車,咪同二十年前深圳一樣... 如果聽下近代史,會發覺以前台灣嘅獨裁同大陸無咩分別

黑人 提到...

咁人始終係一個人,必然有大把野係無知的,未必係「蒙蔽」<---一個主動的動作

可能係人自身的局限
如果你覺得係蒙蔽,即係暗示有野掃得開佢,於是就會執著點樣叫做「有知」,點樣可以「掃走」d 「蒙蔽」

如果一開始acknowledge 左自己有局限是無知的,個心會唔會定d呢?

小弟不是佛門中人,純粹9 up

Juicy Runners 提到...

>>陳水扁件外套無穿,但係佢又可以中彈喎...

更係用WANTED"殺神特工"裡既曲線射法,咪得LO~!

Morca 提到...

我都好鍾意讀 基度山恩仇記 ...

都係做少啲虧心事...

seikomatic 提到...

人生極喜極悲,廢妃不汪比生。

神父送果本書就知有錢都唔比校會去燒衣,耶穌惦會保護你呀?

Samsara 提到...

Steve哥哥:乜你對台灣既新聞咁有興趣,寫咁多post既?我記得陳水扁係自稱基督徒,之前仲有個什麼基督教長老會成日出來撐佢,不過佢今次咁罪證碓作,連長老會都唔講野啦。

又,你個blog名加埋個留言,搞到我最先有d驚驚地,驚你唔知係d乜野收藏呀,哈哈!


師兄:唉,陳水扁今次真係病急亂投醫呀!又,我呢,一講我係佛教徒,都成日比人問我拜唔拜神,諗唔諗經,係咪初一十五食素,諸如此類。

606:我對台灣人既感覺真係好分裂,我去旅行接觸到既台灣人好友善,比香港人有人情味,但係business接觸到既台灣人,個個都係古惑兼打死攞就既人。

台灣有愚昧到爆依家都仲撐陳水扁既人,但係又有大量乜野悶絕人寰既書都睇既傻瓜,可以支持到咁多冷門書同廿四小時書店...

黑人哥哥:我可能有d詞不達意,我既意思係,我地因為懷習慣而蒙蔽左良心,我地因為唔識分好丑(=無知)所以做錯事,結果,害己兼累街坊。

真正既佛說,係好少有文字遊戲,講到玄之又圓又完,講到你唔知佢想點既。佛清清楚楚而且,在佢一生之中既45年傳法之中,不停地用不同既方法來解釋點樣破無明---四聖諦。

Barry師兄個blog有好多resources,有興趣可以睇下。

Samsara 提到...

On Dog哥哥:係喎,你既偵探頭腦,仲勁過神探李昌鈺呀。

不如,我地做下實驗,你企在隻豬前面,睇下我打唔打得中....隻豬丫!

Morca姐姐:基度山恩仇記我當年睇左最頭去到佢成功逃獄就開始無興趣再睇落出lu。

大師:唉,真係,唯有業隨身。

匿名 提到...

samsara姐姐,

AK仍然相信破邪顯正...絕對同意,真正既佛說其實唔係果d睇極唔明既野...不過,又真係要用心先可以睇得明...有時無心,就睇唔明...所以,都要講下緣...

K 提到...

Samsara姐姐,

我都係信佛之人, 有些朋友話佛理比其他宗教難明, 緣份可能是原因, 但亦要用心去明; 任何正統宗教只要導人向善, 不論信神定信佛都可以, 但係唔好講一套做一套, 如阿扁和x震。

對於醫生醫好人, 其實應該要報導, 但唔好咁細篇幅; 而明愛單o野, 我想講, 但係似乎要declare自己的身份(您明啦), 所以...嗯。

最後, 祝姐姐新年愉快!

Samsara 提到...

AK哥哥:與其講消極又唔係好知係乜既「綠」,我寧願叫依個做「選擇」。真正既佛說雖然無玩文字遊戲,但係,因為實在太過反直覺,同我地一樣思維習慣完全唔同,所以,佛在悟道之後都要慨嘆佢悟到既法「甚深難明」,好難解比凡人聽...

不過呢,佛法有一樣野好,佛教我地要硏究調查自己既起心動念,時時刻刻要清醒地「如實觀之」,所以,佛教既野你全部可以自己親身做實驗,如果你check完之後,發現,車,都唔係咁既,你大可以唔再理依套理論...風水佬就呃你十年八年姐,佛法,自己一試就知。

又,Barry師兄有求必應,即刻post左四聖諦出來,我覺得依個真係好正,因為Ajahn Sumedo係美國人,而且由佢既書中可以睇出,佢曾經係一個憤青,仲要好鬼死多野諗,而且係理性完全壓倒感情既人,搞到自己三十歲生日先發現自己情緒年齡得六歲...所以呢,佢講好多例子都好中!

我當年初初睇依類佛說ABC時,因為實在真係太「甚深難明」啦大佬,成日都會睇幾段就睡魔急call,立時倒地,一本薄薄既書仔都睇成幾個月....唔駛食藥隊酒都可以即刻訓喎,試下啦!

Samsara 提到...

Karen:我都覺得呢,只要導人向善,咁就已經係好既宗教。不過信佛最大鑊係,佛唔係要你信佢就算,佢係要你明白佢講既道理之後,在人生既每分秒都live the dhamma!仲要最慘係,我想賴天賴地賴阿媽都唔得,想坐在度等人救我又唔得:”The work has to be done by you, the Buddha only shows you the way"

共勉。

匿名 提到...

各位新年健康快樂呀!

seikomatic 提到...

Hey 嘉倫子。

好難明因為只要有個天主,大佬,老細,精神米飯班主射住,基本上自已唔駛林咁多野。服待好你既【主人】自然天堂無休,福壽永遠,壽與神齊。

做一套講一套邊個唔系呀,佛祖教你佛法自已又無法無天。空無空空。

佛教其實無教你做善事,做咩都得,不過只教你因緣果報,你唔介意惡果或者好似呀扁咁先先甜後苦都得架。

師妹真系可以座系度等人救架,如果,如果佢上世欠你既,或者佢想積善因,自然會有人救你囉。唔系典解叫人臨急抱佛腳,臨死唸觀音姐。

Samsara 提到...

大師:你都知我份人啦,無人來加多腳我都已經要感恩啦,都會自己爬反出來穏陣d....