2008年4月25日 星期五

貧窮

貧窮係未真係離我地咁遠,一定要好似劉喜玲咁,去貧民窟度訪問小朋友先揾到?

其實,貧窮真係就在你身邊,只差到你有冇心去留意。

我上年剛去依家間公司時,同老闆攞到d錢去做Team Builing,同妹妹一齊去海洋公園。爛Gag女皇超緊張,不停地問要準備乜野。去到時,佢唔知道海洋公園分上下兩層,唔知道海洋公園曾經有集古村、水上樂園,未聽過海威...佢唔係從來未去過海洋公園,就係上次去時好細個,唔記得晒。

爛Gag女皇係土生土長香港人,只有二十歲。

唔心痛就係叻你既,我知未去過海洋公園、廿幾歲先第一次搭飛機無乜大不了,我地既年代大把人係咁啦;但係社會一直富裕進步呀聽講,我點可以要求一個生於八十年代未既女孩子過我依d老鬼既童年生活呢,做乜貧富懸殊得咁緊要。


阿Eason問,你見到阿婆推住一車既紙皮在街上行時,有冇問候下佢?

問候?我之前在上環依個舊區返工時,經常見到婆仔執紙皮,有一次食lunch後,在唐樓既樓梯口見到有個婆仔放左一大堆紙皮在車仔,好努力地拖上樓,我終於鼓起勇氣,幫阿婆在樓梯下面託住車仔,結果婆仔正在發力時突然車仔輕左,差d失去平均,見到我依個不速之客,係好惡地鬧左我一餐。

個問題唔係問唔問候呀嘛,就算要幫,都要用岩辦法,如果唔係,只係嚇親阿婆兼激嬲佢,只會好心做壞事。


好多時候,現實係令人難受既;特別係赤裸裸既現實,特別係當你將佢地既生活同自己比較時。
面對d咁雖以忍受既現實時,只可以化為怒火。

點解你唔讀書?我細個時都窮,依家讀到書揾到野做,未有錢囉,我得你做乜唔得?

點解你後生揾到時唔蓄錢,依家搞到臨老唔過得世?

香港有綜援嫁喎,你自己衰好啦,做乜搞到d細路要跟你一齊捱?咁叫有骨氣咩?係On居咋!


我明,真係令人好無力難過,但卻始終係現實;而且,要知道香港人已經係衰極都仲有個譜;在世界仲有好多人係要挨餓,無乾淨水飲,無厕所用...

我地可以選擇唔聽唔睇唔理,又或者嘗試睇下自己可以做到d乜,唔一定有d乜野成效,而且九成九只會加深自己既無力感添。無乜野道德高地值價判斷,只係個人既選擇。

又諗起依個我當年開blog第一個post上面擺既依條Thread,難得時不時有人推下佢,仲未沈。

25 則留言:

C.M. 提到...

香妹,你真係好有社會觸角。

好多好多年前係灣仔有個肥中年,推住架木頭車三更半夜賣香蕉。(唔知賣比邊個)我果時試下走去同佢傾計。點知比佢話我運吉。

自此我都唔敢懶係話想同人傾計交朋友。

另外有陸叔。兩年前我部手機突然壞左之後就再無聯絡。我同佢足足交往左5、6年。唔知依家點,今日先同阿Moon提起佢。

佢比我最大既體會係,無論邊個都好,係咪邊緣貧困戶都好,其實佢地同我地都好似,有d人對其他人有好大戒心,又有d好似阿陸叔咁幾廿歲都可以隨街同人social。

不過更感受到,其實好多人對於工作(尤其有綜緩支持的人),佢地唔係只想搵多個錢幫補,而係真係想同世界接觸。工作比呢批人個意義,同果d有成竇仔女養既好唔同。呢批(即我更希望了解既一批),視工作為肯定自己存在(嘩!)及維持與人溝通既“唯一”渠道。我覺得,佢地對於所謂“貧窮”,根本唔係一道障礙。雖然佢地(例如好似陸叔咁)都需要錢,不過,多真係有多洗,少有少洗。好少怨。佢地若知道有人關懷,就好足夠。

而果d要養仔女既,錢,無可厚非,當然大過天。無辦法。但有時實在過分睇重“錢”對於“子女”既價值。唉,唔知講乜。

Goodnight.

seikomatic 提到...

師妹,

每次俺見到搵明星去做呢庭節目,都覺得好唔舒服,因為呢班富貴系咪代表緊咱們,去可憐果班社會上被遺忘既?sawlee,第一,俺同呢班富貴絕無認同感,再者,見到志雲話個鼻哥濃同咀角含春樣,俺都會形住鏡頭下面班友又話今晚落邊間 club威,聽日訂邊款袋...

有錢無罪,虛偽就難頂。雖然大哥話我出席已經可以號召千萬善長,但如果佢自已一蚊都唔捐,慳d啦大哥。

25分鐘節目,佢地班友出左20分鐘鏡.....啊為左睇醫神所以年青觀眾會睇,啊劉渣玲系為左、吸引中年既觀眾...

dog o 提到...

(通紅的雙眼...唔係因為睇左個節目, 而係到了差不多凌晨5點, 係BULK PRINT最難搞既時候...)

看了好幾個關於呢個節目既POST, 都冇咩好的評語... 小9對於這節目, 亦都看不舒服, 但可作為一個NOTICE, 一個ALERT, 讓小9在溫飽的生活中, 記起未有溫飽的人, 從而多克慾郵險, 多為善捐獻...

我想, 這節目, 還是有點意思...

(Zzzzzzz......)

Wong C 提到...

"但係社會一直富裕進步呀聽講,我點可以要求一個生於八十年代未既女孩子過我依d老鬼既童年生活呢"

我覺得,有時就是這樣的想法給于貧窮的人更大的壓力.

Gideon 提到...

爛 Gag 女皇係咪你自己黎架?哈哈。只係細細個去過海洋公園,而家唔記得既人,呢度就有一個。不過好似到而家自己俾得起錢,都冇乜興趣去海洋公園啫。因為咁所以我都成日同自己講,將來第日發左達,可能我既生活都係差唔多,都係日抖俾客卒夜晚同啲 friend 食下飯飲杯野,頂多飲完野之後行三條街去攞返部法拉利返屋企。

我細個時屋企冇乜錢,但係我一直唔覺得自己窮架喎。我諗係因為父母冇掛個窮字喺口邊﹗奇怪既係,由細到大對於我冇既野,我就會接受冇咪冇囉,係咁架啦,直頭唔會要求。(咦?唔通我又係一百萬人的故事其中一個細路?)我讀 compu. engg 都係入左 U 問政府借錢先到有自己第一部電腦咋喎。但係分開講,最緊要對自己有要求,對物質冇要求絕對係好事﹗


不過對自己窮最深刻個次,係自己俾錢買餸煮埋飯俾兩個細佬飯個段時間。畢左業成年,仲只係要靠親戚有份 reception 做。個時放工後要買餸埋飯,亦習慣煮多少少第二日 pack lunch 。有一日,可能係我煮少左,或者我細佬太肚餓,竟然食晒啲野,我冇得 pack lunch﹗跟住我火都黎鬧到我細佬唔係人咁﹗我係咪好變態??哈哈,我都唔相信自己可以為左一餐 lunch 發窮惡,而呢件事,唔係細個時,而只不過係 4 四年前既事。

Samsara 提到...

CM哥哥:最低工資呢,你都知我係旗幟鮮明地贊成既,收到你講話如果隨便僱主鍾意比幾多就比幾多,係會增加就業機會...我唔信囉講真,依個講法係假設個餅只有咁大,無得加,但係依個諗法太無想像力啦,當你比到一個員工有辦法活命既工資佢時,個motivation係好大既。

而且,你估點解梁掁英會跳出來高呼呀?佢就只係傀儡一個,北大人既logic可以由澳門睇出,社會不公係會引致社會動盪既;依個亦都係早年資本主義點解要引入社會保障既原因。

不患貧,患不均。

Samsara 提到...

大師:Well,無記d野,都無乜期望。揾d明星做訪問,真係更加無期望...但係劉渣玲既表現,我又覺得唔算差,一個月得十蚊零用錢,我都嚇親,渣玲個反應都唔算太過火...佢訪問果個細路好似係唔想出鏡喎。

>>咀角含春樣
哈哈,講得好呀大師,我成日都唔知應該點形容陳志雲個樣呀。

依個節目係有政治目的既。

Samsara 提到...

On Dog哥哥:我寫依一篇時,只睇左第一集,依家睇晒之後,覺得都還好,起碼帶出一d我唔知既野,比如,香港仲有天光墟,有人買垃圾,小朋友上到中學要有電腦,etc。

我有個朋友,都話睇左之後有d領悟,人其實係可以好簡單地生活既,佢諗住買個箍肚臍袋都hold住...

Samsara 提到...

Wong c....WC?....講笑講笑,又岩,搞到窮好似係一件唔應該發生,又好難以啟齒既事咁,有人話,依個係精英主意既問題。

如果在古代,每個人都只係可以繼承父親既職業,我阿爸如果係耕田,咁我咪只有耕田;我阿爸係打鐵,咁我只有打鐵。壞既方面係無選擇,好既方面係你亦唔需要為自己天生既職業傷腦筋,所以大部份人都樂天知命,隨遇而安。

但係依家係精英既世界,如果你讀書夠叻既話,你可以一直攞船,屋企無論幾窮你一樣可以出人頭地;你再叻d既話,可以好似Bill Gate同Steve Jobs咁,書都唔讀做IT首富。

結果係,依個世界上,永遠都有大班人叻過你,永遠都有機會,問題係,你得唔得...結果係,同人比較之下,絶大部份人都充滿挫敗感...人人都覺得自己窮,可能李+X都唔覺自己有錢。

Samsara 提到...

大鐵鎚:嗯,我呢,一係唔寫,要寫就會講到明。我細個時去過好多次海洋公園,鍾意海威,未試過開唔到飯,亦都唔覺阿媽唔夠錢買餸,好似連小學時都有幾蚊零用錢,我年紀大,幾蚊已經買到好多野食,阿媽仲肯買Melody間尺比我,雖然無買當年最潮既會彈d文具出來既筆盒比我...不過呢,我細個一直覺得自己好窮。

依家睇返,我父母唔係窮,而係鏗,同埋太過珍惜物件,上一代人好多係咁,佢地到依家都係樣樣都唔捨得,我要瞞住價錢其至自動加個五折先得。

你睇,窮其實唔係一個absolute value,而係相對既,我依家對窮既定義係,你有冇足夠金錢令自己無顧慮地過自己想要既生活,個重點係:「自己想要既生活」。

有人買完細樓要大樓,跟住要搬去xx豪宅,跟住要住西半山獨立屋...慾望無窮,咁依個人一世都捱「窮」,因為佢一直都afford唔到自己想要既生活。

有時,又唔好賴晒錢...有人sun如果有錢請工人,兩公婆就唔駛因為家務而吵架,但係,個問題真係有冇工人咩?

匿名 提到...

SAM:

我無看過呢個節目,不評。

愚老人(記性不好)記得以前BEYOND去為某慈善團體拍了一個某貧窮地方的片集回港,當時有人都認為佢地想宣傳自己。我亦記得曾有記者問慈善團體為何用明星去推廣其活動,不怕被用作明星的宣傳嗎?對方答,只要能噢起人們對他們的慈善活動的一份關注也是值得的。

簡單地說:街市的蘋果與果籃的蘋果,營養有別嗎?意思有別嗎?對你不,但對別人是否一樣呢?[古人甲說:你不是魚,怎能知道魚是否快樂呢?古人乙答:你不是我,你又知道我能否知道魚是否快樂?(你可當詭辯。)]

雖然,有好多人都有刻苦的經歷,不是所有人都會因而成為成功人仕,但能活過來的我想也應為他們的努力而鼓掌。

人海中浮沈的
麥太

C.M. 提到...

咦?乜我有提到最低工資咩?(係阿鎚果度就有)。不過既然你又講到,我又搭下嘴。

其實我都同意個餅未必係得咁大,但咁又點?始終有部分人會失去工作。

比個簡單計算你:

(a) 如果最低工資set到10K,咁會有“邊類”人會被踢出黎?(唔好講幾多人,就假設就業人數一樣,個餅可以無限大增加)

(b) 好勒,慢慢降低最低工資到6K,咁又會有“邊類”人仍然排除在外?

其實一路都係只有最低技術、最低學歷、最低經驗果批人。(先諗清楚先答我,如果你得閑)

最低工資 set得高,就好似(a);set得低到 (b),就唔夠活命。個問題根本唔o係工資果度,而係o係支出果度。高租金先至最攞命。

我估,最低工資生效,麥當勞就永遠見唔到我個朋友個細佬(佢有輕微智力障礙)果種人。我亦唔會見到好似渣估呢種老闆。

係,佢地真係被逼要攞綜援,呢個唔係壞事,如果我係政府我都會願意比。就剛剛呢個情況,我唔反對最低工資。所有人都有得益,除左納稅人(以經濟層面係損失,但以社會層面“可能”係得益)。反正,我養得起。

但,我唔同意推行最低工資,其實同阿鎚,甚至阿鶴今次講既呢套節目既原因差唔多(咁並唔代表佢地兩個支持/反對最低工資,只係我個人睇法)。

拿,重覆,要諗清楚(係,我好認真,因為我唔係講最低工資既利與弊,而係講“心態”)。

我認為阿鶴講既窮人=罪惡,“大概/可能”係源於果d 自訂為窮人,將自己標簽為一定會諗住“我係窮,所以就可以...” 呢種咁既思考模式,然後大條道理要求人施以援手,或大條道理以貧窮來掩飾自己既不思進取。

我批評最低工資既原因,係源於其“阻止”其他人,包括欠缺經驗、能力、技術既人,去投入正當職業,同其他人一齊工作,從而享受作為一個對社會有貢獻的人。

係,依家已經有好多人趁天光墟,但最低工資推行後,呢類人可能仲多。佢地需要尋求一個證實自己價值既地方。係,我好主觀。(又請你諗清楚我係咪真係咁主觀)但你睇番果幾個被訪問個案,竟然有個攞緊綜援既人話份綜援唔夠洗,要瞓街。講真,我真係唔信:既然唔洗交租,份綜援“一定”夠開飯!

我唔係講佢講話唔夠“用”,我就嬲。我無嬲。因為佢咁講完全係人之常情。我想講係,佢根本“需要”呢個天光墟去證明自己個價值(無錯,又係主觀認定,如果唔係,你話係咩原因要佢有足夠綜援,但又出黎天光墟?)

我好明白“不均”呢個情況,或者~ 會導致社會動蕩。而我亦希望公司以一個合適不“剝削”既工資比佢地既員工。

我同意最低工資,因為整體,因為生活質素提升(最低工資可以帶來部分人生活質素的改善,但生活質素的改善,主要因為綜援領取的人數增多)。

但我亦唔同意最低工資,因為個人,因為削弱肯定自我價值的機會。

由始至終,我都唔係想講最低工資,我只係想講,社會始終會趨向一個“寧縱無枉”既態度去達至社會和諧,呢個無法避免。不過到時又多左人眼紅有人有手有腳30歲人唔做野既情況,又有更多人攞緊綜援但又趁墟(同時仲有明星趁墟),小弟見怪不怪,亦唔覺得濫情,不過覺得... 算。

C.M. 提到...

不過點都好,正如麥太講:

應為他們的努力而鼓掌

呢套節目,亦比我睇到呢點。總算有安慰。

seikomatic 提到...

師妹,

俺個 fan 有個靚妹親戚,家境一般以下。個靚妹讀(高)小學,每日都帶飯同屋企食埋早餐先番學,一日開口問個 fan 可唔可以比零用錢佢,因為個 fan 同個靚女好親,所以唔覺得奇怪。但系俺問佢想要幾錢,個 fan 話四蚊,俺第一個反應系一日四蚊都唔算多,兩個波羅飽都買唔到。但原來系【一個月四蚊】。o下?跌左個下爬!

俺又小人之心同個 fan 講要 check 下靚妹有無問晒全家人每人四蚊。

最後個 fan 話比左張十蚊個靚妹,過左成個星期都無駛過。

咁呢個故事又教訓咱們乜野啦?

俺到中學都帶飯,而最想食就系小賣部既光蘇餅。無錯,到中學都系帶飯同光蘇餅。

C.M. 提到...

精工:

比我搭嘴。希望我好正面咁睇呢個“教訓”

教訓1 - 人地小妹妹睇到四蚊,可能我地呢批要睇到四百,甚至四千先至覺得係零用錢。

呢個係教訓我地太現實,太自以為是。以為四百先係錢。

教訓2 - 四蚊已經“滿足”到呢個妹妹呢一刻,但我地呢?

教訓3 - 或者呢四蚊根本唔足夠,但我地竟然察覺唔到佢地既真正需要。咁佢地真正需要係咩呢?係咪錢呢?定係點樣用錢呢?

教訓4 - 我依家一份糧養三口,遲d四口,又唔係職位高人工好,究竟我應該點搞呢?應該用一套咩觀念去應付呢個情況呢?我應唔應該搵人幫手好呢?

(唔係燥底,係熱氣遮)

Morca 提到...

好似變咗 c.m. 個地頭...

C.M. 提到...

嘿,如果你唔係女仔呢~~

...我就肯定打爆你個頭!

seikomatic 提到...

CM,

其實俺覺得而家都系個比較既問題,無論你貧定富,老定嫩,就系同身邊既比較。

當全民皆貧既時侯,均,無愧無悔。師妹所謂。

靚妹仔既事就系講呢個道理,因為佢身邊既同佢既身家都系 par。幾蚊就可以滿足。

之前睇過全世界開心指數最高既國家系丹麥,惦解?因為期望低。小小野都系驚喜,其實都系因為堅彌低既原因。

俺雖然每日都系度掙札同人比較:你有四名俺就乜都無?俺有輕鬆多左寂寞,你有負擔多左喜樂~~~

除左緣,都系一種選擇既。

C.M. 提到...

>>俺雖然每日都系度掙札同人比較

若人會好似你咁識得諗,同人比較之後仍然見到自己“值得安樂”既一面,真係好。願如此。

多謝賜言。

匿名 提到...

梁文道講關於“老人與購物”

http://blog.sina.com.cn/s/blog_4c37827601008zun.html

...「因為,退貨是他們的樂趣。他們不是因為想買這個貨品,而是想在這個消費與物質流動的社會中重新獲得參與感,不想因為年老而被消費社會所排除。這種錢—貨—錢的“退貨迴圈”不會多花老人一分錢,但卻需要時間,但也因為如此,他們又重新獲得社會參與感。換句話說,他們也想積極參與經濟生活,增加社會接觸」。

C.M. 提到...

(剛才乃我來的)

Samsara 提到...

兩句:今日超忙,各位隨便。

火鶴 提到...

一個字:絕

匿名 提到...

Sam;

可能呢段留言已經過時了,若果你對此節目或題目還會留意。

請收聽以下一個電台節目,主持人訪問了林之克先生(「一百萬人的故事」的節目顧問),你會認同他的角度嗎?

http://www.rthk.org.hk/rthk/radio2/89/20080428.html

我膚淺,不完全認識他的論據背後的偉大理論;不過我同意他說的話:「一個節目(一件事)表達給一班觀眾(人),是會有不同的接收(理解)。」

記得放鬆自己,對自己好點。

人云亦云的
麥太

Samsara 提到...

多謝你呀麥太,我呢,好忙&燥底囉,又係咁,有時,真係會生在福中不知福嫁。我之前睇雜誌,有個名堂叫做「腦疲勞」,係話大腦在運作時温度會增加,如果温度降唔返落來既話就無辦法休息,簡單d來講係燒壞腦,電車d來講就係風扇壞左...好啦,等我熄一陣機再連線呀吓。

你不如send你之前話笑到流眼淚果個電台節目比我啦,tks!