2007年7月12日 星期四

經驗

今日無意中睇左一份Resume,睇完真係有d唔舒服既感覺。

個申請者係之前間工司請人時,Apply我而家做緊既工。佢係我當年出來做野第一份工時既傳奇人物,我入到公司時佢己經走左,但係佢果條team人才軰出,個個都好快升上management,可以獨當一面,佢係一個絶對既姐級人馬。

之後佢回巢,有機會同佢合作,阿姐份人雖然嚴肅,但係同佢混熟左之後,佢真係會明白我份工既難處,好義氣仔女。有幾次真係比客打到變豬頭兼車到上天花板,分分鍾要賠天文數字既大鑊野,都係靠佢拔刀相助,咁先大步門檻過。

但係之後聽聞因為佢同上司不和,上年年底被辭退,睇佢既Resume,依家都仲未揾到工。佢既級數,又點會同我報同一份工呢?

佢無寫明自己既年齡,但係由佢HKCEE既年份計算,大概只係四十三歲。但係佢偏偏只話自己有"10 years management experience"。唔係掛,我剛畢業時佢已經做左大家姐好耐,又點只十年管理層經驗?佢咁樣寫,唔通係怕人地嫌佢老?

我一直覺得四十幾歲先係管理既黃金年華,一方面積累左好多人事管理既實經驗,無左後生仔果d衝動同情緒化,另一方面又正值壯年,精力充沛。依個唔係正正係大好年華咩?

莫非真係崇尚年青既文化已經深入各個領域,連經驗都唔能夠答救咩?

23 則留言:

野蠻郡主 提到...

hi,samsara,唔知你係做邊類型既公司,不過我知道有d報低d經驗同學歷既原因係太高,就恐怕對方唔請或者佢個人原因,我以前有個同事係物業管理同cs方面都好有經驗,又幫得手,又肯挨,其實好多同級既同事問佢點解見依個post,因為佢連我地阿頭既野都識做或者更了解,不過佢話想做返低層同埋佢冇學歷!

C.M. 提到...

香水妹妹:

呢條“經驗=負累”既路,恐怕我正準備跟住要行... 點算?

CK 提到...

唉,我覺得cm講得岩呀,經驗同負累,有時真係有個等號響中間。

我反而覺得,去到4字頭,除非搵既工係最top果一格既management,咁就OK,但係如果依然係middle management果一格呢,我做老細,我都情願請個後生d,白紙d既做。

中年,如果未上岸,查實真係幾得人驚。

Forever 提到...

= =咁得人驚, 攪到我心驚驚. 過多9年就4張野...好恐怖.

上岸真是可圈可點.....

學霖山莊 提到...

“經驗=負累", 無奈地認同...

PK_ 提到...

未必係單純年齡問題。

一般認為去到40幾,做管理既,應該已經有一個鞏固既career,就算轉工,都會有人脈介紹過檔。否則,40幾,有相當管理經驗,卻又要走番入大市場報名搵工,作為招聘者,一定會覺得呢個人梗有d野,所謂既經驗既質素,所反應既能力才華,一定有d問題。

> 聽聞因為佢同上司不和,上年年底被辭退

呢個就可能係問題,尤其如果佢咁既位置離開,resume 當中又無mention/submit好既references甚至recommendations,叫d招聘者點息疑!

老實講,中甚至上層管理人員,除左管理下屬要得之外,獲得上司信任授權,都係一項competence,有功積都唔夠,人際始終講關係,interpersonal skills,呢樣野唔等同要擦鞋,亦唔只限於中國人。。。可以從 how to manage ur bosses 咁既角度去諗。

最後,小弟都想你果位前呀姐搵倒工。。。小弟只係想嘗試分享同理解招聘者果邊既考慮係點。

PK_ 提到...

漏左句。。。

如果佢係轉行,咁仲弊,一來經驗大打折扣,二來,招聘者只會覺得40幾歲人來轉行,佢原來個career實唔慌做得ok得去邊。。。。

PK_ 提到...

sorry sorry,另外一個可能既factor,就係管理經驗一般唔會被視作好專業既經驗,因為唔夠實質,唔同工程,醫生,會計,所以就算招聘條件講到要幾多年幾多年,到考慮既時候又唔係想像中睇得咁重。睇有咩achievement仲緊要。

另外,你話呀姐份人嚴肅,咁真係唔知佢communications同presentation點,唔能夠排除 interview 表現,比人既觀感,會有影響。

seikomatic 提到...

At last, I know I am not alone.....what a relief!Ahimama!

Gideon 提到...

其實個社會一直都話緊俾我地知打工有好多問題。“經驗=負累”呢個問題越黎越嚴重,而且呢個問題會持續,會唔會係因為"You never learn the lesson".最理想當然係當一批人累積到某一程度經驗就做管理,甚至創業,製做更多既就業機會俾啲後生冇經驗個批人。若倒轉頭同人爭經驗較少同人工低既工,對個社會本身都係一個壞影響。所以當香港既經濟轉型既同時 entrepreneurship 係扮演一個非常之重要既角色,可惜香港人仲未能深入認識呢個課題。若果政府能帶頭多啲鼓勵同資助/幫助,又或者市場能放寬對創業既投資,相信對社會一定會有正面既影響。

ak 提到...

Samsara姐姐,

經驗=負累...AK咁睇...

其實,依家負責請人既,一般1st Interview,唔會係大老闆,而係中層...佢地通常係果d「經驗豐富」,係果間公司入面上左位,諗住一世都唔走既老臣子...依一班人,用老毛既說話就係「佔著矛坑不XX」既「老XX」...咁佢見到你帶住十幾年經驗入黎做佢下線,佢唔驚你一朝企穩之後出手「隊」死佢咩(正所謂「虎無傷人意,人有殺虎心」)...

所以,如果去到咁上下時間,唔係自己出黎創業,又唔能夠上位,晉升「老XX」既行列,係「矛坑」到霸唔到個位...都幾麻煩架...

數怪 提到...

響呢d情況下,去政府或者一d「大行(音『巷』)」碰下運氣,睇下有無senior management(即係起碼管三幾百人)既空缺好過,呢d公司有既定程序,經驗=負累既可能性會較少.

Samsara 提到...

郡主妹妹: 講得好,阿姐報依份工係over左,我都唔會請over既人,驚留唔住佢。

CM哥哥: 我真係無諗過有朝一日經驗會等於負累。我做錯好多事,其實都係因為我經驗唔夠,唔係反應慢左就係反應過激,亦唔知道問題既嚴重性,所以無及早預防。

我真係要諗一諗。

CK老闆: 中層要白紙係咪因為佢地比較容易融入新公司呢?

永恆哥哥: 我諗上岸係指財務自由。之前數怪哥哥幫我計左條數出來,令我完全明白我一定要繼續返工...又或者真係乖乖地學投資。

學霖哥哥:Humm,我唔係好肯定呀,際遇亦都係好重要既。

PK_哥哥:
中呀,阿姐既性情真係好tough,有時可能太tough。

其實阿姐既老闆同我幾熟既,之前都有同佢傾過依件事,具體辭退佢既原因無謂講啦,但係阿姐如果肯認衰,都唔係一定會搞成咁既。

我依d做細既,就話會同阿姐慢慢溝通姐,佢老闆係一個好能幹好忙又幾大佬既人,如果下屬交唔到貨又唔得佢歡心,真係好危。

我就未見過阿姐做Presentation,不過佢平時真係有d不修邊幅,但係佢Interview時點都會執執掛。

又,管理經驗究竟係d乜野?Leadership又係乜呢?依d野好難quantify,但係又真係有好大既影響,我讀工管兼工作咁多年,其實都唔係好答到。

大師:能Sir真係極品呀,究竟係邊個星球來嫁佢?

丫,又有一排無講:大師,我好鍾意你呀。

Gidoen: 我前兩日先同人傾過,比如我咁樣性情既人,真係打一世工,唔會自己創業。我覺得只有某一種性格既人先可以創業。我呢就只可以做d技術官僚,唔知係咪左住個地球轉。

>>會唔會係因為"You never learn the lesson"?
依個真係大忌,有人做左十年野,但係並無十年既經驗,只係重複第一年學到既經驗十次...

AK哥哥:
比老臣子block左都有可能呀,不過除了芝士,有時候連屎x都會郁既。

我一個ex老闆就係一個血淋淋既例子,佢在公司又有地位又高人工,公司又賺錢,年年Sales同profit都創新高,咁佢應該好穏陣好惦啦掛?點知就係因為生意太好,owner用天價賣左間公司比一間美國MNC,依位老闆雖然好努力但係仍然融入唔到新環境同文化,兩年後被炒。

數怪哥哥:連我依份工都報,阿姐應該都已經幾勤力揾工啦。真係好希望佢快快揾到工,阿姐真係好做得野嫁。

學霖山莊 提到...

AK 講出了我心聲...

七十樓危危下望 提到...

嘿嘿嘿明天呢

C.M. 提到...

香水妹妹:

... 去舞會唔應該諗公事既,係咪?

C.M. 提到...

(CK兄,你就好啦,上曬岸...)

Yun 提到...

Samsara 姐姐﹐我好慢呀﹐想講既都俾人講晒喇。咁我來同你問個好吧。:)

不怕不怕﹐四十歲後的事﹐四十歲後再想吧。

嘻嘻!

洛克 提到...

如果只是希望利用經驗換取地位,咁經驗絕對係負累。

如果自己能活用經驗,即使在什麼時世及地方都可以有生存空間。

40+歲事業出問題,經常都係自身出問題多於年紀問題。

一個真正人材與庸材的分別,只在於前者懂得創造際遇,後者只懂等際遇,即等運到。

成為被需要的人比起做有經驗的人更有前途。

Samsara 提到...

學霖哥哥:你係講『去到咁上下時間,唔係自己出黎創業,又唔能夠上位,晉升「老XX」既行列,係「矛坑」到霸唔到個位...都幾麻煩架...』?

Humm,矛坑都會郁,一樣有老闆既生意做唔住,要增強自己既實力先得既,依樣野無人攞得走。

七十:你,你,嘿...

CM哥哥:都係天南地北,乜都講啦,咁依排工作係佔我比較多思考空間嘛。

小雲:我對太過長遠又控制唔到既事,真係無計劃既;因為你點plan都好,實際發生既事都係出乎意料之外,正所謂人算不如天算嘛。

我無野喎,只不過希望阿姐快快揾到工。

洛克老闆:嘩,好強既正能量。

我以前有個老闆都係咁講,佢話唔鍾意做IT而鍾意做Sales,因為IT控制唔到自己既命運,會同自己個System共存亡,但係Sales就可以。

不過依番話由佢講就唔多有說服力,因為佢只係在一間公司做得好,一比人炒,就沈到家陣。佢唔係真正既強者掛我諗。

C.M. 提到...

洛老闆:警句警句。

sf 提到...

samsara,

看留言有點感想, 在泊裡寫了幾句, 故來打個招呼.

sf

馬老板 提到...

我以前都唔會請太有經驗同成熟的同事, 驚自己head唔到佢. 不過, 現在知道每一個岡位都有佢的重要性, 唔好因為年齡而看低他人