2008年4月24日 星期四

窮人的銀行家(五)點解只借錢比女人?

Grameen最先借款時係主要借比男人既,在孟加拉依個超級重男輕女既保守回教國家,男人係一家之主,手執財政大權,借比男人係好正常既決定;但Dr Yunus好快發現應該借比女人先岩。

依個真係超級反傳統,在孟加拉,莫講話窮女人,就算有錢女人都好難借到錢,銀行會要求女人帶埋佢老公來一齊借錢,佢地根本唔相信女人有獨立理財能力。Dr Yunus決定要借錢比女人,唔單止為左兩性平等咁簡單,佢發現借錢比女人對社會影響更大更快。

在孟加拉,女人承受既窮困同饑餓比男人大得多。母親係在在一家人食完飯之後先可以食既,如果有人要挨餓,一定係母親挨。男人仲隨時可以休妻,只要連續講三次:「我要休妳、我要休妳、我要休妳」就搞惦,連寫休書同羅列七出之罪都唔駛,方便過中國男人好多,女人被拋棄後,只能自生自滅。因為萬惡既Dowry比得唔夠,令到丈夫不悅而被虐待至死既女人不知凡幾,亦無人覺得有乜問題,警察亦唔會理。女人承受既痛苦,亦都可以在孟加拉人平均壽命既統計數字中睇出,孟加拉女人既平均壽命係短過男人既,女人明明天生就長命過男人,男人長命過女人依個情況在全世界都絕無謹有,孟加拉女人生活之困苦可見一班。

因為受苦太深,孟加拉女人要爬出窮困深淵既決心,比男人大得多。而當有任何機會時,女人既表現,比男人大為優勝。女人有強烈既動力要建立安全感---財政安全感。

另一方面,當借完錢做既小手工買賣揾到錢後,男人傾向將d錢駛到自己身上,Dr Yunus稱之為"Enjoy himself",即係嫖賭飲吹既上下;但當女人揾到錢時,佢地會立即將錢用在孩子身上,改善下一代既飲食健康教育。要脫貧,就係要切斷隔代貧窮,既然借錢比女人有咁多好處,仲點解要借錢比男人?所以Dr Yunus決定Grmeen只借錢比女人,到左依家,Grameen既借款人都仲係97%女人,在孟加拉依個地方真係非常唔容易做到......請拍手!




(待續)

4 則留言:

匿名 提到...

>>>「我要休妳、我要休妳、我要休妳」就搞惦,連寫休書同羅列七出之罪都唔駛,方便過中國男人好多,女人被拋棄後,只能自生自滅。


香港情況不適用!!!

C.M. 提到...

終於見到雞髀、雞翼、雞胸...分開曬。

拍手!

余若虛 提到...

samsara:
多謝你既詳細闡釋!

好難得有Dr.Yunus呢類學以致用既學者,唔係講就天下無敵做就有心無力之輩。佢同好多中國當年留美既科學家一樣不計酬勞返黎為國服務,非常偉大!

不過,孟加拉人既民族性真係有啲問題囉。若虛個人都認為每個民族其實有其優劣點,正如中國人愛內鬨,印尼人愛偷懶(又政治不正確啦),不過孟加拉人真係...

Samsara 提到...

匿名君:依家就大陸都唔適用,又,留言可唔可以都是但作個藝名呢?

CM哥哥:好手勢呀呢!分屍我好快手嫁。

余弟弟:民族性依個嘛,我既感覺係好分裂既,當年我去孟加拉時,遇到既人都好好,雖然言語不通,都一樣我好奇我地班「老外」在度做乜,仲有人買花環送比我添。

但係到出來做野,遇到係孟加拉客,真係橫蠻過蟹...而且Dr Yunus話孟加拉其他只借錢比有錢人既銀行既還款率,只得20-30%,好多時都要政府填,而只借錢比窮人既Grameen Bank呢,還款率就有94-98%。

可能學似Dr Yunus話齋,窮人先至最有信譽!


請對號入座:窮人=/=罪犯,如果唔係見你心情唔好,一定鬧鬼你!