超越...（其實係比人超越）

雖說跑步是個人的運動，是自己同自己的比賽，但，當有一班人一起跑時，總有比人超過的時候....個感覺，當然不爽啦。

話說，S有個中學同學剛剛在東京讀完書返來，話佢閒時都會去唔記得乜野皇家公園去跑步的。佢第一次跑時係跟大團既逆時針方向的，但係，之後次次都掉轉頭，跑順時針....點解？唔係因為佢想鍛鍊唔同既肌肉，而係，咳.....因為佢第一次跑時不停地比阿伯，美少女，OL，甚至阿嬋超越....覺得好瘀，都係順時針跑自尊無咁受傷.....嘿嘿，人家日本人可是很崇尚運動的，中學時成績好只係比人當係書蟲，要運動好先至會受歡迎....東京馬拉松人家果種盛情招待唔止係好客之道咁簡單，佢地真係當馬拉松選手係英雄咁樣尊敬的。


S其實都好習慣比人超越的，仲會好乖地，跑步時永遠會靠埋離馬路遠ｄ既一邊行人路的；而且，覺得比人超越總是會學到野的。

比如星期一，S又再一次比同一位哥仔超越；依個哥仔次次都揹個背囊的（S一直懷疑佢放weight入去背囊練強度），又因為S成日比佢過，所以，哥仔個樣唔係好認到，但係個背囊就好認得！依次S留意到一樣教練其實講過好多次既野，其實背囊哥仔跑步既頻率並唔比S快，但係每一步都比S大多。背囊哥仔當然係高過S的，但係點都無高一倍呀；於是S在背囊哥仔背後偷師，試下加大步幅。哇，真係得，同背囊哥仔個距離立時可以保持到....一陣咁多.... S咁先至第一次掌握到，原來，真正既跑法係可以成隻腳踼高再直落的！跑步竟然可以有飛行的感覺！！！！

（揹背囊跑步既哥仔，如果下次發現有個傻婆用好感激既星星眼望你不突止仲要吊你尾，唔駛驚，佢只係想試下自己可唔可以跑快ｄ姐。）

又話說，星期五S又去跑時，見到一個肥仔著住籃球背心、長到落膝頭既籃球褲，仲要一對高筒籃球鞋來跑，一幅打籃球比人放飛機，結果死死地氣地在屋企樓下跑步既樣...籃男實在太重啦，仲要越跑越慢，S在落橋時一下就跑過佢。

點知，當S跑完一大輪，又再跑返去上橋時，籃男突然出現，全力加速....S望住籃男既背影呆一呆，先明，佢原來係一直在橋底等S，要超越返S來報一箭之仇.....哈，都好矛姐，當時S已經跑左超過5公里，籃男就一直企在度休息.....但係，籃男既能量果然一下子用晒，又係衝果一下就慢落來.....

咁唔公平，S係好唔順氣的！在條奪命長斜照博命跑，博命追；在差ｄ追到籃男時，肥仔又聽到聲再次發力跑！！！！嗚，S結果都係追唔到，到自己既終點就立時乖乖地停低拉筋（唔係就又會抽筋），結束左依場無聊比賽。亦都因為籃男既搞局，S跑出練習之來最快既成績！

結果，咁樣出力跑之後，腳唔攰，反而手臂同肩膀攰到舉唔起手！

睇書有跑手話跑步係全身運動，而且好多時覺得攰其實唔係腳攰而係上身攰的，手攰所以影響到大腦覺得全身攰囉。

啊，明白。


（不過S仍然唔會去gym度做器械的！）