今晚．．．

上個禮拜起飛前一日，老闆先出training schedule，仲好有心機地，連我晚餐都照顧到．．．不過，星期四同會記＆佢老闆食飯．．．吓，聽講佢地個個都有老婆仔女，情人節唔陪老婆走來同我食飯，佢地仲想唔想見到星期五既太陽呢？

原來，佢地三個男人都唔記得左星期四係情人節！Well，你睇澳洲既商場幾失敗，在香港，ｄ宣傳鋪天蓋地，想扮唔知都唔得啦！

咁，好正常地，今晚我要自己食啦！今早商店仲要延長服務時間到九點，終於可以shopping下．．．不過，澳洲ｄ野，咪又係Made in China，又大件，都係買左手信就算．．．嘿，在鋪頭入面見到唔少慌亂既男士，在最後一刻好苦惱地揀禮物。

又，街頭好好少女仔攞花喎，而且都係細細既束紅玫瑰，隨隨便便塞在大手袋入面，唔會好似香港咁層層疊疊既花紙絲帶再加公仔氣球金沙，真係抱佢唔住。

好啦，今晚真正既難題來啦，在邊度揾野食呢？情人節真係仲旺過年三十喎。我結果係China Town入左無十間都有八間餐廳，唔係book滿，就係只有二人套餐，嘩，比人咁樣一次又一次reject法，好灰。我都知中國餐廳實有位，但係澳洲ｄ中國餐好可怕嫁，又多油又多鹽，真係唔想虐待自己。

到最後，終於在一間台灣人開既日本居酒屋揾到位。嗯，點壽司既豉油唔係日式又唔係中式，應該係澳式豉油，比較鹹同濃；天婦羅既炸漿就似攞來炸薯條多ｄ喎，不過唔好當係日本野來食都ｏｋ既，特別係諗到因為依間餐廳有位，所以我唔駛搞到要返酒店叫room service，真係感動！

好，都消化得差唔多，我去酒店旁邊既公園盡最後努力練跑啦，仲有三日咋！大家都要努加呀！

祝各位，有冇情人都情人節快樂！