十公里

Yo，今年第五次跑十公里！

－　快左５分鍾...雖然呢，都仲未達標，但係依５分鍾真係我博晒命地跑，所以都好開心。

－　瘦左７磅！終於遠離警戒線，體重回覆正常。

－　第一次跑第一場5:15，跟住ｄ Elite跑手食塵....其實，連塵都食唔到。十公里係銅鑼灣跑去太古城，再屈返去跑到維園；我連未跑到三公里，對面線已經有人跑緊回頭！！！佢地好明顯係撒雅人，我明明見到有幾個係金毛既！

*******

我開始跑十公里，係一個中學舊同學B努力遊說兩年既成果，佢自己就跑開馬拉松既，最先佢講十公里女仔都跑到呀，行都得呀咁，我地無人肯信佢。哇，佢個個禮拜都跑山幾個鍾嫁喎，佢既唔難就係我地會跑死啦！不過之後大家計落十公里有兩個鍾頭跑，一小時五公里又真係行路既速度，所以一班人就抱住大不了比人掃上車既決心，柴娃娃開始跑第一次，開始左我既十公里周年跑。

B哥哥呢，係依個世界少有既沈默寡言，兼且永遠諗清楚先至會講既人。當年我中四坐佢隔離，心急既S加上慢工出細貨既B哥哥，經常會發生以下既情況：

S：「B哥哥，你xxxxxxxx呀？」

B：......（諗緊S個問題）................（好認真地諗緊）................................ (努力地諗緊）................ (仲未諗到）....................................................................................(都仲係未出聲）..........

S：.........（等到花兒也謝了）....（開始神遊太空）.........（諗到第二個問題)....「B哥哥，咁xxxxxxxx呀？」

B：（終於開金口）.....「xxxxx (答緊第一個問題）」

呵！


之後，大家大學畢業一兩年，B哥哥發現患癌。

B哥哥，結果打勝仗！


S在初出社會時，曾經有一段好迷失既時期。

當時S覺得，依個世界只有自己最重要。S當時係百分百自私的，除左自己之外，什麼家人、朋友、舊同學，通通都唔重要！

所以，同學既聚會S無出現，同中學同學都無乜聯絡。直到有一次去中六班主任屋企現時，S先見到B哥哥，果時B哥哥已經開始康復，但係S都仲未知發生也事，仲要好thick地問B哥哥點解佢條頸變得咁粗.....

在B哥哥努力抗癌時，S完全唔理唔知......

S忍唔住同自己講：「原來，我差D無左個同學。」


之後一年B哥哥生日時，一班舊同學同佢去南丫島食海鮮。在回程時，S坐在船頭，吹住涼爽既海風，忽然明白，年年都可以同朋友慶祝生日都唔係必然嫁！


B哥哥讀書時已經打波游水好Sporty，在抗癌勝利後，佢就更加注重運動，差唔多香港所有全馬半馬十五公里都會參加。

依個世界係無Free Lunch既，自己既健康自己負責。

可以年年都去跑，證明我身體都還好，第時老左，未慢慢行囉！



其實，年年都去跑，係一件好幸福的事。