愛丁堡公爵奬勵計劃

講開中學既美好時光，我以前係有玩DEA既係愛丁堡公爵奬勵計劃既． 愛丁堡公爵係乜水？咪英女皇既老公囉，DEA好似在回歸之後改左依個有殖民地色彩既名，變左做乜乜青年計劃．

DEA分金銀銅章，要攞章除左要玩各種活動同做義工之外，仲一定要行山．金章行五日，銀章行三日，銅章行二日．而我依世人最刻骨銘心既行山就係中六聖誕節既行山．果次是由二日銅章final加三日銀章試行加埋既，既係話一次過要行五日山．

DEA行山既規矩係中間吾比補給既，所以我地一次過要帶足五日既物資，包括食物，衣物，帳篷，睡袋，地席，爐，gas， cook set，電筒，急救用品… 好多好多野．

我地一行三男二女，我最細，仲要係唯一一個吾係行開山既，所以大家都好照顧我．比最少野我拎，仲要都係d consumable好似食物咁，等我個背囊可以一日比一日輕．但係就算係咁，個背囊都係重到我一定要人幫手拎高先至揹到，如果放到地下既話我根本就托吾起．所以雖然果幾日橫風橫雨，只要一揹起個背囊就已經重到我開始發熱．

我最先好吾鍾意佢地成日都要我行最前，我雖然手渣份地圖姐，但我係一個路痴，每次分义路都要回頭問人點行；我又好驚如果我好戇居咁行錯路，而佢地又見吾到我既話我咪一個人蘯失路囉！

我而家係講緊咸豐年，只有Call機既，而手機就係ｄ超貴既野，吾係我地d窮學生可以afford到既．何況以當年既網絡，真係有手機怕且在個山度都收吾到．如果咁樣在荒山野嶺走失左，真係叫天都不應，喊都無用啦，所以我一直好驚咁不停回頭望有冇人跟住我．

之後佢地先同我講話要我行頭等我可以控制到成隊人行路既速度，等d人吾會行得咁快喎．

啊，原來如此．不過，我都係吾鍾意行頭．上山都還好，落山既時候我連自己同個背囊既重量全部聚曬在膝頭度，有時一落山就落足成個下午，對腳已經不停咁震，真係好驚一下無力就會look落山，佢地無人在我前面，真係完全無人可以擋住我嫁喎，分分鍾一下子就look到山腳底．

講到食就真係好刻苦啦，只有晚飯先至會開火，早餐午餐都係麵包加ｄ涷冰冰既罐頭，請留意當時係好凍既，我地其實只有夜晚先有熱水飲．不過你咪自己揀囉，要吃就要自己揹，要食得好d仲要自己開火煮，如果因為吃飯搞太耐而行吾到camp site既話，你咪自己諗辦法點搭營訓覺囉，仲要第二日好努力咁catch up返之前行慢左果d添．

不過大家都實在太無營養同無菜食，好容易有Beriberi.有一次行經菜田見到個有個婆婆摘緊菜，我地PR第一既女仔就既刻走埋去同佢傾計，大既五分鍾之後，佢高舉一夥好大既生菜跑返來，果時大家都歡呼．哇，吃左咁多日罐頭之後有新鮮菜吃喎，真係開心到飛起，多謝婆婆！

有一日大家既狀態都幾好，行得好快．見有時間剩，於是有人睇完地圖之後提議不如偷偷地走去附近既村莊買氣水飲．咁大家都緊係舉腳讚成啦，我地真是吃得口淡淡．結果，一來一回足足用左三個鍾，仲要翻山越嶺先飲到一枝玻璃樽裝既可樂．

咁辛苦先得來既可樂當然好好味啦，我之後仲發現我對可樂有快樂聯想添呀，一吾開心飲可樂，Er左d氣出來，就好似舒服d．我到而家都仲係覺得可樂個樽好靚， 玻璃樽裝可樂特別好味．

好啦，成個故仔最激既部分來啦，請準備口罩同嘔吐袋，潔癖者請勿睇落去．





嗱，係你自己要睇嫁炸．

Well，咁在d咁既荒山野嶺，無熱水，連公厠都吾多個既地方，點沖涼呢？

嗯，吾想肺炎既話咪就係咁多日都無沖lo．吾係點喎，命仔緊要d嘛．其實當時我已經完全進入左survival mode，真係好恐怖既野已經印象模糊，吾係好記得我係點樣活過來既．

我都吾係好肯定到我終於在五日之後出到巿區坐車返屋企時，隔離d人有冇um住個鼻，不過就好肯定當我返到屋企時，阿媽雖然見我四肢完整咁返來好開心，但係一定冇抱抱我lo．

佢係即刻叫我沖涼.

嗯,我既青春都真係燃燒過.