2007年12月19日 星期三

大上海戲院

我weekend在上海,順便探長駐上海既丁丁。除左飲飲食食之外,丁丁有兩張電影coupon,咁就一齊去睇戲。

依度一場戲竟然要80蚊人仔!!! IFC Palace都只係依個價錢,張coupon只係60蚊,仲要再補20蚊,心諗,唔該你果張係鑲金大班椅。

個戲院雖然有幾個影院,但係全部都播投名狀,無得揀。一入到戲院就已經知道出事,地毯又舊又污糟,燈光暗,牆又灰灰黑黑,唔單止無爆谷既香味,仲有陣霉dup dup既味。

入到影院,真係開始妖啦,地下有好多垃圾,行兩步都隨時會踢到野...佢播緊廣告,但係又開曬燈,非常光猛,等我好清楚地睇見d白色布椅套上面有好多一逹逹既積,好心d戲院無打算日日洗椅套既話,就唔好用白布來做椅套啦...雖然咁貴戲院又唔靚,都一樣full house喎,上海人d消費力真係勁...坐我隔離係一位著住黑色皮褸,個頭gel到好型地一支支樹起既男士。係囉,個樣就型囉,但係佢個頭發出一種應該十日無洗頭既濃郁氣味,相信如果有烏蠅既話,一定在佢頭上盤旋。金玉其外就係講緊佢啦,比足十個妖你呀~~~臭男人!

部戲…真係…妖!陳可辛如果夠疆,真係諗住拍部男人既戲,就唔該咪擺個徐靜蕾係度做花瓶,權力利益已經夠晒令人腐化同出賣兄弟,加左依個無厘頭紅杏出牆既女人,太多枝節,反而分薄左佢已經無乜既劇力。

講到兄弟之間因為力利慾薰心而出賣左當年既『劉關張』結義…well…又到喉唔到肺囉,佢地結義唔係因為d乜野義氣,又或者什麼光復漢室既遠大理想,只係因為大家互相猜忌但係又被迫要合作,先至下投名狀囉。因為利益而結拜既兄弟,又因為利益而分裂,好正常呀!

而所謂既出賣兄弟,講來講去都只係李連杰殺劉華之麻。咁劉華在蘇州城外拖馬話要走時,其實已經係叛變,犯軍令者死係常識,唔駛佢即刻人頭落地,係因為仲需要佢既人馬來打南京...何況,劉華由一個殺人放火、姦淫虜略無所不作既山賊,忽然變成浩然正氣既紅臉關二哥...吓,無交持佢點解有咁既轉變喎,就憑果一幕下軍令處決姦污民女既士兵?咁唔夠令人洗心革面嫁嘛...而且,如果陳可辛真係要講權謀既話,不如乾脆話劉華不滿分贓不勻而反面啦,講乜野仁義道德咁假呢?唔通,因為劉華永遠都係劉華,做唔到奸角?

最後果場李連杰狂毆金城武既戲,真係超難頂…李連杰比金城武插左一刀都可以完全無事,金城武呢,比李連杰打斷n條骨之後都仲可以企起身,真係好煩,好想幫李連杰打鬼死金城武,快快完場算啦!

我呢,就係咁樣,在男人味之下睇完一部『男人的電影』...上海d戲院咁恐怖,唔怪之佢既番簡事業咁昌盛啦!

10 則留言:

ak 提到...

Samsara姐姐,

大陸d戲院真係唔知佢地點解,收得又貴,服務又唔掂...自從有左IFC之後,依家唔少香港既戲院都引入左d新既坐椅,好坐過以前好多...

「投名狀」嗎...以AK看來,是比上不足,比下有餘的了...相對於之後果套「江山美人」...

basically,「投名狀」是借以前「刺馬」既劇本...其中「二嫂」既角色於原劇本之中都係一個花瓶(當然,如果你講另外一個版本「滿清十大酷刑之赤裸凌遲」,咁又係另一個講法)...的確,徐靜蕾既角色,可cut(無左佢,套戲一樣ok to go)...

其中,借用歷史太平天國之亂也是有點兒扭曲...例如「殺降」一段,歷史上是由李鴻章所做...至於養寇為患,於太平之亂中就似乎不太嚴重(反倒是之後的國共內戰,更加明顯)...

係一個大政治既環境之下...兄弟情誼倒真的算不上什麼...或者咁睇,劉華也不是什麼正面人物...只不過係作為一個賊,都可以講信義既,他可不介意手下強姦民女,但就在乎自己應承左會釋放降兵而無法履行承諾...至於Jet Li殺劉華嗎...都係一個政治決定,無關乎是否要「勾義嫂」...

不敗的魔術師 提到...

係要玩埋d冒牌劉關張,又玩得唔係好過人,眼高手低...

情願睇avp好過喇!

學霖山莊 提到...

好彩, 無意欲去睇...

C.M. 提到...

都好彩,因為我之前想去睇。

Samsara 提到...

AK哥哥:乜有歷史背景嫁原來,我頭先google完刺馬案先知乜事...馬新貽之死肯定係朋黨之爭啦,慈禧要殺人,駛乜咁麻煩?「勾義嫂」...唯一既解釋,就係中國人最鍾意賴女人囉。

數怪哥哥:係啦,『眼高手低』就係講緊陳可辛,要有翻d視野先可以拍到依種戲,依家搞到幾不倫不類呢!

學霖哥哥:唉,我本來都有d興趣嫁,今次真係難忘。

CM哥哥:聖誕咁多戲,千萬唔好睇依部呀!

seikomatic 提到...

師妹?

戲未睇,不過唔會比錢多...

俺反而覺得D海報:

李連傑惦解眼神咁憂傷既,佢信左佛架?
劉華個鼻好似無咁鉤,不過俺覺得佢可能真人性格太過明顯,所以十套古裝都系做番自已一個樣,what you do expext n I no fan of him ah..
金成毛,not my type of 靚..

真系唔知國內同胞D錢惦泥,不過後生既一般系由父母度轉移過泥...

Samsara 提到...

大師:

上海人既人工,有d真係高到嚇親你,某大外資公司果d唔識講英文既秘書,都要月薪九千大元,唔該記得大陸仲要交d乜保乜保喎,d識英文又位高權重既就更加唔駛講。

我覺得,上海真係充滿樂觀情緒既城市,個個都係辭左工之後慢慢揾,不愁出路,人工樓價只會升而佢地亦只會expect佢升,所以一d都唔會儲蓄,非常有千金散盡還復來既豪情。

我好懷疑香港八十年代起飛初期時,我地有冇咁樂觀。

seikomatic 提到...

師妹,

真系唔知後生有3對父母做後盾咩?

之所以可以等,之所以可以擘!

Samsara 提到...

大師:

係喎,有咁多有力後盾。

丁丁駐守上海一年,講左幾個親眼所見既故仔比我知,對於中國依家既財大氣粗&道德淪亡,我真係幾擔心。

匿名 提到...

香港人80元看电影也觉得贵??
生活真是艰辛阿,好穷阿。