2009年2月15日 星期日

止 - 觀呼吸

唔好意思我今日趕時間,只係好簡單地講,而且寫得好亂。

「止」同「內觀」都係靜坐既方法。其實,禪修、靜坐又或者瑜珈都好似唔係太好既翻譯,在巴利原文之中,靜坐係Bhavana,意思係對心既培育(mental cultivation),即係,訓練自己既心。而且,佛對點樣培養自己既心有好清晰既教導,一d都唔玄,亦都唔禪。

我地個心呢,其實成日都心亂如麻,所以首先要停止自己既妄念紛飛,修習止(Samatha Bhavana)就係要修練專注力。止有好多好多五花百門既修習方法,而佛推薦適合所有人修習既,就係觀息法(Anapana),觀自己既呼吸。

我之前有寫過人要活在當下,唔知獅子哥哥有冇一邊睇,一邊心中忍唔住媽媽聲:「鬼唔知要活在當下咩?但係點活先得嫁??」

止就係培養活在當下既一個好有用既方法,我地一出世就已經開始呼吸,但係平時我地從來唔會留意佢;當你一開始觀察呼吸,本身就係留心今時今刻既自己....原來,呼吸係有長有短,有輕有重,而且,有好多時候,你只係用其中既一個鼻孔來呼氣同吸氣。當你只留心你既呼吸時,你就已經係活在當下啦!其初你剛開始時,係好難做到既,但係,僈慢總會有一刻你係可以全心觀察呼吸既,依一d少少既活在當下既moment其實好重要,因為佢可以挑選你個心一向既習慣,我地習慣左唔係懷念後悔過去,就係幻想恐懼未來,觀息法可以訓練心安定落來,真正注意當下。

依個觀息法唔同氣功,唔係吐吶訓練,你唔需要控制呼吸,只需要觀察呼吸,當你依個呼吸慢時知道依個呼吸慢,當你依個呼吸快時知道依個呼吸快,心中清楚呼吸係點樣就得啦。佛係教我地要「如實觀之」,所以,我依刻既呼吸係點樣就係點樣,無需追求呼吸要「深長慢」,當你個心靜落來之後,呼吸自然會輕柔。

呼吸仲有一個好特別既地方,就係呼吸係身體唯一一個明意識同潛意識都可以控制既行為。「心理學之父」佛洛依德「發現」左人原來有潛意識,其實,佛陀在二千五百年之前已經發現,佛陀叫潛意識做anusaya。

佛洛依德認為人既明意識只係冰山露出水面既一角,潛意識先至係深藏水底既可怕而且完全不受我地控制既一面,潛意識係毫無理性既野獸,隨時搶咪做出一d我地會一世後悔既野,但係,我地可憐既明意識既了解唔到更加控制唔到潛意識,只係活在潛意既mercy之中....

但係,佛就唔贊成佛洛依德既睇法,佛發現人係有辦法了解自己潛意識既,而且仲可以慢慢訓練潛意識,令我地真係可以做到自己既主人...而第一個切入點就係呼吸。我地既明意識控制唔到心跳、腸、胃、腎、肝、荷爾蒙,但係,我地可以覺察亦都控制到呼吸。當我地由得潛意識控制呼吸,而只係觀察呼吸時,其實亦都間接觀察到自己既潛意識。當我地專注在當下,心全部集中在呼吸時,呼吸會很慢和輕,但心中一有煩惱時,呼吸立時會變得粗重。

透過觀察呼吸,我地可以踏出了解自己潛意識既第一步,亦都係令自己心定下來既第一步。佛教我地修習時需要三個步驟---戒、定、慧;修習觀呼吸,就係修習定(concentration)。

但係只有定都只係可以令心在靜坐時安定,心中既煩惱其實並未根除;佛陀話人之所以有煩惱係因為我地無明...既係話,因為我地無知...咁,我地點樣先至可以唔再無知呢?咁就一定要修智慧,靠既就係Bhavana中內觀(Vippasanna)啦,內觀唔夠時間寫,下次再講。

****

對內觀靜坐有興趣既朋友,可以睇下依個香港內觀靜坐學會。佢地個個月都有舉辦十日內觀課程,時間表在依度

係,要成十日咁多先得。

係,一定要去上堂先至學到一d皮毛。

靜坐係我一生人之中學過最難既一樣野,而且,佢好似游水咁,只睇書係學唔識既,一定要落水自己親自去飲水掙扎先至可能學得識。

試下啦,我剛剛在農曆年去過十日內觀營,返來二個禮拜以來,我變化之快同大真係有時自己都唔相信。而我既變化(再加我七寸不爛之舌),亦都鼓勵左公司既潮童報左佢復活節既課程呀!要知道,我對住同事既時間仲多過朋友屋企人,仲因我係佢地上司既關係,我既劣根性,妹妹首當其衝,睇得最清楚,;我有d乜野變化,佢地亦都係第一個知。

好野來嫁!

不過,當然,又係果句:No Free Lunch,內觀是很難的,要用心努力先至會有成效。


****

(題外話:唉,你睇下佛洛依德佢本人就知佢點解覺得潛意識係洪水猛獸,佛洛依德佢一世都係雪茄chain smoker,最後搞到患口腔癌而死;佛洛依德仲要好怕旅行,可以既話佢係絕對唔會離開自己鄉下去看世界的。佛洛依德根本控制唔到佢自己,佢唔係自己既主人,一個心理學家搞唔惦自己既心理問題...講真,令我真係好懷疑佢既心理學說囉。)



PS,我依家封埋周處做偶像,一定會努力除三害!

PPS,我覺得,「佛教」與其話係佛既宗教,不如話係佛陀既教導好過。佛從來都話佢只係人,唔係神,佢稱自己為老師,教導我們一種快樂和平地生活既方法。

我自稱佛教徒係因為我贊成依一個生活既方法,亦都親自嘗到咁樣生活既好處,所以會繼續奉行佛陀既教導而好好做人。

我覺得咁樣一d都唔迷信囉!

9 則留言:

ak 提到...

Samsara姐姐,

一野就去到「阿賴耶息」...有點嚇人呢...

AK一貫都比較傾向儒家...

出自大學...

大學之道,在明明德,在親民,在止于至善。知止而後有定,定而後能静,静而後能安,安而後能慮,慮而後能得。物有本末,事有终始,知所先後,则近道矣。

渣估 提到...

最近睇左 Echart Tolle 的 The Power of Now (台譯「當下的力量」), 講「活在當下」, 寫得唔錯, 在此推介!

Barry 提到...

師姐,
香港南傳禪修學會(http://www.hktheravada.org/)都有提供禪修課程和佛法講座。

seikomatic 提到...
作者已經移除這則留言。
seikomatic 提到...

師妹,

俺一直好想 either學氣功或者打座,其實系想體會下元神出竅既感覺。

開始刻意長呼短吸,呼縮(肚) 吸漲(肚) 都得,你話齋到自然習慣就會唔再專注呼吸。

儒家的止到慮,系為左觀外而為,慮天下事如何了。明清大儒【明心見性】,仍有心有性,養善心,見養性,則規行距度。

佛家的內觀,觀心,觀無,觀空,非為外而觀。目的層次不同。

seikomatic 提到...
作者已經移除這則留言。
seikomatic 提到...

呀仲有一種方法,雙手交結一個手印,然後感覺下左手結右手定右手交左手,到感覺唔到為【止】
一行禪師話過,行路都可以入定

ak 提到...

大師所言甚是。

儒家學說畢竟係一套「入世」既思想,追求既甚至有d柏拉圖,講求一個整體既提升...這和佛家既「超脫」的確是有所不同...

不過AK倒覺得,雖非「殊途」(透過靜止雜念而專注於問題之重心),亦非「同歸」(儒家思天下,佛家忘天下)...不過卻是相當的「有趣」...

Samsara 提到...

AK哥哥:原來係阿拉耶識,我睇英文版仲在度睇究竟係d乜野添。

咁一個人要有真正而持久既改變,就梗係要動到潛意識啦,否則,一切都只係流於表面既mind games,口舌之爭,new year resolution攞,結果,都仲係做左d自己唔想做既人,唔做d自己想做既野,結果都係,錯完又錯又錯又錯...

儒家呢,我只睇過1/4本論語,唔識,不過唔明佛既教導有幾出世喎,就係因為佛教有和尚尼姑?咁天主教舊有神父修女啦,又唔見有人話天主教出世?

佛無叫人忘天下。


渣老闆: The Power of Now睇過啦,真係經典,依家睇緊Why good people do bad things...十分有趣。

師兄:多謝!仲要多謝你寫返上堂既notes添 ^^

大師:修止既方法五花百門,據說佛在時,一有新仔比人踼入會,首先就會比人帶去見佛陀,佛陀會根據新人既根器來叫佢修唔同既方法既;不過,今時今日佛已經不在世lu,無人可以好似佢咁同你「因病施藥」,不過,佢教既觀呼吸係最平和同universal,適合所有人修習。