2009年3月1日 星期日

關於跑步...我說的其實是..........

做人嘛,有趣既地方係,你永遠在最唔可能既位,發生最唔可能既事,產生最唔可能既想法....真係,估佢唔到!

村上春樹我係初中讀過一本,係佢當年紅透半邊天既《挪威的森林》。果時仲係博益出版,好細隻字既袋裝書,仲要因為故事太長,分成上下集兩本書咁多。當年年青有狠勁,一口氣讀完之後,真係踩中地雷燒焦半邊面既感覺,完全唔知自己睇左d乜...好似,既無挪威又無森林,到底,有冇講樹,個故仔講乜,男主角靚唔靚仔呢?哇,一片空白,一d印象都無。

世界上有咁多作家,總有一d係你睇唔明既,村上既書我足足睇左兩本咁多,肯定佢唔適合我。所以,咁多年來,佢出左咁多書,我連拎起來翻一翻都未試過.....直至,依一本:
關於跑步,我說的其實是……的圖像

見佢係講跑步,先至會攞起,翻一翻....well,起碼無乜曖昧到唔知想點既暗喻,而且,村上係講佢自己定係講我?點解咁熟口熟面?

其實,我同其他正常人一樣,不嬲都覺得跑步係一個超級DRY既運動:重複、悶、毫無技巧可言。鍾意咁乾運動既人,全部係FREAK!

Well,咁d長跑手又唔會話好危險地隨時會發狂地打你一身,又唔會話好污濁地嘔到周圍都係;但係當有一d滿身大汗又表情痛苦既跑手,氣羅氣喘地跑過時,我腦海都浮起好似村上所講既"Pain is Inevitable, Suffering is Optional"....村上將依句說話譯造:「痛是難免的,苦卻是甘願的」。咁我係中國人,好自然乾脆會譯成四字「成語」-------攞苦來辛

又點會估到,有朝一日我會受到B哥哥既感召,至今已經連續跑左五年十公里呢?更估唔到,十公里不知不覺間已經變得太容易,我下年要upgrade跑半馬呢?好在我一直甚少在街跑,否則,肯定有路人在肚子中暗暗嘀咕:攞苦來辛!.........依個世界,真係報應不爽。

嘿,不過講得咁勁,我其實只係算係mount車邊地跑而已。十公里依個距離對長跑而言本身已經夠晒短;比如村上佢每日既練習,己經係跑十公里。而我呢,跑左五年十公里既意思係....我依世人只跑過五次十公里囉....即係,只有在比賽時先會跑足十公里,平日練習時,多數都係跑兩三公里就算,最多果次都只係跑五公里;有時攰起上來,跑一公里多d就收工,仲要一副我咁攰都肯跑已經很比面既態度....死未?!

跑步時到底諗乜呢?經村上一提,我先至發現,哇,依個問題原來相當私人,亦都睇怕人人唔同。我自己呢,最多在度糾纏既問題,就係:「跑唔跑多一圈好呢?」

我既身體底子雖然唔算好好,但係多年來都無乜不良嗜好,又儘量早訓,其實要再跑多一圈半圈是可以支持的;但係十次有九次停落來既原因,都唔係體力不足,而係心力不足。多數都係因為果個在心中不停地叫囂既聲音:「放棄啦!放棄啦!」又佔上風,比佢又嬴左........................................



村上話,長跑無勝負之分,亦都唔係同其他人比賽,要嬴阿邊個邊個....信焉?

跑步時,唯一既對手,就係自己。

****

Pain is Inevitable, Suffering is Optional既另一個譯法是「痛是難免的,但可以選擇不以為苦」。即係,身體一面在痛,心中仍然可以保持寧靜平衡,不被外境而牽著鼻子走。

我細個時,當仲有好多好多未來時,係十分大安旨意的。我相信,我依家唔明唔知諗唔通既野,到大個左就自然會通。我中三時,覺得中五做Prefect既師兄們個個都好成熟,但到自己中五時,自己係死靚妹一個,男同學就更加.....Well,咁我又同自己講,我地依班人(不幸地)係晚熟d,到中七時就會大個!.......就係咁,經歷左入大學、畢業出來做野、做左n年野....一眨眼已經到左今天.......S以中女之齡,仍然係一個臭寸無聊又燥底既老少女......咁先至十分遲鈍地驚覺----------原來,食左飯就會成長既,只有身體,心智同身體係分開的!

OK,我都覺得依個係老掉牙既老生常談,駛唔駛好似發現新大陸咁驚訝呀!但係,天,我都係依個禮拜先至靈光一閃,明白:Wrinkle is Inevitable, Maturity is Optional!!!!

Oh....即係話,我如果唔努力培養心智,有朝一日會成為一個巢晒皮但又EQ零蛋既阿嬋的!哇,我光係想像一下依個情景已經十級害怕。亦即係話,好似偽震咁既中年結構性危機,如果唔老實艱苦地由地基開始rework,真正面對自己;光係在表皮上面紓尊降貴,去聚個向全世界證明愛自己多過尊嚴既女人,咁樣,個問題仍然都係:「未解決」...中年危機,只會由於年月增長,變成老年危機.....原來,好多人既中年危機,係靠自己老到唔可以算係中年而「解決」的......

****

同友人食飯席間,另一老少女突然爆出一句:「我鍾意依家既自己多過以前既自己。」

以前我聽到人咁講,一定會覺得係中女死口唔認老,自欺欺人姐.....咳.....不過依家S都係咁既諗法。


細個時,無記有一個好長篇既肥皂劇,叫做「黃金十年」,足足播左成個冬天。當年仲未有咁勁既温室效應,冬天是很凍的。睇完依個肥皂劇之後,我成日會同細佬一齊頂住寒風,出來散下步,傾下計既。

永遠記得,一出門口時,吸入既第一下冷風就會凍到個鼻抽筋,成個鼻頭拉扯掙扎一陣之後先至慢慢酸酸楚楚地鬆開。在咁鬼凍既寒夜又會奇怪地十分寧靜,比人一種酸酸甜甜既感覺,細佬就會問:「唔知我地既黃金十年會係點呢?」

依家,過左十年又十年啦,到底我地過左黃金十年未呢?

以前我一定會覺得,我miss左我既黃金歲月呀,我乜野都無做到!但依家我會諗,係十年定八年都無乜關係,重要既只有今時今刻。



嘿,人生,有趣既地方在於,你永遠估佢唔到!







(其實,開始寫依篇時,只係想寫跑步的,點知寫下寫下就寫成咁....Well,寫完先發覺,村上既書名真係起得唔錯,如果唔係依篇野都唔知起乜野標題好。)


(咁樣寫,真係好開心!)

5 則留言:

ak 提到...

Samsara姐姐,

雖然依家入左港口避風,但係作為一個海盜...總係覺得,有高低跌宕既經歷係最有趣既...

黃金十年?其實AK唔係好理依d喎...as long as仲係幾有趣既...咁就繼續過日子落去囉...畢竟,經歷左上年,更加發現,「你估佢唔到既...」

PS.村上有另外一本講威士忌的...哈哈哈...好正架...

Bacakara 提到...

想盡快睇下村上本書,希望有所體會。

Samsara 提到...

AK哥哥:又係對面既山風景更好?嗯,如果係不情不願委屈地成為改造人,咁不如死都唔改仲好過。

睇來大叔既書,我只會睇依本lu。

Bac哥哥:好睇!特別係有去跑步既人,一定超有共鳴,兼且好贊歎依個傻佬。

水駱駝 提到...

講返d型男,竟然在Facebook見到有人用這個做相片……
http://www.facebook.com/home.php#/profile.php?id=1524918155

Samsara 提到...

水姐!!!

老老實實,我見到依位型男,第一個反應就係硏究下我其實識唔識佢,我寫blog而撞返大學同中學同學,超邪!

應該好快會撞返小學同學!