2007年6月11日 星期一

影相

以下既內容情節雖然好假兼笑爆嘴,但絶對係真人真事.


話說我幾年前去北海道時,曾經去過涵館.涵館出名既除左魚巿場之外,仲有佢一班叮噹(我係老餅,所以係叮噹,唔係多啦A夢)列車.依班火車就犀利囉,成個日本得一架,由外殼到內部裝修,全部係叮噹主題.

班車隔日在涵館開出,去一個唔記得乜野名既地方.好多遊客都會學似我地咁渣住Rail Pass入去,同架車影完相之後就會走,反正Rail Pass已經包左,唔駛另外再比錢.

一入到去,大家都好興奮,每部車箱都有唔同既主題,叮噹,大雄,靜宜,牙察仔,仲有技安.車箱入面,仲有好多公仔同靚靚佈置添呀.咁我地d香港人當然第一個反應就係狂影相啦.仲碰到其他一樣係在香港來既人,有個男子自己一個人來,見我地幾個講廣東話又好嘈既女仔,就揾我地幫佢影相.

咁我地跑下跑下都散開晒,依位哥哥仔在一節車箱拉住我,要我落車影返上來,佢就在門口擺post.

依個時候,月台開始播叮噹首主題曲...我都仲咪醒水,覺得日文版幾好聽呀咁.

當我剛剛影完,首歌都剛好播完.之後,可怕既事就發生左---度門閂左.

果一刻,我地兩個都呆左.好似做戲咁,你眼望我眼.之後,架火車仲向前行添.事情發生得太快,我地兩個人都唔識出聲.

咁樣,依位都幾有型既哥哥仔就跟架火車走左,留返我同佢部相機在月台.我睇住依部單面反光鏡既Nikon相機,好大個鏡頭,但係好輕.就算我依d咁唔識貨既人,都知道部相機一定好貴.

我渣住部相機揾返d朋友求救,佢地最先仲以為我係講笑.大鑊,我地果晚就要坐JR返去扎榥嫁啦,而家渣住人地部分分鍾係物主老婆既相機,真係點算?

好彩我地同行之中有人識講日文,一翻解釋之後,我地去到失物認領處.更好彩既,係依位哥哥都識日文喎原來.火車上已經有員工打返電話返來,話哥哥仔會坐下一班車返來,叫我地擺低部相機在車站度.

咁,我地先可以放低個燙手山芋,放心地繼續旅程咋.

我在依度呼籲2003年11月有去涵館既果位朋友,可唔可以send返張相比我留個記念?依d咁死似做戲既經歷,怕即都唔會多.而且,如果唔係我d朋友做證,真係無人信依件係真事呀,實在太搞笑啦!

12 則留言:

seikomatic 提到...

俺上次系埃及唔同地方都撞到個自由行韓國仔,但第三次佢竟然著住埃及男人D長衫,俺同個fan 懷疑佢洗唔切衫。

匿名 提到...

Samsara姐姐,
AK以前做記者,出埠多數係做野...果次去Las Vegas,帶左兩架相機,一架奧林巴斯,一架Nikon...部奧林巴斯第一日影左四張相就壞鬼左...結果全程靠哂部Nikon攪掂...

從此,AK Blacklist左兩樣野,一係奧林巴斯既相機,二係Smartmedia記憶卡...

匿名 提到...

勁搞笑!
如果個哥仔真係睇到呢到, send張相比妳, 咁就真係正個中六合彩!

匿名 提到...

Sam:

你今次再去日本,記得找番d相似的經歷(艷遇)啦。咁你又可以有多篇遊記寫。如果唔係‧‧‧我怕你,會不停重覆,重温啦!

ah-yun 提到...

Samsara姐姐﹐
真係好好笑丫! 你應該等埋個位「幾有型既哥哥」丫嘛﹗或者留個email嘛! *wink* *wink*

如果部Nikon好輕既﹐應該都唔係好貴。不過唔見左部相機都算喇﹐但唔見左旅行影既相﹐都真係好想喊丫。

我真係可以想像哥哥仔(和你)當時既表情﹐我都好愛我部Nikon丫。^^

野孩子 提到...

令我想起 Mr Bean's Holiday 那段劇情。

人生如戲,戲如人生。XD

Blogger70th Floor 提到...

好好玩呀

~陌生人在叮噹的肚裡慢慢遠你而去~

Samsara 提到...

大師:我n年前去Bangladesh,都買左當地既衫,真係因為無乾淨衫換.

AK哥哥:相機真係記者既命根呀,乜奧林巴斯咁咋嫁咩?

On Dog哥哥:我都係寫下出來姐,如果真係收到相,我會去買六合彩.

麥太:人生如夢,我都有好多幾令人驚訝既經歷,特別係旅行時,我今次都唔會令你失望既.

小雲:我仲以為相機好似球拍咁,越輕越貴添.我地果日下午就走啦,等唔到佢.

野孩子:你覺唔覺真實既事情,有時仲荒謬老土過D故仔?

七十:真係好好笑呀果次.

匿名 提到...

我已經廣發你O既尋人啟示O係

http://www16.discuss.com.hk/viewthread.php?tid=4456104&extra=page%3D2

希望你早日攞到d相同中六合彩!

ah-yun 提到...

SLR camera is a little different. The high ended ones are usually quite heavy. Or the expensive lenses are tend to be heavy too. The lighter ones are usually the entry level camera, not too expensive lah. (Relatively. Hehe.)

匿名 提到...

我都係用Nikon架.

如果果位哥哥仔搵返你,你會唔會同佢...架?

Samsara 提到...

Dareka:唔該晒,睇來我好快會中六合彩.

小雲:原來係咁,其實我以前上過興趣班學攝影既,但係只有興趣睇相,對相機同埋交光圏快門就完全無興趣.

數怪哥哥:我用傻瓜機既,等我去旅行影d相返來.

做乜學似七十咁欲言又止,即係點?