2009年4月24日 星期五

故事

在五十年代,有一個西藏的年青僧侶,由西藏翻過喜瑪拉雅山逃亡到印度,在冰天雪地的山中行左咁多日,佢又饑又渴又涷又累,終於比佢見到一戶人家,於是過去化緣乞食。

戶中只有一個妙齡少女,而女孩一眼就立時愛上僧人。

於是,少女講:「法師,出面又涷又大風,屋入面有暖立立既火爐,你不如入來休息啦。」

僧侶:「你有冇搞錯!我係出家人,點可以同你獨處一室?」

咁,少女就講:「法師,我好想好好地煮一餐飯比你食,我有一隻羊但係太大隻,我殺唔到呀。法師,你幫我殺左隻羊,我煮羊肉煲比你食呀。」

僧侶:「你有冇搞錯!我係出家人,你點可以叫我殺生?」

少女立時講:「Okok,唔殺唔殺。法師,但係我真係好想好好地煮一餐飯比你食,我鄰居有一隻羊仔,在山頭食草,你拖隻羊仔過來,羊仔我殺到,我殺呀!跟住煮羊肉煲你食。」

僧侶:「你有冇搞錯!我係出家人,你點可以叫我偷野?」

少女改變策略:「咁,一係你問過我鄰居,話比佢知係佢老公應承我比隻羊我既,咁你先拖隻羊仔過來,咪唔係偷囉。」

僧侶:「你有冇搞錯!我係出家人,你點可以叫我講大話?」



少女見一切方法無效,於是在火爐旁邊攞出一個玻璃樽,倒出金黃色既瓊漿玉液...立時,滿室芳香。

少女雙手捧住酒杯,臉上掛住最甜美既笑容,温柔地講:「法師,講左咁耐,你都口渴勒,飲左佢先啦。」

唔講唔覺,一講僧侶先發展自己原來已經好口渴,於是接過杯子,飲左一小口...好味!...於是一下子飲晒...


僧侶飲完之後立時智商降到負二十,不知羞恥為何物,狂歌喪舞裸跑,跟住同鄰居講話佢丈夫應承比晒d羊佢,仲親手殺左隻羊來整羊腩煲,酒足飯飽後,當然要「犯下所有男人都犯的錯」。


功德林就咁燒晒。

依個深淵好深,到依家都仲未聽到僧侶跌到洞底的聲音.....


******
佛陀教所有在家弟子要守五戒:殺,偷,邪淫,妄語,酒。

當年我第一次受戒時,只受前四戒,酒嘛,我唔喜歡飲,但只要唔飲醉我都唔覺得係一個問題,無乜大不了。

但,原來,酒是很大鑊的,會令人蠢的。飲左就會好容易失控,戒酒係為左保護其他既戒。

而且,唔想踩落浮沙就一步都唔好行過去,唔好比佢開始,一d都唔好飲。


又,你以為魔鬼係果個張牙舞爪地追住你,用大聲公鏗你個頭,呼喝叫你「跑快d」既Mizuno嗎?

嘿嘿,真正既惡魔係果個甜美既少女,身材好過阿Rain既型男,同只應天上有既瓊漿玉液。

17 則留言:

Barry 提到...

酒能亂性!

Samsara 提到...

我無飲呀師兄....

Juicy Runners 提到...

飲酒跟修練彷似是逆向而行,要跑步,就唔好人飲酒啦!姐姐!

C.M. 提到...

香妹,寫得真係好鬼抵死。

(燒左功德林,又可唔可以種返?)

獅子皇 提到...

哈哈哈‧‧‧CM 兄,俾你講中左我既心事添,我既功德林係燒左種返再燒再種返!

seikomatic 提到...

名人同有錢人佢地都有好大既"壓力",除左殺狗殺貓睇唔到之外,其它偷,邪淫,妄語,酒(毒)咩唔可以做。但窮人比較忙,朝餐晚食。無閑去面對壓力。

之前套片【門徒】話因為寂寞所以要吸毒,寂寞仲會攪自已個女,易服天橋底靈械,系電視機前爆響口,切人頭!

師妹,小有輕鬆的一面。

Juicy Runners 提到...

但呢篇小弟覺得很沉重...

ak 提到...

算啦...你由得我啦...

無酒既世界,我寧願死...

你俾我死啦...

好想死...

無酒既世界,諗下都想死...

Marshmallow 提到...

哈哈, 本想話, 俾AK睇到呢篇野, 佢會寧願去死...

果然!

Samsara 提到...

On Dog哥哥:

戒酒,係好難的!

等我講d野你知。

雖然我從來都無鍾意過飲酒,但係曾經有一份工係老闆同事有時會一齊落bar的,傾計飲野好開心嫁,我果時開始跟佢地飲Carlsberg。次次一去到就叫一打,一個桶咁,我頂龍飲兩枝,佢地就會飲晒都唔止,仲成日要再叫多桶。

我返左第份工就無咁飲法啦,我亦都認為自己無任何酒癮,只係Social drinker,自制力係我一直引以為豪既野...直至我一次去法鼓山打座時,真係決定受足五戒,當時唔覺得酒有乜野問題,只係,既然佛陀教我地唔好飲,仲嚴重認真到放入五戒之中,咁,我信佛陀。

戒左先知,原來,我依個一世人都無試過飲醉又亳無酒量既人都一樣有酒癮!!!!

我果時行超級巿場經過酒時,會好想買返枝,仲諗,唉,啤酒唔飲就算啦,連white wine, champagne依d都唔飲得....仲要呢,我未話戒時就無乜機會要飲酒,一戒就突然好多人好多場合係比你壓力要你飲囉。咁既情況一次又一次地發生,我呢,真係苦笑,覺得,係對我既考驗來嫁,你以為向上學好咁容易牙。

依個心癮,都要過左大半年之後先至無。

我自知好彩,因為如果唔係戒既力量好強,我唔會有足夠意志唔飲,心裏面既魔鬼好狡猾,永遠有好多借口,比如話:

「一杯姐,你又唔會飲醉發癲失禮街坊,無傷大雅呀。」

「人人都飲你唔飲,唔比面,老闆同客會唔高興!」

再加上我係女人,d人就算單單打打,又或者超級煩人地問完又問又問又問又問你飲唔飲,但係點都唔夠膽真係成個惡棍咁,太pushy;但係,佢地對男人就唔會咁客氣啦。

今日睇報紙,有戒左幾廿年海洛英又有強力宗教信仰既人都話:「就算我戒咗毒咁多年,有時起身都會有典癮嘅感覺。」

毒品同酒既威力,真係嚇人!

Samsara 提到...

CM哥哥:

>>燒左功德林,又可唔可以種返?

得!!!!

好肯定地答你,一萬個:得得得得得得得得得得得!!!

其實,火燒功德林都唔係一個好好既比喻,因為業既運作入面,係無功過相抵既。既係,比如一個人殺左七個人之後,然後又救返七個人,就唔會話無數既;佢殺左七個人所以要承受殺人既惡業,佢救左七個人亦都會有善業既福報;只係,業既運作有時好快,你會見到現眼報或現世報,但係大多時係好慢的,要好耐好耐之後先至浮現,咁囉。

你仲記唔記得依篇呀:http://samsaradiary.blogspot.com/2007/07/blog-post_17.html

我地如果現在開始努力,由水杯成為湖泊,就可以重罪輕受的。

Samsara 提到...

獅子哥哥:逆水行舟係好難的,進一步退兩步都成日有,但係,只要堅持落去,一直行一直行一直行,就會見到成果呀,努力!

大師:草生其貌不揚而可以咁紅,真係十分好彩既佢;但係佢唔珍惜,自毁前程。你諗,一個咁大酒癮既人受到咁重既打擊會點呢?未會飲得更多更兇囉,直到一日再唔可能飲為止...

我覺得自己係witness緊一個人點樣跌入downward spiral呀,本來想寫得有趣d,但係,真係笑唔出。

Samsara 提到...

AK哥哥:駛唔駛要生要死先,死好大鑊咩?人人都要死嫁啦。

有好多野:比。死。更。難。受。


綿綿:你呀你,唔好成日撩人飲啦!你都米飲啦!

Juicy Runners 提到...

今早開跑, 真正清楚嘗到, 酒能破氣!

Samsara 提到...

On Dog哥哥:雖然已經講過好多次,但都要再講-

I am PROUD of you!

ak 提到...

Samsara姐姐,

做人已經有好多比死更加難受既野...

如果可以選擇一死了之既話,可能真係第一時間就自我了斷...

就係因為唔死得,所以先繼續過d比死更難受既日子...

期間偶然俾個機會,等自己唔好咁清醒,不停比係果d比死更難受既野...都唔係好過份jer...

你話AK軟弱又好,自欺又好...唔好拎走我面前杯酒...只係一個咁卑微既要求...拜託哂...

Samsara 提到...

AK哥哥:

你要飲又邊度有人阻到你呀。

向上爬真係好難的,但係,係可以做得到的。