雜談

嗯，第樣就話唔識寫姐，拉拉雜雜我平時都已經係咁。


************************************************************


生肖書話我鼠年驛馬星動．．．錯！係驛馬星暴動就真。


我由落雪既上海返到得十度八度既香港，再去到廿幾三十度既墨爾本，再返來跑埋十公里，終於病倒了。唉，最怕係出trip之前病，好有叫天不應叫地不聞既感覺。今晚仲要係團拜，難得咁齊人，好掙扎去唔去好，點解次次我都係ｄ咁既時間病？


************************************************************

CM哥哥指返一篇上年既文，叫做包拗頸的春天。依篇文即時勾起我上年依段時候既回憶喎。已經連續幾年，我都係在春天病一鑊甘既兼且工作遇上完全不能抗拒既逆境．．．一次半次就話巧合姐，但係，等我諗吓．．．已經連續三年啦，出現Pattern。


咁我都忍唔住會諗何解年年冬天都係好地地，但係一到春天就會忽然之間四分五裂呢？而且，如果我一直都驚會出事，咁我既期望就會變為事實。今次我又可唔可以突破宿命呢又？


實情我唔多信命既，我覺得人生好似行山咁，你既起點同面前既路線係一早就定好，係，依樣係無得揀；但係，條條路都會有一ｄ分义，選擇行邊一條路，係自己有意識加無意識既決定。仲有一ｄ少數既勇者，可以堅韌地行前人未行之路，開山劈石，走出自己既路。


有人話，人一過三十歲，就要對自己個樣負責，我諗，唔止個樣囉。


無人係受害者，就算天生有什麼不公，小時候有什麼童年陰影，工作上有什麼不幸，愛情上點樣比人欺騙，友情上點樣比人出賣，都應該自己一步步走出來。

我知，講就易，但係抱怨逃避就更加唔係解決辦法。


************************************************************

港女丁丁，已經派駐在上海足足一年，適應良好。佢話，佢成年之中既Best Buy係～～～電氈。


當丁丁做到十點幾返屋企，第一樣野就係開暖氣，跟住就係開電氈;；天寒地湅之際，入去暖笠笠既被竇．．．丁丁話：「好幸福！」．．．仲有句更勁既係：「好過男人．．．」


加上丁丁有四個學位、係網球嬌娃、竟然真係可以一個禮拜睇一本書．．．仲有一個更加fatal既係佢個廚房係裝飾，成年都未用過，佢飲蒸餾水，連水都唔煲．．．

好明顯，丁丁比雷劈中既機會大過佢嫁得出。


************************************************************


記唔記得李榮峰？無錯，就係果個恐嚇自己前女友，仲將女友裸照及兩人交歡片段上載互聯網既毒男，個超低能勁白痴既法官黃崇厚唔知要邊隻天眼見到李榮峰有悔意，竟然唔駛佢坐監！！！

依單野已經係上年九月既事，黃仁龍忽然諗起原來佢ｄ靚之前判錯案，應該要李榮峰坐監，咁就當然係因為淫照事件完全挑戰警權，而且立下歪風，男人如黃仁龍都開始覺得唔妥，要加判返李榮峰。

李榮峰要坐監係一定無冤枉佢。

又，所謂既奇拿以為自己伸張正義，揭穿偽人真面目？收皮啦你（地）！

你（地）只係膽小如鼠既賊仔，偷左野之後周圍派賊贓。黃Sir雖然豬，但係難保佢傻人有傻福，有朝一日捉到你班鼠輩。BTW，你地ｄ甜相我一張都無睇，鍾意甜野係個人喜好我無意見，不過睇不法途徑攞到係相對我來講等同接賊贓，所以拒絕。不過全香港既人都已經覺得好悶啦，我都係見無人再寫先會提下你（地）。

睇你地唔起！

************************************************************

明報報導

男子發布前女友裸照律政司申請加刑判囚 2008年2月19日

【明報專訊】去年情人節發布前女友裸照及性交影片的29歲男子，原本被李榮峰社會服務令240小時，在服務令幾近完成之際，律政司昨日申請加刑，指男子為求報復，在網上發布照片及公開事主身分，發布一次足以在社會引起難以估計的迴響，要求法庭重判男子即時入獄，以阻嚇同類案件。

社會服務令已完成七成 控方代表陳辭時表示，被告李榮峰(29歲)主動發布女方裸照及二人性交片段，再在討論區內列明女方中英文姓名、工作地區，甚至每星期往某大廈看醫生等個人資料。控方又引述被告在討論區對話紀錄，指網友曾勸阻但不果，被告反稱「她先對我不忠，我自然對她不義」，又自稱是「有仇必報的傻人」，犯案明顯是清晰的報復行動，情節嚴重，理應加刑。
官指挑戰社會道德 應上調量刑 控方又援引3個發布淫褻物品罪行的案例，指向公眾展示明目張膽的性愛行為，是挑戰社會的道德規範，量刑起點應為入獄9至12個月，上訴庭案例更闡明，利用互聯網或雜誌發布淫照以擴大目標受眾，量刑更應上調。

同類案件亦多番指出，互聯網的受眾極廣大，包括小童及心智不穩定的人，影響超越國界，必須受到阻嚇。

辯方大律師則反駁，控方列舉案例涉及的淫褻程度與本案不同，被告亦於去年9月判決後完成近七成、即160小時義工服務，事件始於被告「因愛成恨」的激動作為，若判處監禁對被告不公。裁判官黃崇厚最終表示，需索閱被告社會服務報告以考慮判刑，押後至下月3日宣判。

任職金舖售貨員的被告，去年9月在荃灣裁判法院承認刑事恐嚇、發布不雅物品及發布淫褻物品等3項罪名，案情指他於去年2月14日要求與前度女友復合不果，當晚及隨後兩天分別將對方6張裸照及8段二人性交片段，上載至兩個網站，再被轉載至第3個網站。
【案件編號﹕TWCC1410/07】

************************************************************

寫blog首要條件係自己寫得開心，如果變左責任負擔就唔好玩lu，始終身體要緊，老編既工作真係唔係人人做到。

我都係提早收爐，乖乖地休息，希望快快好反。

祝各位聽日元宵節猜多ｄ燈謎，食多ｄ湯丸！遲ｄ見。