2008年2月18日 星期一

......

在尼泊爾有一個不丹難民營。不丹國王實施既高壓統治,強迫國內少數係尼泊爾改想佛教、穿不丹服,全民「不丹化」,最後仲被趕離不丹,流亡尼泊爾。

我去尼泊爾之前,從來無聽過依件事,由當時到依家,不丹都係亳不起眼既國家,不丹唔係蘇丹,無石油(利益),所以咁耐正義既美國都無由專政皇朝又或者中國共產黨手上解放佢地,我唔係話中共做得岩呀吓,不過要令國際關注,都真係要有d牙力,有好多令人髮指既事件,都只係被輕輕帶過。不丹又無好似昂山蘇姬咁樣既代表性人物,一生傳奇可以成書,再加上漂亮面孔、温柔而堅定的眼神、窈窕身型、永遠穿著顏色低調的傳統緬甸服裝、頭髮向後高高挽起再插上一朶鮮花...活脫脫是民主女神的形象,不正是傳媒渴求既"Story"嗎?不丹呢,不丹除左好多人攞來講笑既GNH之外,只是地上在中國同印度之間既一片空白。

就算我當年真係參觀過不丹難民營,都係對不丹依個國家一片空白...依個在1999年先有電視睇既國家,果然唔係宣傳同PR。抱歉用「參觀」依兩字,但係我地依班生於太平、活於安逸既香港人,又點會明依班難民因為係國王唔鍾意佢地,而被迫離開家園,流離失所既心情呢?我地咁樣打個白鴿轉,聽下當地NGO(全部男人)既申訴,同幾個識英文既精英不丹人(全部男人)傾下計...咁又點呢?我地又做到d乜野呢?我地咁樣行一圏,除左感性d之外,同「參觀」博物館又有乜野唔同呢?

最記得係,我地在難民營中走動時,有一個年青的男人(男孩?)塞左封英文信比我,佢話佢係學生,好想離開難民營去美國或英國讀書,求我帶依封信去領事館。

我既第一個反應係不知所措,心裏面其實好想推走依封信,仲想問點解同行咁多人唔比,係都要比我?...而且一連串問題立即在腦中出現,佢話佢係學生,所以想出去讀書,咁,其他人呢?小朋友需要讀書,病人需要藥物治療,無人想過依種籠窂生活。如果只可以幫到一小部分人既話,應該幫邊個?年青既學生就比一個老人重要嗎?讀書識字既就比其他唔識英文既重要嗎?咁一個目不識字既母親想帶比子女更好既生活又點計呢?...等等,一連串無答案既問題,只係在腦中轉來轉去,轉來轉去,好似攪動湖水一樣,表面上好似有好大既進展,但其實毫無寸進,只係翻起湖底既泥土,令本來清澈既湖水變成泥漿...又或者,清水只係將人們唔願意見到既事實強壓下去既假象,泥漿才是本來面目。

封信我結果都係收左,比左同行既主辦人。唔知佢結果點處理,佢可能已經收過無數咁多依d信,問過同我一樣既問題,一樣揾唔到答案。

面對如此覆雜龐大既問題,只令人更覺渺小...回首前塵,剩下既,只有無力感。

3 則留言:

seikomatic 提到...

師妹,

個人力量有限,就算李+x 做慈善都有佢既制肘同其它你我無既考慮。

對身邊事有憐憫之心,慈悲也。

唔系一定要做無國界先系叫做偉大,捐錢,寫出泥比咱們知道了解下,已經系功德。

果句【無緣大慈、同體大悲】嘛。

http://www.cbsnews.com/sections/i_video/main500251.shtml?id=3841772n&channel=/sections/60minutes/videoplayer3415.shtml

Samsara 提到...

大師:我都唔知點講,我只覺得單單係寫出來或者做一個見證人係唔足夠既,甚至係一種消費別人痛苦既行徑,不過我都唔知可以點。

又,唔明點解無緣係大慈呢?

匿名 提到...

SAM,

啊!我不知你去過了難民營。

其實,你預期你會有什麼的收獲?或你是抱著什麼的心態去呢?

我同意大師的見解。雖然,你的感受超越了你的預期。那樂觀的想,你得到了新的及廣的視野了。不好嗎?你的分亨,增加了其他人(如愚昧的我)的認識,不是很好嗎?

我幾認同某敎會節目的SLOGAN,"生命影響生命"。好多時,行善不須刻意去做,也有受苦者得惠。我覺得有很多時精心計劃的結果,〝不一定〞,比真心的善行得出的結果更好。(我重申是"不一定"。)

愚昧的
麥太