中檢

由買左錢甖開始。依家跑左１２次，係時候中檢。

總共跑左77.7公里，用左9小時16分鍾15秒。

體重一磅都無減到，不過拜拜to拜拜肉；而且S終於都可以扭得開所有既樽蓋，有一段好長既時間，S係零肌肉，成日都打唔開蓋。

而且，好耐好耐都未試過，可以真係好肚餓，餓到肚都痛的。記得好細個時，應該仲未讀小學，S係分唔到肚餓同肚痛的。當年小S會同阿媽講話肚痛，媽咪比ｄ野食，咦，唔痛啦喎，反覆練習多次S先至分到肚餓同肚痛.......依家真係飽食年代呢，真係好耐未試過會餓到覺得ｄ腸係會郁的。

而最最重要既係，好開心！係整體地開心輕鬆左，感覺良好。

由第一次同教練一齊跑，上斜上到完全透不過氣；到剛才，同一條路，快左4分鍾，仲差唔多全程可以講到野。嘿嘿，果然係教練，見到S既心算一塌胡塗，同S講話要練均速7 min/km，點知S返到屋企一計，原來跑到破自己記錄的6.45min...快果少少原來係好難好難的！

S好鍾意倫敦馬拉松既其中一個信念：
"To have fun, and provide some happiness and sense of achievement in a troubled world. "

對於可以開始長跑依個奇妙之旅，S心中充滿感恩。


各位，ENJOY running!