加油

人同人之間既緣分，真係好奇妙既，有乜野好得過，同自己由細玩到大既同學仔，到左今時今日都仲可以一齊聚舊？又邊度會有朋友好得過鬧晒交拍晒枱反晒面之後，過左無耐，都係無事，照樣你有你講，我有我唔理。

我成日都覺得，識得我最耐既朋友係最慘既，因為，嗱嗱，各位有目共睹，我係咪越來越温柔善良過中學時先？Well，已經好左都仲係咁既樣，既係講，細個時完全係洪水猛獸，個個都受過我唔少拳腳啦...幸存既，都係難能可貴既內功高手。有你地依班朋友一路不離不棄，我呢，其實真係覺得自己好好彩。

依壺人參烏龍真厲害，洗左成機衫，成四點幾我都仲係眼光光，越來越唔知自己想講乜。嘿，我訓唔著絶對唔係因為ｄ鬼故呀吓。

朋友，我只係想講呢，難關始終會過去既，可能，好快就會雨過天清，分分鍾，再轉埋前面既路口，就會轉入大直路呢。

加油！

雜雜想

實情，今次係我第一次睇晒成個奧運開幕典禮，連長到嘔，２０４個國家運動員進場都有睇。我呢，仲未搞清楚十二碼係乜，不嬲唔係點睇運動比賽。


很喜歡畫軸既概念，打開一軸軸畫來講故事；仲有十足matrix既活字印刷，拼出不同既「和」字。不過中國既文化歷史實在太多太豐富啦吧，只可以樣樣講ｄｄ。而且，有冇搞錯，崑曲表現時，竟然用古箏來伴奏...咪玩啦！...唔駛急，中國絶對仲會再舉辦奧運既，唔駛真係將五千歷史壓縮在一個鍾頭內講晒。

運動入場時，你會見到富國與窮國既分別，加拿大有幾多人口？但派出三百幾個運動員，仲要上次只係攞到幾個奬牌。而窮國呢，小貓三四隻，國家名都未聽過，要評論人介紹，依個國家在非洲或者係太平洋小島。

運動員入場時，我一直在留意，有冇國家係只有一個運動員呢？真係有，坦桑尼亞。


一個人的奧林匹克會下星期在香港上畫，１９３２年，中國當時都已經有幾億人口了吧，只有一個人，孤獨的奧運會，好似好好睇呢。劉長春在日佔時期差ｄ比日本人老屈要代表偽滿州國出席奧運，搞到要流亡海外，坐廿幾日船先去到洛杉磯單刀赴會，但係旅程太辛苦，體力不繼而攞唔到奬牌。

唉，比人踩到上心口就係咁。

到１９８４年，已經十億人口既中國，先至有射擊手許海峰羸到第一面金牌。哇，搞到要１９８４年前至有零的突破，真係估唔到咁遲！

今年２００８，體操王子李寧在北京代身男版飛天，以Skywalker姿態點燃聖火。王子雖然有小小啤酒肚，頭髮又有ｄ稀疏，但係，仍然寶刀未老，吊住威也圍住鳥巢跑咁大個圏都一樣係咁瀟灑有型。對於李寧，我最記得既唔係佢勝利時既風采，而係佢失手在吊環跌下來，仍然燦爛既笑容。

百年蒼桑，人間冷暖。


不過蒼桑既不只中國，在栢林奧運會時，希特拉一心認為優良人種阿里安人一定可以嬴田徑項目，結果呢，比美國既黑人運動員Jesse Owens嬴男子一百、男子二百、跳遠同男子４x１００接力，一個希特拉心中只配做奴隸既低賤種族，嬴晒高貴優種德國選手，恨恨地傷了希特拉脆弱既ego，搞到依個小家種，在眾目睽睽仲要有電視錄影之下，唔肯同Jesse Owens握手，傳為千年笑柄，哈哈，很爽。



如果真係有同一個夢想，就是和平吧。

不如一齊放和平鴿啦。

雜想

香港有幾何打８號丫，我竟然在上海！！！

當人人都在屋企睇電視時，我就跑來跑去見客返工，沮喪．．．．．


不過，有驚人發現....................在上海睇到蘋果，唔係iPod，真係蘋果日報wow!!!問朋友，佢話，係，如果要在奧運村睇到蘋果既話，就要全中國都唔Block佢既Website。真係估唔到有朝一日我可以在大陸上到蘋果網，真係奧運帶來的奇績！嘿，不過，要睇就依家好睇啦，奧運一過，我寫包單蘋果又會封鎖。

昨晚呢，我第登坐地鐵由東方明珠去新天地（其實主要係因為放工時間好塞車），奇怪地，無傳聞中既查袋喎，我經既都係大站來，不過丁丁話前兩日佢就見到喎。

新疆既恐怖襲擊，真係令人震驚，兩個狂漢，可以一下子殺死十六個武警，一方面，都反映左我地習慣於平安的生活，少有咁既恐怖吧，所以被殺個措手不及。

其實都唔駛好耐之前，只係十年前呀，你諗都唔會諗到有朝一日中國人會變成恐怖襲擊既目標...但而家時不時都會聽到中國人比人在非洲、中東被擄人勒贖...依個係「中國掘起」的代價嗎？

坦白講，當年當奧委會宣佈2008年係北京時，我係非常開心既，我地既國力，終於都出到可以主辦奧運既程度，中國人呢，唔再係一窮二白了！但係，當我地唔再係無足輕重時，就係會有搶火炬、恐怖襲擊依ｄ咁樣既事，既然鎂光燈照到了中國，除左好事之外，壞事亦都一樣會被吸引過來。

又，中國人始終都係信心不足吧，否則對於火炬時既反對聲音唔會有咁大既反應。一個人有自信時，就會有包容別人不同意見的能力。信心係一點一滴地建立的，下次中國申奧時，應該是上海了吧，到時候，中國人既自信應該會高得多，不會因為有人反對示威而大動肝火。

我呢，雖然覺得上海地鐵既人迫車時如狼似虎勁無禮貌；我亦覺得大部份中國人都需要toilet training，要搞好衛生，唔知醜陋的中國人中有冇提到「可以用鼻子來找」、「有中國特色」既厠所；仲很討厭上海奇醜無比既東方明珠，覺得係將暴發同bad taste熔為一體；但，就算十年文革有幾大破壞，都不能殺死一個傳承了五千年的文化吧，有朝一日，中國可能會有佢自己既「文藝復興」，等依個千年文化，再次影響世界。

科技

據說，我地生活在科技一日千里又資訊爆炸既年代，如果大家好似我咁有返咁上下年記，回憶往事時，就係十足婆仔咁，講緊一個完全唔同既世界。

記唔記得未有手機未有傳呼機之前既世界係點運作呢？當年一家只有一個電話，頂多係加個分機，但係都只有一條電話線，仲要無call waiting，阿女煲電話粥時，全家就成為孤島，當年成日打成幾個鍾頭電話都唔通，就係因為同學仔既阿哥家姐煲緊粥。

因為大家一出左街就無辦法揾到你，當年約人都係會先去一ｄ好簡單易去既地方等齊人先既，我都真係好耐無聽過約人在「旺地恆」、「老地方」見依ｄ咁老土既事囉。而且，因為無得call人話要遲ｄ到，所以，反而大家都比較準時ｄ，否則如果你遲半個鍾頭既話，朋友仔就真係要在度好徬徨地乾等。

又，仲記唔記得以前在茶樓永不間斷既廣播：「陳ｘｘ先生，陳ｘｘ先生，請聽２號線」？當年我係好恨有朝一日會call我名嫁！哇，連你飲茶時都要揾你，咁你一定係好重要啦！


之前睇左篇文章，係一個男人講帶佢九十幾歲既祖母返去鄉下既經歷。在坐飛機時，祖母唔識校張椅，唔識打開張枱出來，唔識打開toilet門，入到去唔識上鎖，仲要最大鑊係唔識點樣拉開度toilet門出返來．．．祖母話，佢覺得自己唔屬於依個世界，世界已經變得陌生而可怕，佢完全唔明白發生乜事。佢既朋友都走得七七八八，自己都ready....

係科技走得太快，定我走得太慢呢？Okok，我承認比部3G手機舞到暈駝駝...但係，我地都要分清楚莊閒嫁，一部手機最緊要係乜野呢？未就係打電話囉！點解我以前按一個制就可以call到個Phone Book出來，依家要成四個唔同既制先至去到Phone Book呢？莫非．．．不過係一部手機我都要攞本user manual出來硏究？我作為史前人類，始終都係唔明，有乜咁緊要既事，要搭車時都上網呢？咁未仲勁過在茶樓有人嗌咪揾佢？

咁搞法，如果我有幸活到九十歲時，唔知會唔會連門都唔識開呢？

Hancock, etc

依部戲唔知搞乜鬼，上半截明明好地地講緊燥狂症既街頭超人點樣改過自新，下半截突然變成一個拖拉左幾千年既愛情故事...真係似肥皂劇第一集咁，兩條線一齊開，即係佢想好似超人咁，永永遠遠拍落去。

姐咁，如果兩個人在埋一齊係會攬住一齊死既話，男女超人真係寧願分開好過。

有一本暢銷書叫做【別為小事抓狂】，一睇個書名已經連攞起來翻一翻既興致都無，依個書名真係荒謬，生活中既小事先係最折磨人！

其實要Hancock救火救人又有幾難為佢呢吓？

又，Will Smith個樣衰鬚根look，型過佢個緊身橡膠衫look囉。

****

星期五，當全世界講緊iPhone既時，S靜靜地走去攞佢部Nokia N82。

N82姐，已經係上年既出品，但係對S來講，已經係一個緩慢而痛苦既過程。據說，S係一個連WiFi都唔識串既Low Tech怪。S用開果部Nokia不知名型號既手機，係無得影相、無得聽歌、無得聽收音機、無得上網、無萬用刀既「齋機」，一下子變成個3G電話，個革命程度，有如大耀進。

本來，S對於用慣左既野，係死都唔轉既，但偏偏Nokia既電話雖然㩒跌㩒撞㩒花，但係佢舊電只係可以用到一年起兩年止，S打破記錄，用左兩年半，結果已經半死不活，兩日就用晒電，接收又差，唔換唔得。

S一去電話鋪呢，又如常有入錯男廁既感覺...Nokia在銅鑼灣既新旗艦店，係裝修成好一個令人不安既Cyber look，在死白既牆上透出藍光，在外面一望，S好明顯地感覺到自己唔屬於依個電車異空間。而店內面泛藍光又熱情如火既電車呢，捉住S就開始嘰嘰瓜瓜地「@%&*#X#@#」，唔會理你眉頭越皺越埋；仲要十分Thick地，完全無視S越來越黑既面色，問S既問題一個深過一個。喂，S不過係想買個可以影相既手機咁大把姐，駛唔駛玩百萬富翁先？

於是，S係好受打擊地剪羽而還。

唉。

之後，唯有改變策略，問電車M買乜手機好。電車M第樣唔知姐，依樣極度流利，第一句就係：「唔好買iPhone，一定有bug」....今日睇報紙，蝦，又懝似比佢講中。

就係咁，S為免再入男廁，於是打電話去用開既service provider「數字公司」，訂左部N82，由本來講既一個禮拜就有貨，結果等左三個禮拜，在iPhone全球發行果日先攞到機囉。

今時今日，在依個電車的世界，要保持人身真係唔容易。