十九、二百

又一年，已經十九年，下年就真係二十年。

究竟下年仲駛唔駛在滂之中坐在維園集會，要求平反六四呢？

好難講囉。

有人比喻依個世界既變化其實好似將一大舊零下１００度既冰放入煲度加熱，加熱左好耐好耐，你都唔見有任何反應。心諗，車，未只係一舊硬掘掘既白色石頭，無特別呀，無料到喎。可能在你傻更更地周圍揾樹枝木柴時，仲有路人會在度冷言冷語，笑你做乜在度浪費功夫，唔去做ｄ更有建設性既野。

如果你在依個時候熄火，咁白色石頭就真係一直都只會係白色石頭囉。

但係，好神奇地，如果你夠耐生，一直加熱，忽然之間，白色石頭開始溶，然後，變成一煲水！

轉變依家野，有時係漸變，但係呢，亦好多時會係突變。


你點知下一刻會發生乜事先？


*****

又，拜讀唐德剛先生既袁氏當國，真係有矛塞頓開之感，當年悶絶人寰既中史堂講到清未民初，真係只有兩個字：鬰悶。只有一堆xx條約，割地xx，賠償白銀xx両...同埋一大串人名！睇完除左知道比人踩到上心口之外，都係唔知發生乜事！你都好難怪我中三一畢業，逃離中史之後就打死都唔睇。

但係唐先生呢，可以將一片混亂既資料整理出來，將個故事講出來，學唐先生佢自己話齋，真歷史遠比假小說來得有趣！唐先生唔只鍾意說書，仲會加埋評論，同埋將各唔同時空既歷史人物作比較，哇，唔係講笑，真係好睇過八掛雜誌（依個係讚美）！

但係唐先生認為呢，中國行左二千幾年既帝制，要走向共和，中問一定要經過漫長而痛苦既轉型期，有如長江流向三峽依個瓶頸，中間既怒濤洶湧在所難免！

唐先生估計，依個轉型期，由清未計起，總共要二百年。點解係二百年而唔係一百五十或者三百年呢？我只睇唐先生一本書都仲未睇到喎，如果要二百年既話，就要等到二十一世紀中葉，先至全部轉型成功。

但係，估勿論駛唔駛二百年先過晒歷史三峽，平返六四依件事係唔駛等過晒既。倒轉講，真正面對歷史同埋承擔責任，先至可以進步，向前繼續走下去。


希望好快唔駛年年維園見啦，真係好大雨！


****

昨晚出乎意料地無落狗x，只係落左少少雨粉，連傘都唔駛開！

其實呢，一次咁既集會，用左好多candle、紙杯、banner、傳單，個台同影音設備又要起又要拆，個地下好鬼死硬，又熱又焗又落雨搞到全身臭汗，實在又唔環保又辛苦。依ｄkarma唔該全部入晒鄧小平數。

我呢，下年一ｄ都唔想去啦，所以呢，學陳日君話齋，就趁下年就二十周年，快ｄ平反六四啦！！！