心靈環保

台灣的聖嚴法師昨日圓寂。

其實，法師從小已經身體唔好；依幾年，法師多次出入醫院，亦都有通告他們佢有腎病。

醫生本來係要法師換腎來保命既，但係法師慈悲，覺得自己年紀大，唔想佔用一個腎，所以拒絕換腎。

大家都心知肚明好快就係離別的一天，但係，到真係發生時，仍然好激動難過。



我第一次去既七日禪修營，就係去法鼓山。當時法鼓山仲未起好，只係住在臨時療屋。地方好細，好熱，唔夠沖涼房同toilet，成日都要等好耐...因為第一次，我一世人都未試過打坐咁耐，亦都從來未試過七日都無講一句野。

雖然環境貧乏，但係，我從來都未試過咁充實同寧靜。「出册」之後係約左丁丁過去台北玩兩日先至返香港，丁丁一見到我就講：「哇，你塊面乾淨到發光呀！」


因為法鼓山，我開始行千里之行既第一步；因為法鼓山，我年年點都會抽時間起碼去一次禪七；因為法鼓山，我受足五戒...對法鼓山，對法師，我充滿感恩。



法師教我地活在世俗既人，在紛擾忙亂既世界中，要小心守護自己既心靈。所以法師提倡心靈環保，教大家要從心靈的淨化做起，用慈悲心對待眾生，用智慧心處理事情。保護自己的心，不受困擾及污染。

對於法師既感恩，我地最好既報答方法，就係跟隨法師既教導，保持赤子之心，做一個正直、善良既人，佛法唔係攞來讀書做學問玩辯論既，法師係要我們在每一日既生活中，分分秒秒實踐佛陀既教化。 我地實踐戒定慧，就係對於法師既最大尊敬同回報。


當年在禪修營，晚課之中有以下一段；第一次讀到時既震撼同感動仍然難以忘懷：

是日已過，命亦隨減
如少水魚，斯有何樂
當勤精進，如救頭燃
但念無常，慎勿放逸！


共勉。