2008年2月14日 星期四

今晚...

上個禮拜起飛前一日,老闆先出training schedule,仲好有心機地,連我晚餐都照顧到...不過,星期四同會記&佢老闆食飯...吓,聽講佢地個個都有老婆仔女,情人節唔陪老婆走來同我食飯,佢地仲想唔想見到星期五既太陽呢?

原來,佢地三個男人都唔記得左星期四係情人節!Well,你睇澳洲既商場幾失敗,在香港,d宣傳鋪天蓋地,想扮唔知都唔得啦!

咁,好正常地,今晚我要自己食啦!今早商店仲要延長服務時間到九點,終於可以shopping下...不過,澳洲d野,咪又係Made in China,又大件,都係買左手信就算...嘿,在鋪頭入面見到唔少慌亂既男士,在最後一刻好苦惱地揀禮物。

又,街頭好好少女仔攞花喎,而且都係細細既束紅玫瑰,隨隨便便塞在大手袋入面,唔會好似香港咁層層疊疊既花紙絲帶再加公仔氣球金沙,真係抱佢唔住。

好啦,今晚真正既難題來啦,在邊度揾野食呢?情人節真係仲旺過年三十喎。我結果係China Town入左無十間都有八間餐廳,唔係book滿,就係只有二人套餐,嘩,比人咁樣一次又一次reject法,好灰。我都知中國餐廳實有位,但係澳洲d中國餐好可怕嫁,又多油又多鹽,真係唔想虐待自己。

到最後,終於在一間台灣人開既日本居酒屋揾到位。嗯,點壽司既豉油唔係日式又唔係中式,應該係澳式豉油,比較鹹同濃;天婦羅既炸漿就似攞來炸薯條多d喎,不過唔好當係日本野來食都ok既,特別係諗到因為依間餐廳有位,所以我唔駛搞到要返酒店叫room service,真係感動!

好,都消化得差唔多,我去酒店旁邊既公園盡最後努力練跑啦,仲有三日咋!大家都要努加呀!

祝各位,有冇情人都情人節快樂!

7 則留言:

dog o 提到...

情人節快樂!
幾時返呀?

C.M. 提到...

情人節快樂! x2

數怪 提到...

大家咁話!

seikomatic 提到...

Sydney?

學 霖 山 莊 提到...

補祝情人節快樂!

女人中了以下陷阱: -

未剪label前:
Made in China
Australia Design

剪label後:
Made in
Australia

道高一尺...
小心...

Samsara 提到...

返左來啦我,訓左成日,聽日努力加油!

又,學霖哥哥,Made in Aus既野,超難揾,我都係買左d Made in China既袋鼠樹熊咋,好行,但係真係無野買。

Samsara 提到...

大師: Melbourne... better!