2008年4月19日 星期六

窮人的銀行家(一)Dr Yunus

Dr Muhammad Yunus,孟加拉人,2006年諾貝爾和平奬得主,對人類和平既主要貢獻,係設立Grameen Bank(鄉村銀行),專門向窮人借貸(Micro-credit)既窮人的銀行家

Dr Yunus生於1940年East Bengal,在十四個兄弟姊妹中排行第三,在孟加拉接受教育,攞到奬學金去美國讀PhD。1971年,孟加拉在九個月既獨立戰爭中勝利,脫離巴基斯坦立國。1972年,Dr Yunus由美國回到孟加拉,在Chittagong University任教,打算在學術方面為建設祖國作出貢獻。

Well,人生往往有出乎意料既轉折,1974-5年,孟加拉發生近代最嚴重既全國大饑荒。

饑荒既貧民由鄉村湧入城市,乞求一點糧食。佢地並無(力氣)大吵大鬧,遊行示威,而係靜靜地乞食,靜靜地挨餓,靜靜地餓死。

睇住街頭廋骨如柴既饑民...甚至屍體,Dr Yunus覺得自己唔可以再留在舒適既象牙塔中,教授Elegant既經濟理論,同在黑板上畫著完美既供求既大交义;佢組織學生走出校園,到大學附近既鄉村,睇下點解自己既祖國會搞成咁,有d乜野可以幫助到窮人。

Dr Yunus第一個Project係在附近既農村Jobra搞水利工程。雖然提高農作物收成,但Dr Yunus並唔滿意,佢發現,水利工程只幫到擁有農地既貧窮農民,但係幫唔到更窮既、連立錐之地都無既村民。窮人都唔係鐵板一塊,之中仲可以再細分擁有一小塊農地或者夠錢租地既農民;同埋再窮d既「屋無半片瓦,缸無半柆米」既赤貧人民。

咁佢地點樣維生呢?做散工、做手工藝品、乞食。令Dr Yunus印象深刻既係,有一次稻米收成時,農民請左好多女人來做散工幫助打谷,Dr Yunus見到依d女人迫在打谷車上,拼命地踏車,雙手青筋畢露地捉住扶手保持平衡,又你推我ong地希望迫去比較有利既位置,可以無咁攰,為左霸好位佢地日日鬥早起身去返工。嫌辛苦?妳唔願做大把人爭住做,女人們其實好開心可以散工做,今日有工開即係今日有錢,家中既孩子可以開飯。

Dr Yunus望住佢地依種有如牲畜地做苦工既女人,腦中閃出兩個字:奴隸!

要幫,就要幫窮人中既窮人。

18 則留言:

Morca 提到...

希望佢檔嘢長開長有!

Samsara 提到...

oh Morca姐姐,何止長做長有,佢仲嫌到錢,用來開枝散葉,上年仲派息...佢既shareholder全部都係窮人...我會儘快寫埋。

匿名 提到...

Sam:

等待你的續。

麥太

C.M. 提到...

非常期待續集!!!

我覺得,Yunus,唔只係銀行家,簡直係藝術家。佢個行為藝術,好值得所有人欣賞。

Barry 提到...

很有意義的工作!

Samsara 提到...

多謝各位,我會儘快寫...

CM哥哥:你都知個結果啦,你介紹我睇既,thank you!

seikomatic 提到...

師妹,

你覺唔覺得咱們潛意式會有dd野呢:【....咁Dr Yunus佢老豆又唔係李+x,無可能攞出大舊大舊錢來幫村民贖身嫁。】

之前睇個一個—電視節目話印度由細路仔自已組織既銀行,將所有流落街頭既細路(幾歲到十幾)既血汗錢草起泥,如果唔系佢地either 就會亂花左,比人老粒左or 呃埋,雖然(好似)話只有丁史利息,但真系可以幫到班細路一點一滴咁草起d 雞碎,(好似)仲話可以借比佢將來做生意...
(好似)你有無寫過?

730萬個債仔其實閑閑地幾千萬人受惠........

給絕望既一個希望,菩薩行,大神蹟啦。

C.M. 提到...

>>將所有流落街頭既細路(幾歲到十幾)既血汗錢草起泥...

咦?咁似香港同韓國發展初期(捱生捱死期)果d “供會”既?(d細路會唔會學大人咁又走佬架?)

Samsara 提到...

大師:

我直頭係明意識啦...幫小朋友草起,都係第一次聽喎,又幾似供會喎...

Grameen Bank同Dr Yunus一齊攞和平奬,係因為佢地真係幫到好多人,而且,有冇留意佢攞既係和平而唔係經濟奬?除左係因為Dr Yunus唔係坐在度在黑板上畫大交义之外,仲因為赤貧係社會動盪既原因之一,消滅貧窮可以令世界更和平。

CM哥哥:Dr Yunus本新書係Creating a World Without Poverty,佢入面仲講到各個國家要plan下自己幾時可以起「貧窮博物館」,等我地既子子孫孫可以睇下原來以前當人類剛剛由馬騮進化成人形時,曾經有超過50%既人,要過埋d咁既日子。

我覺得Dr Yunus係一個dreamer呢!佢畫出來既vision,真係超美好,而佢既track record又話比你知,佢係可以令到dreams come true既!

Kevin 提到...

但我希望佢檔野快d 收檔
收得檔, 即係冇窮人要借錢啦...
咁唔係仲好咩

Samsara 提到...

Kevin哥哥:其實我好有聊嫁,Grameen Bank一定唔可以執嫁,等我寫埋你就知。

Morca 提到...

好長好長好長...

Samsara 提到...

3620字...除左交功效依世都未寫過咁長...仲要未寫完...呵!

匿名 提到...

Sam:

不如你分開多幾節可能會比較易閱讀。

頭暈中的
麥太

Morca 提到...

拍!拍!拍!

Samsara 提到...

麥太:收到,等我得閒搞搞佢。

Morca姐姐:拍!拍!拍!Yeah!

C.M. 提到...

香妹: 分開幾個post,都容易評論d。

Samsara 提到...

CM哥哥:斬件上?好喎,依家攞返去廚房,準備中。