2008年6月7日 星期六

照顧自己

有個男人生活得唔開心,於是佢去揾佢好有智慧又成功又開心既叔叔,問佢點解佢可以咁成功開心。

叔叔敎佢話,要愛人,首先要學識愛自己。首先,要比d時間,真正聆聽自己既感受。唔駛多,只要比一分鍾自己,問:在依一刻,我可以點樣照顧自己?

男人同叔叔講拜拜之後,渣車返屋企,就問自己:在依一刻,我可以點樣照顧自己?男人一面問自己,一面睇住路面,忽然發覺,架車既玻璃好污糟!其實,佢已經想洗好耐,但係佢成日都理到;其實,d玻璃水己經用晒,但係佢成日都無理到;其實,渣架咁污糟又亂七八糟既車,令男人覺得自己都係一團糟。

於是男人駛入加油站,加油順手洗車。好快,架車乾乾淨淨,入滿晒油又加滿晒玻璃水,男人心情立時好晒。但係入油果個阿叔,係都唔收佢張信用咭,一定要收現金。如果係平時,男人一定大動肝火,但係今次因為心情大好,佢只係攞左現金出來找數,開開心心地返屋企。

****

有日,男人收左工之後,帶住老婆比佢既購物清單,去超級巿場買一大堆野。佢仲記得佢好有智慧既叔叔教佢,要愛人,首先要學識愛自己,所以佢都有照顧自己,買左隻自己好喜歡既CD比自己。

男人推左一大車野出來,放落自己個車尾箱,渣車返屋企...渣車途中,男人忽然好想好想聽自己剛買返來既CD!!!但係男人又覺得唔得喎,佢好趕時間,老婆同小朋友都等緊佢返屋企食飯。

男人又諗起佢叔叔教佢,要聆聽自己既感受;於是,吱!!!男人在路邊停低架車,在車尾箱度揾隻cd出來,用左五分鍾都唔夠,男人就可以一面渣車一面開開心心地聽音樂。

佢返到屋企時,心情大好又精神奕奕,同老婆仔女愉快地食飯,過左愉快既一晚。

男人知道,如果佢唔係攞左隻cd出來既話,佢返到屋企時一定會又攰又覺得自己係可憐苦命既男人,一日到黑為口奔馳,為左養頭家而做到隻狗咁,佢會覺得自己係受害者,佢可能比老婆臉面睇,佢可能鬧d小朋友。

但係,只要男人聆聽自己既感受,不過係攞左隻cd出來聽,就已經有咁大既分別,佢令自己開心,就可以令自己屋企人都開心。

故事出自:One Minute for Yourself

4 則留言:

Juicy Runners 提到...

心情不佳, 故對住老闆黑口黑面...

面聖前先弄好自己既心情?

(嘿!君臣關係,又作別論!)

Samsara 提到...

真係好難以想像,On Dog哥哥會對大王黑口黑臉呢...君臣關係如果影響太大呢,要照顧自己,就要有d大動作啦。(佢以為佢係邊個?真係當自己係皇帝???)

seikomatic 提到...

一般打工仔對黑面老闆最開心果陣就系遞辭職信果一刻,有時封信都可以發揮藍絲帶的作用..

Samsara 提到...

大師:一堂未畢業既話,就算著草,都只係由一個班房,走去另一個班房,take既course仍然都係果個,直接你真係合格為止....唯有業隨身...