2008年2月17日 星期日

渣打馬拉松

今年第四年跑lu,十公里姐,時限係兩小時。

人類平均步行速度係一小時五公里...既係話,只要急急腳行已經可以在兩小時內完成十公里,其實各位當係行兩個鍾頭街未得囉,我成日都諗其實我地行一個下午街,已經行左十幾廿公里啦。全場有大量醫療輔助隊同物理治療師,封晒路又有大班義工同警察維持秩序,其實比起穿斗零踭過馬路仲安全啦!

今次改左跑東區走廊,真係好過西隧好多。上斜落斜少左,路闊左,仲要成條路封晒,唔駛食塵,仲要唔駛入焗到頭都暈既西隧,好正呀!

今次大會仲嚴格左,一定要有號碼布先可以跑,無左d唔知做乜係度陪跑既人。我仲係跑5:40第二場,咁早,大家都係來跑既,都係到好後先見到有人太攰會行囉,唔多人影相,跑步氣氛好好!

雖然條跑易跑左,但係我既時間都係差唔多喎...嗚...依個世界都係一分耕耘,一分收穫既,我依排都無乜點練,好難有乜突破。不過仔細d諗,又唔係話一d進步都無囉,我第一年跑完時係十分虛脫既,血糖低,頭暈暈,要食條香蕉先好d。今年呢,一直都唔會話太辛苦,而且到終點時仲有力衝幾步;耐力好左,下年要加強速度。

不如,下年大家都試下跑啦,好開心嫁!

又,第一次跑都係十公里開始啦,十公里唔駛點練都可以完成,但係半馬(21公里)同全馬(42公里)就真係要有充足準備同有系統訓練先至安全。

P.S.,我跑完攞返野時,聽到有個女仔話一路跑都好涷,心諗唔係掛,我跑幾步已經全身開始出汗喎,跑完勁熱,條街人人都著羽絨時,我就T裇短褲都唔涷,幾咁自豪呀。同個女仔四目交投,呆一呆先可以彼此相認...原來係出名怕涷既三點!嘿,大家都紮辮再加面紅如爆血管,真係幾難認既又。成五萬人之中都撞到,可見有緣啦掛,遲d等我返來一定要約埋阿生野一齊出吓來啦!

7 則留言:

ah-yun 提到...

哈哈﹐你地個相認好好笑呀。^^

學 霖 山 莊 提到...

我都係跑呢段時間呀...
第一次跑...
無睇鐘唔知時間呀...

不過, 真係太多"遊客"啦...

火鶴 提到...

呀三點係咪著住件羽絨跑呀?

Samsara 提到...

小雲:係個世界真係細,我既blog友仲有我既舊同學添。

學霖哥哥:你都有跑呀,下次去早d既場就會多d人真係跑嫁啦。

大俠:三點只係著夾綿...可見跑步幾有用呢。

Juicy Runners 提到...

早知就報早一場...
6:10個場已經...幾惡跑了!

同埋人多易碰撞, 分別見到一位大哥撞親飛身落地, 同一位小妹妹跌到流鼻血... 希望佢地冇大礙啦!

Samsara 提到...

On Dog哥哥:其實我係報最早既五點三既,不過陪埋個friend一齊跑五點十咋...原來連東廊都唔夠位呀?下次寧願再早少少起身跑得舒服d...學我個friend話齋,都係一年一次咁早起身姐,都可以接受。

Carole 提到...

wa 你咁都見到三點
嗰日我都一早出發去機場(5時嗰隻)
青馬水站已經有人
我年年都想跑
但係我唔會起到身