古時

n年前讀鄉村大學，有一科compulsory既通識，係要讀同中國文化有關既課程。

我無揀到ｄ好大路既中國文化哲學之類，而係上左一個好輕鬆既中國文化與音樂。

個course其實都幾特別，係一個中國人lecturer用英文來教中國樂器呀音樂之類，好多expat來讀，教得好慢又無乜心機，都幾無謂。

不過個助教就唔同啦，係一個內地來香港讀書既博士生，熱愛音樂，每堂都播一ｄ唔同既中國音樂比我地聽，教我地憑聲音來認樂器...我係音樂盲，聽力below mean，之前完全唔知有人可以光憑聽力，在層層樂器之中，分到有乜野樂器，甚至每種樂器有幾多個...大開耳界。

除左中國樂器之外，助教仲比我地聽各種各樣既戲曲。

在眾多戲曲之中，我一聽就愛上了崑曲。之後知道崑曲係中國所有戲曲之中，唯一一個列入聯合國非物質遺產既戲曲，嘿，我都幾沾沾自喜。

崑曲既温柔優雅，別無他選...笛子真是很好聽。

除此之外，仲喜歡蘇州評彈同埋京韻大鼓...何解說書都可以說得咁有型。

其中助教講，大鼓書唱既劍閣聞鈴係講唐明皇在殺左楊貴妃之後，夜聞飛簷上被風吹響既玲聲而思念故人...嘿，我懷疑古時唔識字既婆仔，只要鍾意睇戲聽說書，都會有文化過我。

後記：原來劍閣聞鈴出於白居易長恨歌之中：雲棧縈紓登劍閣...夜雨聞鈴腸斷聲。我家下肯定，以前ｄ婆仔一定有文化過我。