2009年6月4日 星期四

遺忘....?

問題根本唔在於係咪遺忘,曾經親身經歷過二十年前波瀾壯闊的民主運動,曾經感動過,充滿希望,上過街,傷心過,喊過既人,無可能失憶。

人生在世,不過幾十寒暑;功名利祿,轉眼成灰。

在此時此刻,正正係人性既照妖鏡。

如果你乖乖地就範,中共金主就大把錢另加回鄉証比你。

唔好以為只有美女先至可以出賣自己。


總有一日,正義會得到伸張,到時依家扭盡六寅來淡化、歪曲、美化歷史現實既一班小丑角,自有其應有既歷史地位。

六四的真正歷史重要性雖然仲要等時間以及中國未的的民主進程發展來肯定,但,六四事件肯定被大部份人所低估的。雖然民主人權既火花一時被坦克車壓下,但,正如嚴加祺所說,「把中國的所有寃氣都盡量地壓住,壓到後來,學過物理的胡錦濤就會知道甚麼結果了。」

我從來無諗過六四有可能唔平反的,你有可能屠殺自己平民百姓之後扮無事發生嗎?平反六四係一個必然,只係唔知道乜野時間會平反。

而且,唔需要咁悲觀,唔一定要再一個二十年的。

二十年前有邊個估到栢林圍牆可以一夕之間倒下?


哈哈,我實在生在一個有趣的年代,絕對會見到中共形勢突然轉逆,六四真相重見天日的。

到時,六四死難者可以安息,天安門母親沉怨得雪,在承認錯誤既基礎下,中國可以真正前進....再會同場加映,一眾小丑角再一次表現光速變臉。


天地攸攸,我地都不過活在借來的時間,借來的空間。人生在世,重要既係:

問心無愧。

4 則留言:

ak 提到...

對於果班小丑來講,光速變臉的家常便飯...

如果從中國過去平返冤假錯案既例證而論,通常係要等到所有同單案有直接關係既人都作古之後...咁...可以問一句...

李鵬,你仲唔捨得死係到阻住地球轉為咩?

不過...呢家個問題係...唔係李鵬一個人,而係成個利益集團...係錯縱複雜既利益結構互相綑綁之下...可能要問一句...

中共...你幾時先肯退落黎唔好阻住地球轉?

Samsara 提到...

如果講利益集團,胡綿濤係鄧小平指定既接班人,江澤民係第一彈出來支持屠城而上位,温家寶在前上司被人拉之後噤若寒蟬....

一代又一代,幾時先至死得晒先?

中國共產黨唔係鐵板一塊,而且,依家既建制,令在社會既各階層既精英都入左黨,所以,依家唔好講唔可能在在野黨,比你中共瓦解左,邊個可以立時上手管理先?

如果真係打如意算盤,最好既情況係中共內部自己變質分裂,唔好有打仗死反幾十萬人,唔好又搞d神經運動餓死幾百萬人!


不過,依d野都係斷估,最重要係做好自己。

我都知依一件事好偒,我都覺得搞廿年都仲係連丁子霖一介老婆婆啦,去拜祭個仔都唔比...好沮喪...

但係,依d都唔係借口。

什麼解放軍入城=/=屠城,政客bundle左六四同其他議題,你比人利用呀....

Well,講得似層層,有好多人點頭說是。


我呢,覺得,問自己個心。

你可以欺騙其他人,不過,千萬唔好欺騙自己。

市場維京人 提到...

本來對於平反,我也是樂觀的。相信有生之年應可見到?

可是,見到年青的一輩,特別是內地年青的一輩,被蒙敝被迫淡忘,諗起又會覺得好沮喪。

Samsara 提到...

依家係資訊年代,就算來多一個秦始皇焚書坑儒都無可能清洗記憶的,而且,國內網民要突破總是有辦法的。

我相信,建基於謊言武力同流血既政權既唔穩定的,在時機來臨時,自然會有量變同質變。依樣野,我有十足既信心。

依家最危險既,反而係有人想偷換歷史事實,想以三寸不爛之舌來扭曲事實既人囉。

問題唔在遺忘,而係被hijack。