2007年2月2日 星期五

面試怪談

雖然有好多人寫了面試怪談,但是當事情發生在自己身上的時候就真是另一回事.

今日約了個人上來面試,約佢十一點就十點已經上左來,話記錯了時間喎.仲要比我見到佢成枝黑色電燈柱咁打斜訓在reception張梳發度,呢個post都認真少見,不知佢係咪以為自己屋企睇緊電視呢?

好啦,等我終於送走真是約十點個candidate,諗住來接佢時,發現reception不見了呢位黑衫黑褲黑頸巾的中國籍男子.個receptionist話佢去了吃早餐,轉頭先返…

到佢十一點真是返來,一來就發出一種煙仔+大蒜+古龍水的可怕味道…

咁就梗係三兩下手腳送走佢,間房開不到窗就唯有向天噴香水再開大冷氣等d味散啦.

頭先仲要收到佢封thank you letter,話佢是呢份工的perfect candidate喎.我個同事睇完就係度狂笑囉.

點解咁黑,我係咪要揾個火盆來跳吓?

10 則留言:

馬沙 提到...

Samsara,
此人是否年青人呢? 新生代大都如此!

Samsara 提到...

佢八二年,24歲.

不過好彩我都請到d好生性的小妹妹.

不敗的魔術師 提到...

>新生代大都如此!

點解而家d人好似連基本禮儀都唔識咁?無家教無公德為之in???

ak 提到...

Samsara姐姐,
呢個都唔止係禮儀既問題lor,簡直係連d基本既策略性思維都無...

明知十一點先到自己,就算早到,要搵地方擺埋一邊,都唔係擺係人地reception ar...

之後出去隻早餐加煲煙...唔係忍唔到果一陣呀...真係忍唔到,都係咁易趙下香口膠,辟下味先啦...仲要因為咁而遲到...

不過佢又居然識send thx you note喎...真係...吞左本面識技巧入口,但係係d基本野上面就失諸交擘...

CK 提到...

Samsara: 面試對一個搵工既人黎講,應該係一件大事,一件唔應該出錯既事,單單一個「連時間都記錯」呢個大罪,就足以踢佢出門口。

而家d人,對自己太無要求啦,以為做多少少門面野就覺得自己好醒,查實得個空殼,連點樣尊重一份工都未識。

洛克 提到...

好彩佢唔係同你示愛~

Samsara 提到...

魔術師:不過我真是都請到d好好的新世代.有個小妹妹一樣是24歲,小時媽媽過身,佢是大女所以帶大細佬妹.做事勤力細心有交帶.

佢咁乖,我都不知幾錫佢.比我請多幾個咁樣的好lo.

AK:你講到Thank you note先是重點,我無比卡片男衣男,佢又點知我email?我公司有人舊公司同佢一樣,估是佢問人攞.咁明明係internal referral就不好quote是JobsDB啦.

仲有,我介紹自己時連自己性乜都無講,咁就擺到明不想佢直接揾我啦.咁都要send email來,不好話,我收到個email都呆了呆.

黑衣人其實是好完美地由頭到尾都做錯呀!

CK,你請人難不難?我其實已經見了好多騎呢人,不過都是黑衣人最激.

喂,洛克,你係咪咒我先,不過佢都無癲得咁緊要.

不敗的魔術師 提到...

唔出奇,所謂「新世代」的意思其實係指在富裕的環境下成長,由細到大都無憂無慮的一群.呢班人的「成長曲線」增長率特別緩慢,甚至心態上拒絕成長.而我們的一上代,或者現在某些少數自小便要憂柴憂米,照顧家庭的人,其成長率也特別快.

C.M. 提到...

問一個嚴肅d既問題,請問香水姐姐見人之前,洗唔洗比人事部篩選過先呢?...定話你依家查實做緊人事?

Samsara 提到...

C.M.,果然係高人,比你睇到呢個問題.

我公司既人治部好惡,係冇First interview呢個service提供既.佢地出到糧兼無計錯都已經要還神.所以呢d一早應該比人事部掟走既人我都要自己見埋.

真係揾食艱難.