2009年4月14日 星期二

關......

係,又來,簡直係沒完沒了....


S回首前塵,其實,都不過係兩個月前,S都仲係一個正常人。當時S好滿意自己年年都跑十公里,佢既手帕交粉紅色怪(aka LHY)無論點樣威迫利誘都呃唔到佢去跑半馬。


但係,唉,都係朋輩影響。S識埋晒d傻瓜,終於都同流合污,沾染左傻氣,開始覺得只跑十公里唔夠好玩,要挑戰自己;其實本來只係講話跑半馬,搞搞下,變左下年要跑全馬。


Well,由十公里去到四十二公里唔係講笑的,唔想好壯烈地比人掃上車,之前一定要有組織既長期鍛鍊。在咁關鍵既時候,由天跌落來一個教練。教練唔只係S在網上新近相認既舊同學,仲要熱愛長跑,仲要住得好近...教練平時係一個好人,但係,一講到「跑」就會立時變臉,化身「穿Mizuno的惡魔」!

S細個時實在睇太多日本卡通片,一講到教練就諗起果種你跑步佢踩單車追住你,用大聲公嗌:「跑快d!快d!」仲要你一下跑得慢d,教練就會用大聲公來慳你個頭....今次真係天亡我也,唔係,係天助我也至真。


第一次練跑之前,教練仲要擱下狠話,一步都不能走!


所以,當昨日下午突然風雲變色雷電交加狂風暴雨,S同教練講電話時雖然儘量表現得失望,但係實在是暗暗高興。嗱,今次係天要下雨呀吓,S發誓真係無跳過求雨舞!


誰不知,好快d雨停晒,天清晒仲要出埋太陽,嗚嗚...到跑步時仲要地都吹乾埋...............


離遠就見到教練兇狠地推緊牆....來拉筋。不過好在唔見有單車....(其實,教練識唔識踩單車呢?會唔會遲d學大叔咁,乾脆玩埋三項鐵人呢?)

你以為惡魔會青面獠牙嗎?你咁諗實在太天真啦!惡魔係人好nice,笑笑口咁,一步步推你既人。教練話就話比S用自己速度跑,佢只會在後面跟,但係一跑佢就帶先,S只好跟住越跑越快囉。成條路咁長但只有一個燈口位,教練果然一步都不走,等過馬路時都仲要原地跑,仲要一見無車就衝出馬路....

跑完一個圏之後,教練笑笑口話:「如果下個圏都keep翻今次既時間就好啦!」

嗚~~~


******

S係第一次路跑,亦係第一次跑斜路,以前上咁長既斜S一定會行的。

斜路果然不同凡響,一上坡就知味道。S好少會跑到肚痛的,今次都要大半程都一路跑一路痛;S本來一直都只用鼻呼吸的,但係第二次上斜時都真係透唔到氣,要用埋口來吸氣....

但係,S自己知自己事,其實如果真係要跑既話,係可以再跑多一個圏的.....今朝起身,全身都無痛,連酸軟都無....證明,其實運動量仲未夠....


但係,果個可惡的聲音都仲係嘈:「唔跑啦,唔跑啦~」

又再一次證明,個Glass Ceiling唔係體能,而係自己個心。

個心好似係你既,但又唔係你既。心好任性囉,佢想點就點!

其實,S做人咁耐,有幾多次真係盡晒力,一d都無留力呢?


跑步的感覺,真係打翻調味盤,五味雜陳。

11 則留言:

Barry 提到...

師姐,一個星期要跑幾來次來續習?

Juicy Runners 提到...

姐姐知唔知有條變態裸跑狂(心想個隻)好羨慕妳呀?

Juicy Runners 提到...

人生總是單打獨鬥,有時有幸有個陪已叫人流涕,有個超人做教練就簡直叫人... ...

ak 提到...

近朱者赤...

努力加油...AK會以旁觀者既身份祝福大家...嘻嘻嘻...

Samsara 提到...

師兄你依個問題我要好小心地答,你知我個教練都睇緊嫁嘛,我諗住一個禮拜最少跑兩次,最好跑三次就可以隔日跑,天氣越來越熱先係我既大考驗。

On Dog哥哥:我知,我真係好好彩的!都唔明,何解我會咁幸福,嗚~~~(係因為跑得太攰而流淚)

我果頭都唔係天涯海角姐,有平靚正海鮮,仲有一間(出奇的)希臘野嫁!揾次周未入來跑完開餐呀!果條令人抓狂既斜路你真係要試下!

AK哥哥:欠左就要還,當日有日白字黑字在度講「君子重諾」,結果就飲茶見...唔跑返個十公里你點同我地,同埋,最緊要既,同自己交代先?

Marshmallow 提到...

努力!! 加油!! 海鮮係最強既動力, 跑完再食餐飽, 正!!!

Morca 提到...

除左現在,我地其實什麼都沒有。
加油!

英倫肥龍 提到...

話比S用自己速度跑,佢只會在後面跟,但係一跑佢就帶先>> 咁都俾你識穿~而其實第一轉可能我真係帶快咗,所以第二轉我都有所調校,咁你第二轉又的確跑得比第一轉自然及平均,唔錯呀~

另外,今次目的係想介紹呢條跑步路線,都一段時間後可以再推介其餘UPGRADE部份,一步一步去準備呀。

一於下次跑三轉啦~

又,我極其量只係陪跑一名。有曰三人行必有我師焉,咁既然而且只得二人同跑,冇話邊個教邊個呀,不過係分享一下跑步過程及經驗架咋!:P

s-pig 提到...

Samsara姐姐,

你俾心機呀!!

>>我果頭都唔係天涯海角姐,有平靚正海鮮...

我又想食呀!!!

Juicy Runners 提到...

好!下次大家著住跑步衫"珠記"見!

(著唔著Juicy Nike Short好呢?)

Samsara 提到...

昨晚,本來想跑的,結果落雨仲要深夜來一個黃球添!今次,S真係有d失望嫁。

你睇,教練已經講緊要我跑多轉唔止,仲要斜路之外再跑埋上山呀!!!果個真係山來嫁,行都

(教練正在懊惱之中,明明係S自己話要跑全馬,做乜叫佢跑多少少都要鬥智鬥力嫁呢!)

多謝各位,我會努力的,今晚唔落雨就去跑!!!