2009年1月10日 星期六

Google..... Earth

係咪所有男人都鍾意Google Earth嫁呢?

我當年第一次見Google Earth係在個供應商度。果日已經舟車勞動,加上開會睇廠成日,累得賊死,只想快快去食飯,然後就返酒店訓啦!

但係,一直見供應商果兩個人在間房入面,神色凝重咁一直望住部電腦,而且不停指指點點個mon。心諗,一定係d好重要既野!都係唔好阻佢地。

但係佢地一直指左大半個鍾都未完,我就餓到打鼓...嗯,都係入去睇吓乜事。

結果,佢地睇緊Google Earth,電車甲正在揾緊佢鄉下比電車乙睇....................


==========

我英國來既大老細「阿爺」本來已經熄左notebook諗住走,等我又可以關門收工。但係同我講多兩句,講到位置問題,就立時打開個電腦袋裏面再攞出notebook,再上網,一定要上Google Earth來show比我睇。

跟住又順手show埋佢間大屋比我睇啦當然。




比老外寸我佢個toilet仲大過我成間屋我都慣左,但係大爺間屋真係大得緊要,佔左成個舊鎮差唔多一半!有齊網球場游泳池唔在講,佢仲有一片小森林,有好多樹,所以成日有松鼠、鹿、甚至狐狸走入佢花園。佢仲有個温室,種滿各式蔬菜,又有個小果園,有士多啤梨、Raspberry、黑嘉倫子同梨!聽到我流晒口水。

不過呢,佢話今年d松鼠偷食晒d士多啤梨,搞到佢無得食,佢好嬲喎。哈哈,乜個劇情咁似Peter Rabbit既?

不過佢最驚人既係,咁大地方,佢無揾人來清潔喎,就係佢老婆一個人做齊清潔煮飯園丁同農夫!佢老婆係香港人來喎!只係抺地都半條人命啦,真係佩服佩服。

不過諗諗下又明點解老板娘要自己一腳踼來照顧間大屋,佢在香港做慣野,一下子去到英國工又無得返,人都唔多個,做下家務同園丁都幾好。老板娘不嬲鍾意種野,依家有咁大塊田任佢玩,一定好開心!

=====

阿爺其實來香港都不過係巡視下業務,好鬼得閒,所以成日都會揾我傾計。佢實在係好博學,上至天文地理,下至歷史時事,樣樣都答到嗲,所以同佢傾計都幾好玩。咁,佢食鹽多過我食米嘛,又周遊列國,仲要好hill地講,佢第一次來香港時,我都仲未出世!佢又講流利法文,同埋跟佢老婆學少少廣東話,不過,佢老婆淨係教佢衰野,佢成日自稱「鬼佬」,又學齊「鬼婆」、「鬼妹」、「鬼仔」同「黑鬼」。

不過,我當然永遠都可以大到阿爺。比如我教佢寫「男」字,講佢知,男呢,就係「田」字加個「力」,即係男人本份就係要耕田做下苦力,依家無田耕就應該爭住來做粗重野!作為一個舊式英國紳士,佢---完。全。同。意。

佢呢,講起歐洲人,就個個都唔鍾意。我問佢,吓,乜你地英國人好似無乜人鍾意嫁呢?佢話,係嫁,佢地同個個歐洲國家都打過仗,同法國依個世仇打左廿幾次仗,德國兩三次,其他西班牙、葡萄牙,為左爭地盤唔知打左幾多次。仲有,佢最唔老黎既美國就打左一次。

嘿,咁就真係比晒位我潤佢,立時同佢講,係囉,果次英國衰左在Boston Tea Party嘛!

阿爺就即刻兜返,話果次其實係英國對法國。果時英國在海上打到法國一卜一look,法國為左損耗英國實力,就幫美國人獨立囉。但係打完依場仗之後,法國都搞到一窮二白,成為法國大革命既催化劑.......wow....歷史故仔真係好聽過小說!

阿爺又講佢地成個皇室都係來自德國,啊!唔怪之英女皇既所謂Queen English咁鬼難聽啦,明明鬼咁重口音,係都要話係標準英語發音喎。英國最搞笑係,仲試過有個皇帝(唔記左皇帝個名)係唔識講英文既!!!哈哈,英國皇帝只識講德文......

係囉,歐洲人種實在太似啦,以前歐洲d皇室仲要成日玩和親,d公主成日嫁去隔離國家,根本就係血統大兜亂...做乜鬼仲要分咁多國家,你唔妥我唔妥你呢?

有冇得,一個地球,只有一種地球人呢?

 

5 則留言:

HollyCow 提到...

有冇得,一個地球,只有一種地球人呢?

唔得呀!你太妄想!若言只有一種地球人,Life 就唔再 Fantastic 了!
http://hollycowplanet.spaces.live.com/?_c11_BlogPart_BlogPart=summary&_c=BlogPart

ondog 提到...

地圖? 點止鍾意睇, 仲鍾意自己畫添呀! 死未?

南區肥龍 提到...

好駛好用兼免費,可以瞬間看地球,梗係鍾意啦~

遮咁...我又係咪電車丙呢?

s-pig 提到...

點解我有時見到你個post,有時又見唔到既??

Samsara 提到...

Come on牛牛,你都講話依個世界真係估佢唔到嫁啦,人既想像力呢,比起真實發生既事,實在差好多囉。

On Dog哥哥:自己畫??吓!點畫呀?

肥龍哥哥:「電車」依個尊稱,一定要對號入座先得嫁,如果唔係,就會出現青面獠牙既黑神嫁啦!

小豬妹妹:呵,咁都比你見到,我收左佢在執執呀中間。